​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ក្រុម​អ្នក​មាន​បុណ្យ Barcelona ដែល​មាន​ប្រៀប​ឈ្នះ​យ៉ាង​លើសលប់​លើ Galatasaray កាល​ពី​ជើង​ទី​១​នៃ UEFA Europa League​វគ្គ​១៦​ក្រុម​ចុងក្រោយ បាន​ត្រឹម​ស្មើ ០-០ ប៉ុន្តែ​ថ្ងៃនេះ​ការឆ្លើយតប​របស់​ពួក​គេ​លើ​ក្រុម​មក​ពី​តួ​ក​គី​គឺ​ច្បាស់​ជា​ខ្លាំងក្លា​ជាង​ជើង​ទីមួយ​។ ហើយ​ក្រុម​ញញួរ​ធំ West Ham ដែល​ចាញ់ Sevilla កាល​ពី​ជើង​ទីមួយ​១-០ ក៏​ត្រូវតែ​ប្រឹងប្រែង​វាយបក​យកឈ្នះ​វិញ​ផង​ដែរ ដែល​រឿង​នេះ​ជា​ការលំបាក​ខ្លាំងណាស់​សម្រាប់​ពួកគេ ព្រោះ Sevilla ជា​គីឡូ​ធ្ងន់​ចាស់វស្សា​មួយ​នៅ​អឺរ៉ុប​។

​ដោយឡែក​ក៏​មាន​ការប្រកួត UEFA Conference League និង English Premier League នៅ​រាត្រី​ថ្ងៃ​ព្រហស្បតិ៍​នេះដែរ ក៏ប៉ុន្តែ​យើង​នឹង​លើកយក​២​គូ​ក្នុង EL មក​វិភាគ​ប៉ុណ្ណោះ​។

– Galatasaray vs Barcelona

​ការភ្ញាក់ផ្អើល​ពិតប្រាកដ​រំពឹង​ផ្ទុះឡើង​នៅក្នុង​និង​ជុំវិញ​កីឡដ្ឋាន NEF Stadyumu នៅ​យប់​ថ្ងៃ​ព្រហស្បតិ៍​នេះ នៅពេល​ដែល​ក្រុម​យក្ស​អេ​ស្ប៉ា​ញ Barcelona មក​សួរសុខទុក្ខ​ដល់​ទីក្រុង​អ៊ី​ស្តង់​ប៊ុល​សម្រាប់​ការប្រកួត​ជើង​ទី​២​នៃ UEFA Europa League វគ្គ ១៦ ចុងក្រោយ​របស់​ពួកគេ​។​

​អ្វីដែល​ធ្វើឱ្យ​អារម្មណ៍​កាន់តែ​រំភើប​សម្រាប់​អ្នកគាំទ្រ​ក្នុងប្រទេស​តួ​ក​គី គឺ Galatasaray បាន​ទប់​អ្នក​មាន​បុណ្យ ០-០ កាលពី​៧​ថ្ងៃមុន​នៅ​កីឡដ្ឋាន Camp Nou ដោយ​ធ្វើឱ្យ​ឱកាស​ឡើង​វគ្គ​បន្ទាប់​មាន​ស្មើគ្នា ៥០/៥០ នៅ​ទឹកដី​ផ្ទាល់​របស់​ពួកគេ​នៅ​យប់​នេះ​។​

​ក្រុម Galatasaray ទើបតែ​យកឈ្នះ​លើ​គូ​ប្រជែង​ជូរ​ចត់ Besiktas ២-១ ក្នុង​ការប្រកួត​បាល់ទាត់​ដ៏​ធំ​បំផុត​របស់​តួ​ក​គី​កាលពី​យប់​ថ្ងៃ​ចន្ទ ដូច្នេះ​វា​បាន​បន្ថែម​អារម្មណ៍​កាន់តែ​រំភើប​រីករាយ​ថែមទៀត​មុន​ជំនួប​ទល់នឹង Barcelona ។​

​ខ្សែ​បម្រើ ការេ​ម អាក់​តួ​កូ​គ្លូ (Kerem Akturkoglu) គឺជា​វីរបុរស​ស៊ុត​ចូល​២​គ្រាប់​ក្នុងឱកាស​នោះ ហើយ​ក្រសែភ្នែក​គ្រប់​គ្នា​នឹង​សម្លឹង​មើល​គាត់​មុន​ពេល​ការប្រកួត​ជាមួយ​ក្រុមអេ​ស្ប៉ាញ​ថ្ងៃនេះ​។​

