ដោយៈ តាកែវ / តាកែវៈ លោក ធូ សុភាព នាយក​វិទ្យាស្ថាន​ពហុបច្ចេកទេស ភូមិភាគ​តេ​ជោ សែន តាកែវ បានលើកឡើង​ថាៈ ការសិក្សា​ជំនាញ​បច្ចេកទេស ពិត អាច​នឹង​មានឱកាស ការងារ​ច្រើន និង​ងាយ​រកលុយ ជាង​ការសិក្សា​ទ្រឹស្តី ខណៈ​ក្រោយ​បញ្ចប់​ការសិក្សា​ជំនាញ ការអនុវត្ត​ផ្ទាល់ បាន​ដោយ​ជោគជ័យ និង​មានការ​ទទួលស្គាល់ ដោយ​វិទ្យាស្ថាន​។​

​លោក ធូ សុភាព បានលើកឡើង​បែបនេះ នៅក្នុង​ឱកាស​អបអរ​សាទរ គំរប់​ខួប ៨ ឆ្នាំ នៃ វិទ្យាស្ថាន​ពហុបច្ចេកទេស​តេ​ជោ សែន តាកែវ និង​បើក​បវេសនកាល ឆ្នាំ​សិក្សា​ថ្មី ឆ្នាំ​២០២២ និង​២០២៣ កាលពី​ថ្ងៃទី​១៧ ខែ​មិនា ឆ្នាំ​២០២២ ។​

​ថ្លែង​នៅ​ចំពោះមុខ​ក្រុមនិស្សិត ដែល​បាន​ចូលរួម យ៉ាងច្រើន​កុះករ នៅក្នុង​ពិធី នេះ​លោក ធូ សុភាព បាន​បន្តថាៈ ជំនាញ​បច្ចេកទេស​នេះ វា​ពិត​ជាមាន​តម្រូវការ ទីផ្សារ​ខ្ពស់ និង​ទទួលបាន ប្រាក់ចំណូល ឬ​ទទួលបាន​ប្រាក់ខែ បាន​ខ្ពស់ ជាង​ជំនាញ​ផ្សេងៗ ហើយ​ប្អូនៗ​ដែលជា​និស្សិត កំពុងតែ​សិក្សា ចាប់យក ជំនាញ​បច្ចេកទេស ដូចជា អគ្គិសនី ជួសជុល​ឡាន សំណង់ ជួសជុល ម៉ាស៊ីនត្រជាក់ បច្ចេកវិទ្យា​កុំ​ព្យួ​ទ័​រ ឬ​ជំនាញ​បច្ចេកទេស ផ្សេងទៀត សូម​ខិតខំ​យកចិត្តទុកដាក់ ប្រឹងប្រែង​រៀនសូត្រ ឱ្យបាន​ពូកែ ដើម្បី​អនាគត របស់​ប្អូនៗ និង​គ្រួសារ មាន​ភាពល្អប្រសើរ ទៅ​ថ្ងៃ​ខាងមុខ​។​

​លោកនាយក បាន​បន្ថែមទៀតថាៈ ការខិតខំ​ប្រែង​ប្រែង​រៀនសូត្រ នៅ​សាលា វា​មិន​គ្រប់គ្រាន់ នោះទេ ប្អូនៗ ត្រូវតែ​ខិតខំ​សិក្សា នៅ​ខាងក្រៅ​ទៀត តាមរយៈ​ការសិក្សា ស្រាវជ្រាវ នៅតាម​បណ្ណាល័យ អី​ុ​ន​ធើ​ណេ​ត ជាដើម ដើម្បី​យកមក​បំពេញបន្ថែម និង​ជា​មូលដ្ឋានគ្រឹះ លើ​ការសិក្សា ឱ្យ​កាន់តែ ទូលំទូលាយ​ថែមទៀត ព្រោះ​សម័យ​បច្ចុប្បន្ននេះ ពិភពលោក​របស់ យើង កាន់តែ​ទំនើប និង​ប្រែប្រួល​ច្រើនណាស់ ប្រសិនបើ​យើង​មិន​ខិតខំ អភិវឌ្ឍន៍ ចំណេះ និង​បង្កើន​សមត្ថភាព​ទេ នោះ​យើង​ប្រាកដជា​ដើរ​មិនទាន់​សម័យ កាល​ថ្មី​របស់​ពិភពលោក​ទេ ។​

​ជាមួយគ្នានេះដែរ លោក ធូ សុភាព ក៏បាន​ក្រើនរំលឹក​ដល់​ប្អូនៗ ក្នុងនាម​ជា និស្សិត​ត្រូវតែមាន​ទម្លាប់ និង​អាកប្បកិរិយា​ល្អ ថ្លៃថ្នូរ ពិសេស​ត្រូវមាន​ទំនាក់ ទំនង​ល្អ ជាមួយ​មិត្ត​ភ័​ក្ត មាន​សីលធម៌​ល្អ និង​ចេះ​គោរព​ចាស់ទុំ លោកគ្រូ​អ្នកគ្រូ ព្រោះ​ប្រសិនបើ​ប្អូនៗ មាន​សីលធម៌ និង​អាកប្បកិរិយា​ល្អ​ថ្លៃថ្នូរ ហើយ​រៀន សូត្រ​បាន​ពូកែ​ទៀត នោះ​ប្អូនៗ​ទៅ​ដាក់ពាក្យ​ធ្វើការ នៅ​កន្លែង​ណា ក៏​កន្លែងធ្វើការ​ងារ​នោះ ជ្រើស​រើសយក​ប្អូន មុនគេ​ផងដែរ ៕/V​-PC