​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ នៅក្នុង​សុន្ទរកថា​វីដេអូ​រំជួលចិត្ត​មួយ​នៅ​ចំពោះមុខ​សភា​អាល្លឺម៉ង់​កាលពី​ថ្ងៃ​ព្រហស្បតិ៍ ទី​១៧ មីនា ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី បាន​ជំរុញ​ឱ្យ​អាល្លឺម៉ង់​ជួយ​បំផ្លាញ “​ជញ្ជាំង​” ថ្មី​ដែល​រុស្ស៊ី​កំពុង​ដំឡើង​នៅ​អឺរ៉ុប​។​

​លោក​ហ្សេ​លេន​ស្គី​បាន​ប្រាប់​សមាជិកសភា​ថា “​វា​មិនមែន​ជា​ជញ្ជាំង​ទីក្រុង​បែរ​ឡាំង​ទេ វា​គឺជា​ជញ្ជាំង​នៅ​អឺរ៉ុប​កណ្តាល​រវាង​សេរីភាព​និង​ការចាប់​ចង​ហើយ​ជញ្ជាំង​នេះ​កាន់តែ​ធំ​ឡើង​ជាមួយ​នឹង​​រាល់​គ្រាប់បែក​” ដែល​បាន​ទម្លាក់​លើ​អ៊ុ​យក្រែន​។​

​ដោយ​យកមកប្រើ​ឡើងវិញ​នូវ​ការអំពាវនាវ​អំពី​សង្គ្រាមត្រជាក់​របស់​ប្រធានាធិបតី​អាម៉េរិក រ៉ូ​ណាល់ រី​ហ្គែ​ន (Ronald Reagan)​នៅ​ទីក្រុង​បែរ​ឡាំង លោក​ហ្សេ​លេន​ស្គី​បាន​អង្វរ​អធិការបតី​អាល្លឺម៉ង់​​លោក អូ​ឡា​ហ្វ សូ​ល ថា “​លោក​សូល​ជាទីគោរព សូម​វាយ​ជញ្ជាំង​នេះ​ចោល​ទៅ​”​។​

​មុនពេល​សុន្ទរកថា​របស់​គាត់ សមាជិក​សភា​អាល្លឺម៉ង់​បាន​ក្រោកឈរ​ទះដៃ​ជូន​លោក​ហ្សេ​លេន​ស្គី​។​

​សុន្ទរកថា​តាម​អន​ឡាញ​របស់​គាត់​ទៅកាន់​សភា​អាល្លឺម៉ង់​បាន​កើតឡើង​មួយថ្ងៃប​ន្ទា​ប់​ពី​សុន្ទរកថា​ជា​វីដេអូ​ស្រដៀង​គ្នា​នេះ​ទៅ​កាន់​សភា​អាម៉េរិក កន្លែង​ដែល​គាត់​បាន​អំពាវនាវ​ជា​ថ្មី​ឱ្យ​មាន​តំបន់ “​គ្មាន​ការហោះហើរ​” នៅ​លើ​មេឃ​របស់​អ៊ុយ​ក្រែន​ដើម្បី​ការពារ​ការវាយ​លុកតា​ម​អាកាស​របស់​រុស្ស៊ី​។​

​នៅក្នុង​សុន្ទរកថា​នោះ លោក​ហ្សេ​លេន​ស្គី​បាន​ប្រដូច​ការឈ្លានពាន​របស់​រុស្ស៊ី​លើ​ប្រទេស​របស់​គាត់​ទៅនឹង​ការវាយប្រហារ​ភេរវកម្ម​ថ្ងៃទី ១១ ខែ​កញ្ញា ឆ្នាំ ២០០១ នៅ​សហរដ្ឋ​អាម៉េរិក​និង​ការវាយប្រហា​រលើ​​កំពង់ផែ​ភៀ​ល​ហាបឺ (Pearl Harbor)​ក្នុង​ឆ្នាំ ១៩៤១ ដែល​បាន​ទាញ​សហរដ្ឋ​អាម៉េរិក​ចូលទៅក្នុង​សង្គ្រាមលោកលើកទីពីរ​៕

ប្រធានាធិបតី​អ៊ុ​យក្រែន ហ្សេ​លេន​ស្គី ថ្លែង​សុន្ទរកថា​ទៅកាន់​សមាជិក​សភា​អាល្លឺម៉ង់​នៅ​ថ្ងៃ​ព្រហស្បតិ៍​នេះ