Barcelona ក៏​មាន​ស្មារតី​ខ្ពស់​មោះមុត​ផង​ដែរ​មុន​ចូលរួម​ការប្រកួត​យប់​នេះ បន្ទាប់​ពី​យកឈ្នះ​លើ Osasuna ៤-០​។​

​កីឡាករ អូស្មាន ដិម​បេឡេ (Ousmane Dembele) បាន​លេង​យ៉ាង​អស្ចារ្យ​ជាមួយ​នឹង​ការបញ្ជូន​បាល់​ស៊ុត​៣​ដង​ដ៏​អស្ចារ្យ ខណៈ​កីឡាករ ហ្វើ​រ៉ាន់ តូ​រ៉េ​ស (Ferran Torres) ស៊ុត​ចូល​២​គ្រាប់​ម្នាក់ឯង​។ ខ្សែ​ប្រយុទ្ធ ពៀ​រ៉េ​-​អេ​មឺ​រិក អូ​បា​មេ​យ៉ាង (Pierre-Emerick Aubameyang) ក៏​រកបាន​១​គ្រាប់​សម្រាប់​កងទ័ព​ស្រួច​របស់​លោក​ហ្សា​វី​ផងដែរ​។​

​ក្រុម​អ្នក​មាន​បុណ្យ​បានឈ្នះ ៥ ដង និង​ស្មើ​មួយ​ក្នុងចំណោម ៦ ប្រកួត​ចុងក្រោយ​នៅ​ទូទាំង​ការប្រកួត​គ្រប់​ក្របខ័ណ្ឌ ដោយ​ស៊ុត​បញ្ចូល​ទី​ជា​មធ្យម ៤ គ្រាប់​ក្នុង​ការប្រកួត ៤ លើក​ក្នុងចំណោម ៦ ប្រកួត​ចុងក្រោយ​។​

​ពួកគេ​ក៏​បាន​គ្របដណ្តប់​ការប្រកួត​ជើង​ទីមួយ​ផងដែរ ហើយ​វា​ជា​ការត្រឹមត្រូវ​ក្នុងការ​និយាយថា​ពួកគេ​សម​នឹង​ទទួលបាន​ជ័យជម្នះ​នៅ​ទឹកដី Camp Nou​។ តើ​ក្រុម​អ្នក​មាន​បុណ្យ​អាច​បន្ត​ភ្លាត់ស្នៀត​ម្តងទៀត​ទេ​យប់​នេះ​នៅ​ទឹកដី Galatasaray ? ចម្លើយ​គឺ​ប្រហែលជា​មិន​អាច​ទេ​។

​ក្រុម​អ្នក​មាន​បុណ្យ​គួរតែ​មាន​ឱកាស​ឈ្នះ​ខ្ពស់​ថ្ងៃនេះ ដោយ​ដឹងថា Galatasaray បាន​របូត​គ្រាប់​បាល់​យ៉ាងហោចណាស់​មួយ​គ្រាប់​ក្នុង​ការប្រកួត ៨ លើកចុងក្រោយ​នៅលើ​ទឹកដី​ខ្លួនឯង​។​

​លទ្ធផល​ព្យាករណ៍ Barcelona ឈ្នះ ៤-០​។​

– West Ham vs Sevilla

West Ham United នឹង​ព្យាយាម​វាយបក​យកឈ្នះ​វិញ​លើ​លទ្ធផល​ចាញ់ ១-០ ទល់នឹង Sevilla ក្នុង​ការប្រកួត​ជើង​ទី​២​នៃ UEFA Europa League វគ្គ ១៦ ក្រុម​ចុងក្រោយ​របស់​ពួកគេ​នៅ​យប់​ថ្ងៃ​ព្រហស្បតិ៍​នៅឯ​កីឡដ្ឋាន London​។​

​ទោះយ៉ាងណា ក្រុម​អង់គ្លេស​មួយ​នេះ​នឹង​មាន​ភារកិច្ច​តឹងតែង​ជាង​ការរំពឹងទុក​ក្នុង​ឱកាស​នេះ ព្រោះ​ពួកគេ​ទំនង​ជា​ពុំ​មាន​កីឡាករ​សំខាន់ៗ​ជាច្រើន​ក្នុង​ក្រុម​ជម្រើស​ដំបូង​ទេ​។​

