​ប្រែ​សម្រួល : កញ្ញា​ដា​លី​ស (BBC) ៖ វេបសាយ BBC News បាន​បង្ហាញ​អំពី​ប្រវត្តិ​នៃ​ប្រព័ន្ធ​មី​ស៊ី​លបាញ់​ពី​ដី​ទៅ​អាកាស S-300 របស់​រុស្ស៊ី​បន្សល់ទុក​ពី​សម័យ​សហភាពសូវៀត​ដែល​អាវុធ​ទាំង​នេះ​​ត្រូវបាន​ប្រគល់​ជូនប​ណ្តា​រដ្ឋ​សូ​វៀត​មួយចំនួន និង​រុស្ស៊ី​បាន​ផ្តល់​អោយ​រដ្ឋាភិបាល​របស់​ប្រធានាធិបតី​ស៊ី​រី លោក បា​សា អាល់​អាសាដ (Bashar al-Assad) ។​

​ប្រព័ន្ធ​មី​ស៊ី​ល S-300 គឺជា​ស៊េរី​នៃ​មី​ស៊ី​លបាញ់​ពី​ដី​ទៅ​អាកាស​រយៈ​ចម្ងាយ​ឆ្ងាយ​ដែល​មាន​សមត្ថភាព​ខ្ពស់​ដែល​ត្រូវបាន​ដាក់ពង្រាយ​ជា​លើកដំបូង​នៅក្នុង​សហភាពសូវៀត​ក្នុង​ឆ្នាំ ១៩៧៩ ហើយ​ក្រោយមក​ត្រូវបាន​កែលម្អ​ប្រសើរឡើង​ដោយ​កងកម្លាំងប្រដាប់អាវុធ​រុស្ស៊ី​។​

​ក្រៅពី​មាន​សមត្ថភាព​តម្រង់​គោលដៅ​លើ​យន្តហោះ អង្គភាព​ចល័ត​ពេញលេញ​នេះ​ក៏​មាន​សមត្ថភាព​បាញ់​កម្ទេច​មី​ស៊ីល​ផ្លោង​ផងដែរ​។​

​អ្នកជំនាញ​ជឿថា រុស្ស៊ី​ទំនងជា​ផ្តល់​ឱ្យ​ស៊ី​រី​នូវ​ប្រព័ន្ធ S-300PMU-2 ដែល​គេ​ស្គាល់​ផង​ដែរ​ដោយ​ឈ្មោះ​កូដ​ណា​តូ​ថា SA-20 ដែល​ត្រូវបាន​ណែនាំ​ជា​លើក​ដំបូង​ក្នុង​ឆ្នាំ ១៩៩៧​ហើយ​អាច​ប្រៀបធៀប​បាន​​ទៅ​នឹង​ប្រព័ន្ធ​ការពារ​ដែនអាកាស​និង​មី​ស៊ី​ល Patriot របស់​សហរដ្ឋ​អាម៉េរិក​។​

​រថយន្ត​ជើង​ទម្រ​បាញ់រ​បស់​រុស្ស៊ី​ត្រូវបាន​ផលិត​ដោយ​ក្រុមហ៊ុន​រដ្ឋ Almaz-Antei ដែល​កាលពី​ឆ្នាំមុន​បាន​ប្រកាសថា​ខ្លួន​កំពុង​បញ្ឈប់​ការផលិត​ប្រព័ន្ធ S-300​និង​បង្វែរ​ធនធាន​ទៅ​ផលិត​ប្រព័ន្ធ​​មី​ស៊ី​ល S-400 ដែល​ទំនើប​ជាង​។​

– តើ​ប្រព័ន្ធ​មី​ស៊ី​ល S-300PMU-2 ដំណើរការ​យ៉ាង​ដូចម្តេច​?

