ដោយៈ​សុផល​/​សៀមរាប​៖ នៅ​ថ្ងៃទី​១៧​ខែមីនា​នេះ រដ្ឋមន្ត្រីក្រសួង​អប់រំ យុវជន និង​កីឡា ឯកអគ្គរដ្ឋទូត​សហរដ្ឋ​អាមេរិក​ប្រចាំ​នៅ​ព្រះរាជាណាចក្រ​កម្ពុជា និង​តំណាង​កម្មវិធី​ស្បៀងអាហារ​ពិភពលោក (WFP) បាន​អញ្ជើញ​ចូលរួម​ប្រារព្ធ​នូវ​ការពង្រីក​កម្មវិធី​ជាតិ​ផ្តល់​ស្បៀងអាហារ​តាម​សាលារៀន និង​ពិធី​ផ្ទេរ​ជា​ផ្លូវការ​នូវ​សាលារៀន​ដែល​អនុវត្ត​កម្មវិធី​នេះ​ចំនួន​៨៥​បន្ថែមទៀត ពី​កម្មវិធី​ស្បៀងអាហារ​ពិភពលោក​ជូន​ដល់​រាជរដ្ឋាភិបាល​។​

​កម្មវិធី​ផ្តល់​ស្បៀងអាហារ​តាម​សាលារៀន​ផ្តល់​អាហារ​មាន​ជីវជាតិ​ដល់​សិស្ស​ដើម្បី​ទទួលទាន​នៅតាម​សាលារៀន​។​ការទទួល​ទាន​អាហារ​នៅ​សាលា​រៀនមាន​សារសំខាន់​ណាស់ ដោយបាន​រួមចំណែក​ដ​ល់​ការអប់រំ​តាមរយៈ​ការបង្កើន​ការចុះឈ្មោះ​ចូលរៀន វត្តមាន ការយកចិត្តទុកដាក់ និង​ភាពរហ័សរហួន​របស់​សិស្ស​នៅក្នុង​ថ្នាក់រៀន​។​

​កម្មវិធី​នេះ​ផ្តល់នូវ​របប​អាហារ​មាន​ជីវជាតិ​ដែល​ជួយ​រួមចំណែក​ឱ្យ​កុមារ​មាន​សុខ​ភាពល្អ​និង​ដើរតួ​ក្នុងការ​លើកកម្ពស់​ដោយ​ប្រយោល​នូវ​ប្រាក់ចំណូល​របស់​ក្រុមគ្រួសារ​ដែល​ងាយ​រងគ្រោះ​បំផុត​ផងដែរ​។​ក្រៅពីនេះ​កម្មវិធី​នេះ​ក៏បាន​រួមចំណែក​ផងដែរ​ក្នុង​ការជំរុញ​សេដ្ឋកិច្ច​តាម​មូលដ្ឋាន​តាមរយៈ​ការដាំដុះ​និង​ទិញដូរ​កសិផល​នៅក្នុង​សហគមន៍​។​

​នៅ​កម្ពុជា កម្មវិធី​ផ្តល់​ស្បៀងអាហារ​តាម​សាលារៀន​ផ្តល់​អត្ថប្រយោជន៍​ដល់​សិស្ស​ថ្នាក់​ម​ត្តេ​យ្យ និង​បឋមសិក្សា​ចំនួន ២៨០.០០០​នាក់ នៅក្នុង​សាលារៀន​ចំនួន ១.១១៣ នៅក្នុង​ខេត្ត​ចំនួន​១០​។ បច្ចុប្បន្ន រាជរដ្ឋាភិបាល​កម្ពុជា​គឺជា​អ្នកផ្ដល់​មូលនិធិ និង​ចាត់ចែង​កម្មវិធី​នៅតាម​សាលា​ចំនួន​២៩០ (២៦%) និង​បាន​បែងចែក​ថវិកា​ចំនួន​២.៩​លាន​ដុល្លារ​សម្រាប់​កម្មវិធី​នៅក្នុង​ឆ្នាំនេះ​។​

​រាជរដ្ឋាភិបាល​កម្ពុជា សហការ​ជាមួយ​ម្ចាស់ជំនួយ​ដទៃទៀត បាន​ចូលរួមចំណែក​ផ្ដល់​មូលនិធិ​ដល់​កម្មវិធី​ស្បៀងអាហារ​ពិភពលោក សម្រាប់​ដំណើរការ​កម្មវិធី​នៅតាម​សាលារៀន​ដែល​នៅ​សេសសល់ ដោយបាន​ផ្ដល់​វិភាគទាន​សរុប​ចំនួន ២៤​លាន​ដុល្លារ​អាមេរិក ចាប់តាំងពី​ឆ្នាំ​២០០៧​។​

​លោក ហង់ ជួនណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា មានប្រសាសន៍ថា​៖ “​កម្មវិធី​ប្រគល់ជូន​នេះ​គឺជា​ព្រឹត្តិការណ៍​ដ៏​សំខាន់​មួយ​សម្រាប់​កម្មវិធី​ផ្តល់​ស្បៀងអាហារ​តាម​សាលារៀន​នៅ​កម្ពុជា​។ វា​បង្ហាញ​នូវ​ការប្ដេជ្ញាចិត្ត​របស់​រាជ​រដ្ឋាភិបាល ក្នុងការ​ពង្រីក​កម្មវិធី​នេះ​ជា​បណ្តើរៗ ដោយ​ទទួលស្គាល់​ពី​ឥទ្ធិពល​ជា​វិជ្ជមាន​របស់​កម្មវិធី​នេះ​ទៅលើ​ការអប់រំ អាហារូបត្ថម្ភ និង​កិច្ច​គាំពារ​សង្គម​”​។​