​កីឡាករ​ល្អ​បំផុត​របស់ West Ham រដូវ​កាល​នេះ គឺ ចា​រ៉ូដ បូ​វិន (Jarrod Bowen) បាន​រងរបួស ហើយ​នឹង​មិន​ជាប់​ជម្រើស​នៅ​ទី​នេះ​ទេ ខណៈ​ដែល​កីឡាករ​ដូចជា វ្ល៉ា​ឌី​មៀរ ឃូ​ហ្វាល់ (Vladimir Coufal) មី​ខា​អ៊ី​ល អង់​តូ​នីញ៉ូ (Michail Antonio) និង​អា​រ៉ុន ក្រេស​វែល (Aaron Cresswell) សុទ្ធ​តែ​អាច​អវត្តមាន ដោយសារ​របួសស្រាល​ផងដែរ​។​

​ក្រុម​ញញួរ​ធំ​នៅ​តែ​មាន​ឱកាស​ប្រជែង​យក​ចំណាត់​ថ្នាក់​កំពូល​ទាំង​បួន​សម្រាប់​ចុងបញ្ចប់​នៃ​រដូវ​កាល Premier League ឆ្នាំ​នេះ​ជាមួយនឹង​ជ័យជម្នះ ២-១ លើ​ក្រុម Aston Villa កាលពី​យប់​ថ្ងៃអាទិត្យ​ក្នុង​ទីក្រុង​ឡុង​ដ៍​។​

​កីឡាករ អង់ឌ្រី យ៉ាម៉ូ​លេន​កូ (Andriy Yarmolenko) និង​ប៉ា​ប្លូ ហ្វូ​ណាល់ (Pablo Fornals) រក​បាន​ម្នាក់​១​គ្រាប់​កាលពី​ចុង​សប្តាហ៍​។ ទោះយ៉ាងណា​ក៏ដោយ វា​ជា​រឿង​សំខាន់​ក្នុង​ការទទួលស្គាល់​ថា កូនក្រុម​របស់លោក​ដេវីត ម៉​យ ជា​ទូទៅ​បាន​ធ្លាក់ចុះ​ទម្រង់​លេង​នា​ពេល​ថ្មីៗ​នេះ​។​

West Ham បាន​ចាញ់​ការប្រកួត​៣​លើ​ក​ជាប់ៗ​គ្នា​នៅ​មុន​ពេល​ទទួល​ជ័យជម្នះ​លើ​ក្រុម Aston Villa ។​

Sevilla ក៏​មិនសូវ​មាន​ទម្រង់​លេង​ល្អ​ជាង​ញញួរ​ធំ​ប៉ុន្មាន​ដែរ​។ ពួកគេ​បាន​ត្រឹម​ស្មើ ១-១ នៅក្រៅ​ដី​នៅឯ​កីឡដ្ឋាន​របស់ Rayo Vallecano កាលពី​ថ្ងៃអាទិត្យ ដើម្បី​ដេញតាម ១០ ពិន្ទុ​ពី​ក្រោយ​ក្រុម​លេខ​១ Real Madrid ដែល​បាន​យកឈ្នះ​លើ​ក្រុម Mallorca យ៉ាង​ងាយស្រួល​កាលពី​យប់​ថ្ងៃ​ចន្ទ​។​

​ដូច្នេះ Sevilla បាន​ស្មើ ៣ ដង​ក្នុង​ចំណោម​ការប្រកួត La Liga ៤ លើកចុងក្រោយ​។ ពួកគេ​ក៏​បាន​ចាញ់​ការប្រកួត​ជើង​ទី​២​នៃ​ការប្រកួត Europa League វគ្គ ៣២ ចុង​ក្រោយ​ជាមួយនឹង​ក្រុម Dinamo Zagreb (១-០) ក្នុង​រដ្ឋធានី​ក្រូ​អាស៊ី​ផង​ដែរ​។​

​កូន​ក្រុម​ដែល​ដឹកនាំ​ដោយ​ជូ​លេន ឡូ​ប៉េតេ​ហ្គី (Julen Lopetegui) មិន​បាន​ឈ្នះ​នៅ​ក្រៅ​ទឹក​ដី​ចំនួន ៧ លើក​ចុង​ក្រោយ​ក្នុង​គ្រប់​ការប្រកួត​ទាំងអស់​។​

​យោង​លើ​ទម្រង់​លេង​ធ្លាក់ចុះ​ដូចគ្នា យើង​រំពឹង West Ham មានលទ្ធភាព​យកឈ្នះ​លើ Sevilla ព្រោះ​មាន​ប្រៀប​ក្នុង​ទឹកដី​។

​លទ្ធផល​ទស្សន៍ទាយ ៖ West Ham ឈ្នះ​២-១៕

Barcelona នៅតែ​រំពឹង​ឈ្នះ​ខ្ពស់​លើ Galatasaray ត្បិត​លេង​នៅ​ក្រៅ​ទឹកដី​យប់​នេះ