ដោយៈ​សុវណ្ណ​កុម្ភៈ​/​ភ្នំពេញ​៖​លោកនាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ ដែលជា​ប្រមុខ​សហព័ន្ធ​កីឡាវាយកូនឃ្លីលើតុ​កម្ពុជា​បាន​សន្យា​ផ្ដល់​រង្វាន់​ធំ​ដល់​កីឡាករ កីឡាការិនី​ដែល​ក​ឈ្នះ​ក្នុង​ព្រឹត្តិការណ៍​ស៊ី​ហ្គេម​លើក​ទី​៣១​នៅ​ប្រទេស​វៀតណាម​នា​ខែឧសភា​ខាងមុខនេះ​។​

រូបថតៈលោកនាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ ដែលជា​ប្រមុខ​សហព័ន្ធ​កីឡាវាយកូនឃ្លីលើតុ​កម្ពុជា​

លោកសន្យាថា​សម្រាប់​វិញ្ញាសា​ប្រកួត​ឯកត្តជន​បើ​ឈ្នះ​បាន​មួយ​ប្រកួត​នឹងមាន​រង្វាន់​លើកទឹកចិត្ត​ចំនួន​២០០​ដុល្លារ​បើ​ឈ្នះ​បាន​ពីរ​ប្រកួត​រង្វាន់​នឹង​កើន​ឡើងដល់​៤០០​ដុល្លារ​គឺ​ប្រាក់រង្វាន់​នឹងត្រូវ​គុណ​ឡើ់ង​ទៅតាម​ជ័យជំនះ​រហូត ។​សម្រាប់​វិញ្ញាសា​ប្រកួត​ជា​ក្រុម​បើ​ឈ្នះ​​បាន​មួយ​ប្រកួត​នឹង​បានទទួល​រង្វាន់​១.០០០​ដុល្លារ តែបើ​ឈ្នះ​បាន​ពីរ​ប្រកួត​រង្វាន់​នឹង​កើន​ដល់​៣.០០០​ដុល្លារ ។​ក្នុងករណី​បន្ត​ឈ្នះ​ទៀត​នោះ​រង្វាន់​នឹង​គុណទ្វេ​ដង​​​តែបើ​ប្រជែង​បាន​មេដាយមាស​វិញ​នោះ​នឹង​បានទទួល​រង្វាន់​ចំនួន​១០.០០០​ដុល្លារ​តែម្ដង ។

​ប្រធាន​សហព័ន្ធ​កីឡាវាយកូនឃ្លីលើតុ​រូបនេះ​ក៏ដូចជា​សមាជិក​ប្រតិបត្តិ​កំពុងតែ​ផ្ដល់នូវ​ការលើកទឹកចិត្ត​ដល់​កីឡាករ កីឡាការិនី​ដើម្បី​កសាង​នូវ​កំណត់ត្រា​ថ្មី​មួយ​ក្នុង​ស៊ី​ហ្គេម​លើក​ទី​៣១​នៅ​ប្រទេស​វៀតណាម​មុននឹង​ឆ្ពោះ​មកដល់​ស៊ី​ហ្គេម​ឆ្នាំ​២០២៣​នៅ​កម្ពុជា ។​

ពេលនេះ​សហព័ន្ធ​បានស្នើ និង ឯកភាពគ្នា​បង្កើត​នូវ​មូលនិធិ​ស្ម័គ្រចិត្ត​មួយ​ដោយ​មួយខែៗ​ទទួលបាន​ប្រាក់ឧបត្ថម្ភ​ចំនួន​៣.០០០សម្រាប់​ប្រើប្រាស់​ក្នុង​ដំណើរការ​អភិវឌ្ឍន៍រ​បស់​ខ្លួន​ឆ្ពោះទៅរក​កំណត់ត្រា​ជា​ប្រវត្តិសាស្ត្រ​ថ្មី​មួយ​ក្នុង​ថា​នៈ​ដែល​កម្ពុជា​ធ្វើជា​ម្ចាស់ផ្ទះ​នា​ឆ្នាំ​២០២៣ ។​

រូបថតៈលោក​ស៊ុន សុទ្ធា​រិ​ទ្ធ​ អគ្គលេខាធិការ​របស់​ស​ហ​ព័ន្ធ​សហព័ន្ធ​

លោក​ស៊ុន សុទ្ធា​រិ​ទ្ធ​ អគ្គលេខាធិការ​របស់​ស​ហ​ព័ន្ធ​សហព័ន្ធ​នឹង​អញ្ជើញ​គ្រូបង្វឹក​ពី​សាធារណ​រដ្ឋ​កូ​រ៉េ​មួយរូប​មកជួយ​បង្វឹក​​ដល់​កីឡាករ កីឡាការិនី​វាយ​កូនឃ្លី​លើ​តុ​កម្ពុជា​។​គ្រូបង្វឹក​ជនជាតិ​កូរ៉េរូបនោះ​មាន​​គុណ​វុ​ឌ្ឍ​ន៍​កម្រិត​ខ្ពស់​ដែល​អាចជួយ​ដល់​ក្រុម​​ជម្រើសជាតិ​កម្ពុជា​ឪ្យ​កាន់តែ​រឹងមាំ និង​សម្រួច​បច្ចេកទេស​បាន​លឿន ។​

លោក​អគ្គលេខាធិការ​បន្ថែម​ថា​ ក្នុង​សហព័ន្ធ​បាន​ឯកភាពគ្នា​លើ​រឿងនេះ​ហើយ​អ្វីៗ​ គឺ​នៅ​រង់ចាំតែ​ការសម្រេច​​ជាគោលការណ៍​ពី​​សម្ដេច​ពិជ័យ​សេនា​ទៀ បាញ់​ដែលជា​ប្រធាន​គណៈកម្មាធិការ​ជាតិ​រៀបចំ​ស៊ី​ហ្គេម​ឆ្នាំ​២០២៣(CAMSOC) តែប៉ុណ្ណោះ ។​ក្រោយពី​សម្ដេច​ពិជ័យ​​សេនា​ទៀ បាញ់​ឯកភាព​ហើយ​នោះ​សហព័ន្ធ​នឹងធ្វើ​ការងារ​នេះ​ឲ្យ​បាន​លឿន​បំផុត​ជាមួយ​សហព័ន្ធ​កីឡាវាយកូនឃ្លីលើតុ​រប​ស់​ប្រទេស​​កូ​រ៉េខាងត្បូង​ដើម្បី​​សម្របសម្រួល​ក្នុងការ​អញ្ជើញ​គ្រូ​របស់គេ​មក ៕​សរន