ដោយ​៖​សុវណ្ណ​កុម្ភៈ​/​ភ្នំពេញ​៖ ពេលនេះ មាន​ប្រទេស​ចំនួន​ពីរ ហើយ​រួមមាន  ហ្វីលីពីន និង​ម៉ាឡេស៊ី​ដែល​បានប្រកាស​ពី​ចំនួន​អត្ត​ព​លិ​ក​របស់ខ្លួន​ជា​ផ្លូវការ​ក្នុងការ​ចូលរួម​ប្រកួត​ព្រឹត្តិការណ៍​កីឡា​អាស៊ីអាគ្នេយ៍ លើក​ទី​៣១ ឆ្នាំ​២០២២ នៅ​ប្រទេស​វៀតណាម (The 31st Southeast Asian Games) ។​

​ពេលនេះ​ម្ចាស់ផ្ទះ​វៀតណាម​បាន​បញ្ជាក់ថា ​មាន​អត្ត​ព​លិ​ក​ប្រមាណ​៧,០៣៧​នាក់​ត្រូវបាន​ចុះឈ្មោះ​ក្នុង​បញ្ជី​បឋម ពី​ប្រទេស​ចំនួន ១១​ក្នុង​តំបន់ ជាក់ស្តែង​វៀតណាម​ខ្លួនឯង​ផ្ទាល់ រំពឹងថា នឹងមាន​អត្ត​ព​លិ​ក​រហូតដល់ ១,១០៤​នាក់​។ ក្រៅពីនេះ ប្រទេស​ចំនួន ១០​ផ្សេងទៀត មានការ​ចុះឈ្មោះ​បឋម រួមមាន ព្រុយណេ (​អត្ត​ព​លិ​ក ៤១​នាក់​) កម្ពុជា (​អត្ត​ព​លិ​ក ៤៩៤​នាក់​) ឡាវ (៣៦៣​នាក់​) ឥណ្ឌូណេស៊ី (​អត្ត​ព​លិ​ក ១,០០១​នាក់​) ម៉ាឡេស៊ី (​អត្ត​ព​លិ​ក ៨១៥​នាក់​) មី​យ៉ាន់​ម៉ា (​អត្ត​ព​លិ​ក ៧៥៤​នាក់​) ហ្វីលីពីន (​អត្ត​ព​លិ​ក ៦០៣​នាក់​) ថៃ (​អត្ត​ព​លិ​ក ១,០៣៦​នាក់​) ទី​ម័​រ​ខាងកើត (​អត្ត​ព​លិ​ក ៥៤​នាក់​) និង​សិង្ហ​បុរី (​អត្ត​ព​លិ​ក ៧០៦​នាក់​)​។ មកទល់ពេលនេះ មានតែ ២​ប្រទេស​ប៉ុណ្ណោះ​ដែល​បានប្រកាស​ចំនួន​អត្ត​ព​លិ​ក​ជា​ផ្លូវការ​។​

​ហ្វីលីពីន​ត្រូវបាន​ដឹងថា​បានប្រកាស​ចំនួន​អត្ត​ព​លិ​ក​ជា​ផ្លូវការ​មុនគេ​។​ នេះ​បើតាម​ការ​បញ្ជាក់​នៅលើ​​គេហទំព័រ​​ផ្លូវការ​របស់​គណៈកម្មាធិកា​រ​ជាតិ​អូឡាំពិក​ហ្វីលីពីន​ដែល​នឹង​បញ្ជូន​អត្ត​ព​លិ​ក ចំនួន ៦៥៦​នាក់ លើ​ប្រភេទ​កីឡា​ចំនួន​៣៩ ក្នុងចំណោម ៤០​ប្រភេទ​កីឡា​។ ចំនួន​នេះ​គឺមាន​ការថយចុះ​ស្ទើរ​ពាក់កណ្ដាល​បើ​ធៀប​ទៅនឹង​ស៊ី​ហ្គេម​២០១៩​ដែល​ហ្វីលីពីន​ធ្វើជា​ម្ចាស់ផ្ទះ​។​


​ក្នុង​ព្រឹត្តិការណ៍​ស៊ី​ហ្គេម លើក​ទី​៣០ នៅ​ទីក្រុង​ម៉ានីល ហ្វីលីពីន​មាន​កីឡាករ​-​កីឡាការិនី ចំនួន ១,១១៥​នាក់​ចូលរួម និង​ដណ្តើមបាន​មេដាយ​សរុប​ចំនួន ៣៨៧​គ្រឿង ក្នុងនោះ​មេដាយមាស ១៤៩​គ្រឿង មេដាយប្រាក់ ១១៧​គ្រឿង មេដាយ​សំរឹទ្ធ ១២១​គ្រឿង និង​ឈរ​នៅ​កំពូល​តារាង​ជា​ប្រទេស​រក​មេដាយ​បាន​ច្រើនជាងគេ​។​
​ដោយឡែក​ម៉ាឡេស៊ី វិញ​ត្រូវបាន​គណៈកម្មាធិការ​ជាតិ​អូឡាំពិក​ម៉ាឡេស៊ី ប្រកាសថា មាន​អត្ត​ព​លិ​ក​ចំនួន ៦១២​នាក់​ចូលរួម​ស៊ី​ហ្គេម នៅ​វៀតណាម លើ​ប្រភេទ​កីឡា​ចំនួន​៣៧ ក្នុងចំណោម ៤០​ប្រភេទ​កីឡា​។​

​ព្រឹត្តិការណ៍​កីឡា​អាស៊ីអាគ្នេយ៍ លើក​ទី​៣១ ឆ្នាំ​២០២២ នៅ​ប្រទេស​វៀតណាម គ្រោង​នឹងធ្វើ​ពិធី​បើក​ប្រកួត​ពីថ្ងៃ​ទី​១២ ដល់​ថ្ងៃទី​២៣ ខែឧសភា ឆ្នាំ​២០២២ ដោយមាន ៤០​ប្រភេទ​កីឡា​ដាក់​ឲ្យ​ប្រកួត ស្មើនឹង ៥២៦​វិញ្ញាសា​៕​