​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បុរស​ជនជាតិ​អាម៉េរិក​ម្នាក់​បាន​ស្លាប់​នៅក្នុង​ការវាយប្រហា​ររ​បស់​រុស្ស៊ី​លើ​ទីក្រុង​ឆែរ​នី​ហ៊ី​វ (Chernihiv) ភាគ​ខាងជើង​ប្រទេស​អ៊ុយ​ក្រែន​កន្លែង​ដែល​គាត់​​កំពុង​ស្វែងរក​ការព្យាបាល​សម្រាប់​ដៃគូ​របស់​គាត់​។ ការស្លាប់​របស់​លោក ជី​ម ហ៊ីល (Jim Hill) ត្រូវបាន​រាយការណ៍​កា​លពី​ថ្ងៃ​ព្រហស្បតិ៍​ទី​១៧​មីនា​ដោយ​ប្អូនស្រី​របស់​គាត់​។​

​ប្អូនស្រី​របស់​គាត់​ឈ្មោះ ឆឺ​រីល ហ៊ីល ហ្គ័​រដុន (Cheryl Hill Gordon) បាន​សរសេរ​នៅលើ Facebook ថា “​បងប្រុស​របស់​ខ្ញុំ ជី​មមី ហ៊ីល​ត្រូវបាន​សម្លាប់​កាល​ពី​ម្សិលមិញ​នៅ​ឆែរ​នី​ហ៊ី​វ​ប្រទេស​​អ៊ុ​យក្រែន​។ សាកសព​របស់គាត់​ត្រូវបាន​រកឃើញ​នៅ​តាម​ផ្លូវ​ដោយ​ប៉ូលិស​ក្នុង​មូលដ្ឋាន​”​។​

​មន្ត្រី​អ៊ុយ​ក្រែន​បាន​រាយការណ៍​ថា​មនុស្ស ១០ នាក់​ត្រូវបាន​សម្លាប់​កាលពី​ថ្ងៃ​ពុធ​នៅក្នុង​ទីក្រុង​ឆែរ​នី​ហ៊ី​វ ខណៈ​កំពុង​ឈរ​តម្រង់​ជួរ​រង់ចាំ​ទិញ​នំប៉័ង​។​

​ប៉ូលិស​ក្រុង​ឆែរ​នី​ហ៊ី​វ​និង​ក្រសួងការបរទេស​អាម៉េរិក​បាន​បញ្ជាក់​ពី​ការស្លាប់​របស់​ជនជាតិ​អាមេរិក​ម្នាក់ ប៉ុន្តែ​មិន​បាន​កំណត់​អត្តសញ្ញាណ​គាត់​ទេ​។ ​លោក​ហ៊ីល​គឺ​ជា​ពលរដ្ឋ​អាម៉េរិក​ទី​ពីរ​ដែល​ត្រូវបាន​សម្លាប់​នៅ​ក្នុង​ជម្លោះ​បន្ទាប់ពី​ការសម្លាប់​អ្នកកាសែត​និង​ផលិតករ​ភាពយន្ត​លោក ប្រេន រីណូ​ដ (Brent Renaud) កាលពី​សប្តាហ៍​មុន​។​

​នៅក្នុង​សារ​បង្ហោះ​ពោរពេញ​ដោយ​ការក្តៅក្រហាយ​នៅលើ Facebook ក្នុង​ប៉ុន្មាន​សប្តាហ៍​មុន​ពេល​គាត់​ស្លាប់ លោក​ហ៊ីល​បាន​ពណ៌នា​អំពី “​ការទម្លាក់​គ្រាប់បែក​មិន​រើសមុខ​”​នៅក្នុង​ទីក្រុង​ដែល​ស្ថិត​​នៅក្រោម​ការឡោមព័ទ្ធ ហើយ​និយាយ​លេងសើច​ថា​ចង់​បន្លំ​ធ្វើ​ជា “​មនុស្ស​ឆ្កួត​” ប្រសិនបើ​ត្រូវបាន​ចាប់ខ្លួន​ដោយ​រុស្ស៊ី​។​

​នៅក្រោម​រូបថត​របស់​គាត់ គាត់​បាន​សរសេរ​នៅ​ថ្ងៃទី ៨ ខែ​មីនា​ថា “​ខ្ញុំ​មិន​បាន​កោរពុកមាត់ ១០ ថ្ងៃ​ហើយ​។​ខ្ញុំ​ពិតជា​ព្យាយាម​ឱ្យ​មើល​ទៅ​ចាស់​និង​ដូច​មនុស្ស​ឆ្កួត​តាម​ដែល​អាច​ធ្វើបាន​ក្នុងករណី​ដែល​​ពួកគេ​ចាប់​ខ្ញុំ​។ ខ្ញុំ​កំពុង​រៀន​បញ្ចេញ​សំឡេង​ជា​មនុស្ស​ឆ្កួត​”៕

​មន្ត្រី​អ៊ុយ​ក្រែន​បាន​រាយការណ៍​ថា​មនុស្ស ១០ នាក់​ត្រូវបាន​សម្លាប់​កាលពី​ថ្ងៃ​ពុធ​នៅក្នុង​ទីក្រុង​ឆឺ​នី​ហ៊ី​វ ខណៈ​កំពុង​ឈរ​តម្រង់​ជួរ​រង់ចាំ​ទិញ​នំប៉័ង​