ដោយ​:​សុវណ្ណ​កុម្ភៈ​/​ភ្នំពេញ​: ជម្រុះ​ហ្វឹកហាត់​បិទ​ខ្ទប់ គឺជា​កន្លែង​ត្រូវ​ប្រមូលផ្ដុំ​ធ្វើការ​លុត​ដំ​ខ្លួន និង​ជា​កន្លែង​លះបង់​ដ៏​ធំធេង​របស់​ក្រុម​កីឡាករ​កីឡាការិនី​ជម្រើសជាតិ ដែល​ត្រៀម​ចូលរួម​ប្រកួត​ស៊ី​ហ្គេម​នៅ​ចំពោះមុខ​ចំនួន​២​លើក​។ នេះ​ជាការ​លើកឡើង​របស់លោក​វ៉ា​ត់ ចំរើន​អគ្គលេខាធិការ​គណៈកម្មាធិកា​រ​ជាតិ​​រៀបចំ​ស៊ី​ហ្គេម​លើក​ទី​៣២ ឆ្នាំ​២០២៣​។

​លោក​បានចាត់ទុក​ថាក​ន្លែ​ង​ហ្វឹកហាត់​បិទ​ខ្ទប់​​មិន​ដូច​កន្លែង​ធម្មតា ឬ ដូច​ហ្វឹកហាត់​នៅផ្ទះ​របស់​ខ្លួនឯង​ផ្ទាល់​ឡើយ​។ ផ្ទុយទៅវិញ​វា​ជាទី​
​ដែល​ត្រូវការ​ភាព​អត់ធ្មត់​ព្យាយាម​ហេតុនេះ​ការហ្វឹកហាត់​បិទ​ខ្ទប់​នេះ​វា​ពិតជា​ជួប​នូវ​ការលំបាក​ច្រើន​។ ប្រសិនបើ​គ្មាន​បញ្ហា​កូ​វីដ​១៩ ទេ នោះ​អ្វីៗ​វា​ពិតជា​មាន​ភាព​ធូរស្រាល​ច្រើន​។ តែ​ទោះជា​យ៉ាងណា​ក៏​យើង​ត្រូវតែ​អត់ធ្មត់ និង​បន្ត​ហ្វឹកហាត់​សម្រួច​បច្ចេកទេស​ឲ្យ​មានគុណ​ផល​កាន់តែ​ល្អ ដើម្បី​ត្រៀមខ្លួន​ប្រជែង​យក​មេដាយ​ពី​ស៊ី​ហ្គេម​លើក​ទី​៣១ នា​ខែឧសភា ឆ្នាំ​២០២២​នេះ​។​

​លោក​ក៏​ស្នើ​ឲ្យ​លោកគ្រូ អ្នកគ្រូ ដែលជា​ជន​គំរូ នៅក្នុង​ការដឹកនាំ​កីឡាករ កីឡាការិនី​ជម្រើសជាតិ​ត្រូវ​ផ្ដល់​ការលើកទឹកចិត្ត ជូន​ដល់​ពួកគាត់​។ ភារកិច្ច​របស់លោក​គ្រូ អ្នកគ្រូ គឺ​ការ​ផ្តល់នូវ​ចំណេះ​ជំនាញ​ឲ្យ​បាន​ខ្ពស់​ហើយ​ចំណេះ​ជំនាញ​ខាង​ផ្នែក​កីឡា​កម្រិត​ខ្ពស់ វា​ខុសពី​ចំណេះ​ជំនាញ​កីឡា​ធម្មតា ដោយ​ជំនាញ​កីឡា​កម្រិត​ខ្ពស់​ត្រូវការ​ការសិក្សា​ស្រាវជ្រាវ ការធ្វើ​ទំនើបកម្ម​បច្ចេកទេស និង​ការគោរពវិន័យ ក្រមសីលធម៌​ឲ្យ​បាន​ខ្ពស់​ផងដែរ​។ ជាមួយគ្នានេះ​ការជំរុញ​ទឹកចិត្ត​របស់​គ្រូបង្វឹក​សម្រាប់​កូនក្រុម​ខ្លួនឯង​គឺជា​រឿង​សំខាន់​ដូចគ្នា​​ទៀតផង ដើម្បី​បណ្តុះ​ឆន្ទៈ​ហ្វឹកហាត់​ឲ្យ​បាន​មុត​ស្រួច​។​

​លោក វ៉ា​ត់ ចំរើន សង្កត់ធ្ងន់​យ៉ាង​ដូច្នេះ​ថា លោកគ្រូ អ្នកគ្រូ​បង្វឹក​មិនអាច មិន​រឹងមាំ ហើយក៏​មិនត្រូវ​ធ្វើ​ឲ្យ​កីឡាករ កីឡាការិនី មាន​សតិអារម្មណ៍​មិន​រឹងមាំ​តាម​លោកគ្រូ អ្នកគ្រូ​នោះដែរ​។​ពាក្យសម្តី​របស់​គ្រូ ក្នុង​ភាពអវិជ្ជមាន នឹង​ជះឥទ្ធិពល​ទៅដល់​កីឡាករ កីឡាការិនី​។ ដូច្នេះ គ្រូ​ត្រូវមាន​ភាព​វិជ្ជមាន នៅក្នុង​ចិត្តសាស្ត្រ​របស់ខ្លួន ដោយ​ភាព​វិជ្ជមាន គឺ​ការតស៊ូ​។ ការដឹកនាំ​របស់​គ្រូបង្វឹក​គឺជា​ការកំណត់​វាសនា​ក្នុង​ការផ្តល់​ក្តីសង្ឃឹម​ដល់​អត្ត​ព​លិ​ក​ជម្រើស​
​ជាតិ​៕​