ដោយៈ​យោធិន​/​ភ្នំពេញៈ​ឯកអគ្គរាជទូត​ចក្រភព​អង់គ្លេស​ប្រចាំ​នៅ​ព្រះរាជាណាចក្រ​កម្ពុជា​បានបង្ហាញ​ពី​សុ​ឆន្ទៈ​ក្នុង​គោលបំណង​បង្កើត​កិច្ចសហប្រតិបត្តិការ​លើ​វិស័យ​រក្សា​សន្តិភាព​ជាមួយ​កម្ពុជា​បើទោះបីជា​រហូតមកទល់​ពេលបច្ចុប្បន្ន​ចក្រភព​អង់គ្លេស និង​កម្ពុជា​ពុំទាន់​មាន​កិច្ចសហប្រតិបត្តិការ​លើ​វិស័យ​ការពារជាតិ​យ៉ាងណាក្តី​។​

​លោកស្រី TINA REDSHOW ឯកអគ្គរាជទូត​ចក្រភព​អង់គ្លេស​ប្រចាំ​នៅ​កម្ពុជា​បាន​មានប្រសាសន៍​លើកឡើង​ពី​គោល បំណង​បង្កើត​កិច្ចសហប្រតិបត្តិការ​លើ​វិស័យ​រក្សា​សន្តិភាព​ជាមួយ​កម្ពុជា​បែបនេះ​ក្នុងឱកាស​អញ្ជើញ​ចូលជួប​សវនាការ ជាមួយ​នាយ​ឧ​ត្ត​ម​សេនីយ៍​សែម សុវណ្ណនី អនុប្រធាន​គណៈកម្មាធិកា​រ​ជាតិ​និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព នា​ព្រឹក​ថ្ងៃទី​១៧ ខែមីនា ឆ្នាំ​២០២២ នៅ​ស្នាក់ការ​មជ្ឈមណ្ឌល​ជាតិ​រក្សា​សន្តិភាព​។​

​លោកស្រី​ឯកអគ្គរាជទូត​ចក្រភព​អង់គ្លេស​ដែល​អមដំណើរ​ដោយ​លោក​វរសេនីយ៍ឯក JAMIE MURRAY នាយទាហាន​
​សេនាធិការ​ទទួលបន្ទុក​អាស៊ីអាគ្នេយ៍​បាន​ថ្លែងថា​នេះ​ជា​ដំណើរ​ទស្សនកិច្ច​លើកទីមួយ​របស់លោក​ស្រី​នៅ​មជ្ឈមណ្ឌល​ជាតិ​រក្សា​សន្តិភាព​ដែល​ធ្វើឡើង​ស្របទៅនឹង​ខួប​លើក​ទី​៣០​របស់​ចក្រភព​អង់គ្លេស​ក្នុង​កិច្ច​ចូលរួម​បេសកកម្ម​រក្សា​សន្តិ​ភាពជា​សកល​ក្រោម​ឆត្រ​អង្គការសហប្រជាជាតិ​។​លោកស្រី​បាន​វាយតម្លៃ​ខ្ពស់​ពី​វីរភាព​របស់​កង​យោធា​មួក​ខៀវ​កម្ពុជា​ដែល​បាន​ចូលរួម​យ៉ាងសកម្ម​ជាមួយ​បណ្តា​ប្រទេស​បរិច្ចាគ​កម្លាំង​ក្នុង​បេសកកម្ម​ក្រោម​ឆត្រ​អង្គការសហប្រជាជាតិ​និង​ផ្តោត​ជាពិសេស កម្លាំង​វីរនារី​មួក​ខៀវ​កម្ពុជា​ដែល​ស​ម្រ​ច​បាន​ស្នាដៃ​ធំធេង​ជា​បន្តបន្ទាប់​ក្នុង​បណ្តា​តំបន់​បេសកកម្ម​របស់​អង្គការសហប្រជាជាតិ​ដោយ​ទទួលបាន​ការកោតសរសើ​រ​ពី​សំណាក់​ថ្នាកដឹកនាំ​អង្គការសហប្រជាជាតិ​។​

ជាមួយ​ប្រសាសន៍​ថ្លែងអំណរគុណ​ចំពោះ​ជំនួយ​ឧបត្ថម្ភ​ដ៏​ថ្លៃថ្លា​ដែល​ចក្រភព​អង់គ្លេស​ផ្តល់​ដល់​កម្ពុជា​លើ​វិស័យ​បោសសម្អាត​មីន​នាយ​ឧ​ត្ត​ម​សេនីយ៍ សែម សុវណ្ណនី បានលើកឡើង​នូវ​សំណូមពរ​តាមរយៈ​លោកស្រី​ឯកអគ្គរាជទូត​ក្នុង​ការជួយ​បណ្តុះបណ្តាល​ជំនាញ​ឲ្យ​ដល់​កង​យោធា​មួក​ខៀវ​កម្ពុជា ដូចដែល​បណ្តា​ប្រទេស​ជា​មិត្ត​មួយចំនួន​រួមមានៈ បារាំង ជប៉ុន អូស្ត្រាលី កាណាដា​…​និង​ដោយឡែក​លើ​វិស័យ​យេនឌ័រ​។​

​នាយ​ឧ​ត្ត​ម​សេនីយ៍​ក៏បាន​លើក​ឡើងជា​សំណូមពរ​ផងដែរ​ដល់​ចក្រភព​អង់គ្លេស​ក្នុងការ​ទទួលយក​សិក្ខាកាម​នាយទាហាន​កម្ពុ​ជា​ទៅធ្វើ​ការហ្វឹកហ្វឺន​នៅ​សាលា​យោធា​ជាន់ខ្ពស់​ចក្រភព​អង់គ្លេស​,​ជួយ​បណ្តុះបណ្តាល​ផ្នែក​ភាសា​អង់គ្លេស​ឲ្យ​ដល់ កង​យោធា​មួក​ខៀវ​កម្ពុជា​សំដៅ​លើកកម្ពស់​សមត្ថភាព​ក្នុង​ការធ្វើទំនាក់ទំនង​តាម​បណ្តា​បេសកកម្ម​របស់​អង្គការសហប្រជាជាតិ​៕​សរន​