​លោក​រដ្ឋមន្ត្រី​បាន​បន្ថែមថា​៖ រាជរដ្ឋាភិបាល​មាន​មោទនភាព​ដែល​បាន​ចូលរួម​ជាមួយ​បណ្ដាញ​សកល​នៃ​កម្មវិធី​ផ្ដល់​ស្បៀងអាហារ​តាម​សាលារៀន កាលពី​ខែសីហា ឆ្នាំ​២០២១​និង​បាន​ទទួលស្គាល់ថា​ការផ្តល់​អាហារ​តាម​សាលារៀន​កាន់តែ​មាន​សារៈសំខាន់​ជាពិសេស​ក្នុង​ការជួយ​ទប់ទល់​ទៅនឹង​ផលប៉ះពាល់​ដែល​បង្កដោយ​ជំងឺ​រាតត្បាត​ទៅលើ​ការអភិវឌ្ឍន៍​ធនធានមនុស្ស​។​ពិធី​នេះ​ក៏​ជាការ​បង្ហាញ​នូវ​សេចក្ដី​ថ្លែងអំណរគុណ​ដល់​រដ្ឋាភិបាល​សហរដ្ឋអាមេរិក ដែល​បាន​គាំទ្រ​ដល់​កម្មវិធី​ផ្តល់​ស្បៀងអាហារ​តាម​សាលារៀន​នៅ​កម្ពុជា តាមរយៈ​កម្មវិធី Mc Govern-Dole របស់ខ្លួន​។ នៅក្នុង​សាលាបឋមសិក្សា​ដូន​ឪ ក្នុង​ខេត្តសៀមរាប ដែលជា​សាលា​មួយ​ក្នុងចំណោម​សាលា​ដែល​ត្រូវ​ប្រគល់ជូន គណៈប្រតិភូ​បាន​ទស្សនា​និង​រីករាយ​ជាមួយនឹង​ការតាំងពិព័រណ៍​រូបថត​ដែល​បង្ហាញ​ពី​ប្រវត្តិ​នៃ​ការគាំទ្រ របស់​រដ្ឋាភិបាល​សហ​រដ្ឋ​អាមេរិក​ចំពោះ​កម្មវិធី​ផ្ដល់​ស្បៀងអាហារ​តាម​សាលារៀន​នៅ​កម្ពុជា និង​បានធ្វើ​ទស្សនកិច្ច​តាម​ផ្ទះបាយ និង​សាល​ទទួលទាន​អាហារ ដែល​សាងសង់ឡើង​ដោយមាន​ការគាំទ្រ​ពី​សហរដ្ឋអាមេរិក​។​

​លោកស្រី គ្លែ​រ កូ​ណាន់ តំណាង​កម្មវិធី​ស្បៀងអាហារ​ពិភពលោក​បានលើកឡើង​ថា “​ការគាំទ្រ​សប្បុរស​ពី​
​រដ្ឋាភិបាល​សហរដ្ឋអាមេរិក ដែលមាន​ទឹកប្រាក់​សរុប​ជាង​៨៤​លាន​ដុល្លារ ចាប់តាំងពី​ឆ្នាំ​២០២១ បានអនុញ្ញាត​ឱ្យ​កុមារ​កម្ពុជា​មកពី​ក្រុមគ្រួសារ​ក្រីក្រ​ទទួលបាន​អាហារ​ពេលព្រឹក​ដែលមាន​ជីវជាតិ និង​បាន​រួមចំណែក​លើកកម្ពស់​ការអប់រំ និង​អាហារូបត្ថម្ភ​របស់​ពួកគេ​។​” លោកស្រី​បានបញ្ជាក់​បន្ថែមថា “​អ្វី​ដែលជា​ចំណុច​សំខាន់បំផុត​នោះ​គឺ វា​ជា​មូលដ្ឋានគ្រឹះ​សម្រាប់​កម្មវិធី​ជាតិ ដោយ​ជួយ​អភិវឌ្ឍ​សមត្ថភាព​ជាតិ​ក្នុងការ​ចាត់ចែង​កម្មវិធី និង​ការកសាង​ហេដ្ឋារចនាសម្ព័ន្ធ​សម្រាប់​ទទួលទាន​អាហារ ទឹកស្អាត ក៏ដូចជា​អនាម័យ នៅក្នុង​សាលារៀន​ទូទាំងប្រទេស​។​”

​លោក Patrick W. Murphy ឯកអគ្គរដ្ឋទូត​សហរដ្ឋអាមេរិក​ប្រចាំ​ព្រះរាជាណាចក្រ​កម្ពុជា បានបង្ហាញ​នូវ​សេចក្តីសោមនស្ស​រីករាយ ដោយ​បានឃើញ​លទ្ធផល​នៃ​ការគាំទ្រ​កន្លងមក​របស់​សហរ​ដ្ឋ​អាមេរិក​សម្រាប់​អាហារូបត្ថម្ភ​តាម​សាលារៀន​នៅ​កម្ពុជា​។​

​លោក​មានប្រសាសន៍ថា «​ការផ្ដល់​អាហារ​ប្រកបដោយ​គុណភាព​តាម​សាលា​រៀនមាន​សារៈសំខាន់​ណាស់​សម្រាប់​សិស្ស និង​ក្រុមគ្រួសារ​របស់​ពួកគេ ហើយ​នេះ​គឺជា​សកម្មភាព​ជាទី​រី​រាយ​និង​សាទរ​ដែល​ក្រសួង​អប់រំ​ទទួលយក​កម្មវិធី​នេះ និង​ពង្រីក​នៅតាម​សាលារៀន​ទូទាំងប្រទេស​។​”​