​​ដោយៈ ទេ​ពក​ង្រី / កំពង់ឆ្នាំងៈ នៅ​ថ្ងៃទី​១៧ ខែមីនា ឆ្នាំ​២០២២ លោក ស្រ៊ន សំឫទ្ធី អភិបាលរង នៃ​គណៈ​អភិបាលខេត្ត​កំពង់ឆ្នាំង បាន​អញ្ជើញ​ជា​អធិបតីភាព ក្នុង​ពិធី​បើក​វគ្គ បណ្តុះបណ្តាល​គ្រូ​បង្គោល ថ្នាក់​ខេត្ត ក្រុង ស្រុក ស្តីពី​ការអនុវត្ត​ការងារ គណនេយ្យភាព​សង្គម ដែល​វគ្គ​នេះ​រៀ​ចំ​ដោយ រដ្ឋបាលខេត្ត​កំពង់ឆ្នាំង សហការ​សម្របសម្រួល ជាមួយ​ក្រុមការងារ គណនេយ្យភាព​សង្គម​ថ្នាក់ជាតិ ។​

​មានប្រសាសន៍​បើក ក្នុងឱកាស​នោះ លោក ស្រ៊ន សំឫទ្ធី បាន​និយាយថាៈ វគ្គ​បណ្ដុះបណ្ដាល នេះ មាន​គោលបំណង ផ្តល់​ចំណេះដឹង​មូលដ្ឋាន អំពី​ផែនការ​យុទ្ធសាស្ត្រ ស្តីពី​ការងារ គណនេយ្យភាព​សង្គម សម្រាប់​ការអភិវឌ្ឍ តាមបែប​ប្រជាធិបតេយ្យ នៅ​ថ្នាក់ក្រោម​ជាតិ ដល់​គ្រូ​បង្គោល ថ្នាក់​ខេត្ត និង​ថ្នាក់ក្រុង ស្រុក ដើម្បី​មានលទ្ធភាព​បណ្តុះបណ្តាល​បន្ត ទៅដល់ អង្គភាព​ផ្តល់​សេវា​នានា ដោយ​ផ្តោត​ការយកចិត្តទុកដាក់ ទៅលើ​ការពង្រឹង​ភាពងាយស្រួល ទទួលបាន​ព័ត៌មាន​នានា និង​ព័ត៌មាន​ថវិកា ការត្រួតពិនិត្យ​តាមដាន​ដោយ​ប្រជាពលរដ្ឋ ការសម្របសម្រួល និង​ការពង្រឹង​សមត្ថភាព និង​ការប្រមូល​មេរៀន​បទពិសោធន៍ និង​ការត្រួតពិនិត្យ​តាមដាន​។​

​អភិបាលរង​ខេត្ត ក៏បាន​មានប្រសាសន៍​បន្តថាៈ វគ្គ​បណ្តុះបណ្តាល រយៈពេល ១ ថ្ងៃនេះ មាន​សារៈសំខាន់​ណាស់ និង​ផ្តល់អោយ​យើង យល់ដឹង​យ៉ាងច្បាស់ នូវ​អត្ថន័យ នៃ​ការអនុវត្ត​ការងារ គណនេយ្យភាព ព្រមទាំង​លើកទឹកចិត្ត ឲ្យ​មានការ​ចូលរួម គ្រប់ភាគី​ពាក់ព័ន្ធ រួមមាន​វិស័យ​សាធារណៈ អង្គការ​ជាតិ អន្តរជាតិ សង្គម​ស៊ីវិល វិស័យ​ឯកជន និង​ប្រជាពលរដ្ឋ ដើម្បី​ឲ្យ​មានការ​ផ្លាស់ប្តូរ​ជា​វិជ្ជមាន ក្នុង​សកម្មភាព​អភិវឌ្ឍន៍​របស់​ស្ថាប័ន អង្គភាព​នីមួយៗ ប្រកបដោយ​ប្រសិទ្ធភាព និង​ទទួលខុសត្រូវ​ខ្ពស់ ។​

​លោក ស្រ៊ន សំឫទ្ធី បាន​មានប្រសាសន៍​ផ្តាំផ្ញើ ទៅ​គ្រូ​បង្គោល​ទាំងអស់ សូម​យកចិត្តទុកដាក់ តាមដាន​ស្តាប់ នូវ​មេរៀន​នីមួយៗ ស្តីពី​ការអនុវត្ត​គណនេយ្យភាព​សង្គម ដើម្បី​ជា​ទុនដ៍​សំខាន់ សម្រាប់​យកទៅ​បង្រៀន​បន្ត ដល់​រដ្ឋបាល ឃុំ សង្កាត់ យកទៅអនុវត្ត ទទួលបាន​ជោគជ័យ​៕/V​