ដោយៈមុនីរ័ត្ន/​ភ្នំពេញៈ ប្រជាពលរដ្ឋ​កម្ពុជា​មានភ័ព្វ​សំណាង​ដែលមាន​សម្តេច​តេ​ជោ ហ៊ុន សែន នាយករដ្ឋមន្ត្រីជា​អ្នកដឹកនាំប្រកបដោយ​ចក្ខុវិស័យ​ខ្ពស់។ ​បំណងប្រាថ្នា​ដ៏​ធំ​បំផុត​របស់សម្តេច​តេ​ជោ គឺ​ធ្វើយ៉ាងណា​ឱ្យ​ប្រជាពលរដ្ឋ​មាន​សេចក្តីសុខ និង​ភាព​ចម្រុងចម្រើន​ទាំង​ផ្លូវកាយ ដែល​សំដៅ​ទៅលើ ការរីក​ធំធាត់​លូតលាស់​រាងកាយ សុខភាព និង​សមត្ថភាព​បញ្ញា ក៏ដូចជា​សេចក្តីសុខ​ស្ងប់​ផ្នែក​ផ្លូវចិត្ត គឺ​សំដៅ​ទៅលើ​ការមិន​ព្រួយបារម្ភ​អំពី​បញ្ហា​សង្គ្រាម និង​អសន្តិសុខ​នានា។ សម្តេច​តេ​ជោ បាន​នាំមក​នូវ​សុខសន្តិភាព និង​សិទ្ធិសេរីភាព​គ្រប់បែបយ៉ាង ព្រមទាំង​បង្កលក្ខណៈ​ឱ្យមាន​ការជួយ​គាំទ្រ និង​ចែករំលែក​ជួយ​គ្នា​ទៅវិញទៅមក ដើម្បី​ភាពសុខដុមរមនា​នៅក្នុង​សង្គម​។​

​នេះ​ជាការ​បញ្ជាក់​របស់​លោកឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គមេបញ្ជាការ​រង​នៃ​កងយោធពល​ខេមរភូមិន្ទ មេបញ្ជាការ​កងទ័ពជើងគោកក្នុងពិធី​សម្ពោធ​ដាក់ឱ្យ​ប្រើប្រាស់​ផ្លូវ​បេតុង​ចំនួនមួយខ្សែ ប្រវែង ១៦,១៣៣ គីឡូម៉ែត្រ និង​ផ្លូវ​ក្រាល​កៅស៊ូ DBST មួយខ្សែ ប្រវែង ជាង៥គីឡូម៉ែត្រនិង​ពិធីបើកការដ្ឋាន​សាងសង់​ស្ពានបេតុងប្រាំបួន កន្លែង នៅ ក្នុងស្រុក​ស្រី​សន្ធរ ខេត្តកំពង់ចាម កាលពី​ព្រឹក​ថ្ងៃទី​១៧ ខែមីនា ឆ្នាំ​២០២២២​។​

​លោកឧ​ត្ត​ម​សេនីយ៍​ឯក ហ៊ុន ម៉ា​ណែ​ត ក៏បាន​សូម​ចូលរួម​អបអរសាទ​ចំពោះ​សមិទ្ធផល​ផ្លូវ និង​ស្ពាន​ទាំងនេះ ដែល​នឹង​ក្លាយជា​គុណប្រយោជន៍​ដ៏​ធំធេង សម្រាប់​ប្រជាជន​ក្នុង​មូលដ្ឋាន រួមទាំង​អ្នកដំណើរ​មក​ទីជិត​ឆ្ងាយ​។ ជាក់ស្តែង​ណាស់ សមិទ្ធផល​ទាំងនេះ​បានកើត​ចេញពី​កម្លាំង​រួបរួម​សាមគ្គីភាព រវាង​វិស័យ​ឯកជន​ដែលមាន​ក្រុមហ៊ុន​ប៉េង ហួត គ្រុប និង ក្រុមហ៊ុន​ក្រុមហ៊ុន បុរី​អង្គរ ភែ​លេស ចូលរួមចំណែក​ជាមួយ​រាជ​រដ្ឋ​ភិ​បាល​ក្នុង​ការកសាង​ផ្លូវ និង​ស្ពាន​ទាំងនេះ​ទ្បើង ដើម្បី​នាំមក​នូវ​ក្តីសង្ឃឹម ជួយ​សម្រួល​ការរស់នៅ​ប្រកប​របរ​ប្រចាំថ្ងៃ បម្រើឱ្យ​ការអភិវឌ្ឍ​សេដ្ឋកិច្ច និង​លើកកម្ពស់​កម្រិតជីវភាព​របស់​ប្រជាពលរដ្ឋ​ក្នុងស្រុក​ស្រី​សន្ធរ​ឱ្យ​កាន់តែ​ចម្រើន​រុងរឿង​ថែមទៀត​។ ទាំងនេះ​កើតមាន​ទៅបាន គឺ​ដោយ​ឈរលើ​ស្មារតី “​សិល្បៈ​នៃ​ការចែករំលែក​” ក្រោម​ដំបូល​នៃ​សុខសន្តិភាព និង​វឌ្ឍនភាព​នៃ​សង្គមជាតិ​។​

​ជាមួយគ្នានេះលោកឧ​ត្ត​ម​សេនីយ៍​ឯក ហ៊ុន ម៉ា​ណែ​ត ក៏បាន​អរគុណ​ប្រជាពលរដ្ឋ​ស្រុក​ស្រី​សន្ធរ ដែល​តែង​ជឿទុកចិត្ត និង​ផ្តល់​ការគាំទ្រ​ដល់ សម្តេច​តេ​ជោ ហើយ​តែង​បាន​បោះឆ្នោត​ជូន​គណបក្ស​ប្រជាជន​កម្ពុជា​ក្នុង​រយៈកាល​កន្លងមក និង សូម​បន្ត​ជួយ​គាំទ្រ​គណបក្ស​ប្រជាជន​កម្ពុជា ឱ្យមាន​ឱកាស​បន្ត​បំពេញ​កាតព្វកិច្ច​ក្នុងការ​បម្រើ​ប្រជាពលរដ្ឋ​ឱ្យមាន​ជីវភាព​កាន់តែ​សុខសាន្ត និង​រុងរឿង តាមរយៈ​ការដឹកនាំ​ប្រកបដោយ​ភាព​ទទួលខុសត្រូវ​ខ្ពស់ និង​ការតម្កល់​ប្រយោជន៍​ជាតិ និង​ប្រជាជន​ជាធំ ព្រម​ជាមួយនឹង​ការខិតខំ​ពង្រឹង និង​ពង្រីក​នូវ​សមិទ្ធផល​វិជ្ជមាន​ទាំងទ្បាយ​ឱ្យ​កាន់​រីកដុះដាល និង​ខ្លាំងក្លា​បន្ថែមទៀត​៕​សរន