១. រ៉ា​ដា​ឃ្លាំ​មើល​រយៈ​ចម្ងាយ​ឆ្ងាយ​គឺ​តាមដាន​វត្ថុ​នានា​ក្នុង​ចម្ងាយ ៣០០ គីឡូម៉ែត្រ​និង​បញ្ជូន​ព័ត៌មាន​ទៅកាន់​រថយន្ត​ទីបញ្ជាការ ដែល​វាយតម្លៃ​គោលដៅ​សក្តានុពល​។​
២. គោលដៅ​មួយ​ត្រូវបាន​កំណត់​អត្តសញ្ញាណ ហើយ​រថយន្ត​ទីបញ្ជាការ​បញ្ជា​ឱ្យ​រ៉ា​ដា​ចូលរួម​ដើម្បី​បាញ់​មី​ស៊ី​ល​។​
៣. ទិន្នន័យ​សម្រាប់​បាញ់​មី​ស៊ី​ល​ត្រូវ​បាន​បញ្ជូន​ទៅ​កន្លែង​ល្អ​បំផុត​នៃ​រថយន្ត​ជើង​ទម្រ​បាញ់​ទាំង​ប្រាំមួយ​របស់​កងវរសេនាតូច ហើយ​វា​បញ្ចេញ​មី​ស៊ី​លពី​ដី​ទៅ​អាកាស​ចំនួន​ពីរ​គ្រាប់​។​
៤. រ៉ា​ដា​ចូលរួម​ជួយ​នាំ​ផ្លូវ​មី​ស៊ី​ល​ឆ្ពោះទៅ​រក​គោលដៅ​។ វា​អាច​ដឹកនាំ​បញ្ជា​មី​ស៊ី​ល​បាន​ដល់​ទៅ ១២ គ្រាប់​ក្នុងពេល​ដំណាលគ្នា ដោយ​អាច​បាញ់​ចំ​គោល ៦ ផ្សេង​គ្នា​ក្នុងពេល​តែមួយ​។​

​រថយន្ត ដែល​ប្រើ​ជា​ជើង​ទម្រ​បាញ់ បច្ចុប្បន្ន​ត្រូវបាន​ផលិត​នៅ​រោងចក្រ Minsk Wheel Tractor Plant (MZKT) ក្នុងប្រទេស​បេឡា​រូ​ស បើទោះបីជា​រុស្ស៊ី​ឥឡូវ​កំពុង​រើ​ផលិតកម្ម​ទៅ​ទីក្រុង​ប្រា​យ៉ានស៍ (Bryansk) ភាគ​ខាងលិច​រុស្ស៊ី​ក៏ដោយ​។​

– លក្ខណៈ​ពិសេស​ផ្សេងៗ​នៃ​ប្រព័ន្ធ S-300PMU

១. លក្ខណៈពិសេស ៖ រថយន្ត​ជើង​ទម្រ​បាញ់​នី​មួយៗ​មាន​ផ្ទុក​បំពង់​បាញ់​មី​ស៊ី​ល​ចំនួន ៤ (​ពីរ​មី​ស៊ី​ល​ក្នុង​មួយ​គោលដៅ​)​។ កងវរសេនាតូច​ពេញលេញ​មួយ​គឺ​មាន​រថយន្ត​ជើង​ទម្រ​បាញ់​ចំនួន ៦ គ្រឿង​ដែល​មាន​មី​ស៊ី​ល​សរុប​ចំនួន ២៤ គ្រាប់ បូក​រួម​ទាំង​រថយន្ត​បញ្ជា​និង​គ្រប់គ្រង និង​រថយន្ត​រ៉ា​ដា​ចាប់​សញ្ញា​រយៈ​ចម្ងាយ​ឆ្ងាយ​។​
២. មុខងារ​ពិសេស ៖ បាញ់​មី​ស៊ី​លពីរ​គ្រាប់​បញ្ឈរ​ឡើង​ទៅលើ​មេឃ​រយៈពេល ៣ វិនាទី ដោយ​ធ្វើឱ្យ​វា​អាច​បត់បែន​បាន​យ៉ាង​ល្អ​និង​បាញ់​ចំៗ​គោលដៅ​។​
៣. សមត្ថភាព ៖ មី​ស៊ី​ល​រុស្សី 48N6E គឺជា​មី​ស៊ី​ល​ស្តង់ដារ​ដែល​បាញ់​ចេញ​ពី​ប្រព័ន្ធ S-300PMU ។ ពួក​វា​មាន​រយៈ​ចម្ងាយ​ពី ៥-១៥០​គីឡូម៉ែត្រ​នៅ​រយៈកម្ពស់​អតិបរមា ២៧-៣០ គីឡូម៉ែត្រ​។​
៤. ពេលវេលា​ឆ្លើយតប ៖ រថយន្ត​ជើង​ទម្រ​ប្រើពេល ៥ នាទី​ដើម្បី​បាញ់​មី​ស៊ី​ល​កម្ទេច​គោលដៅ​៕

ប្រព័ន្ធ​មី​ស៊ី​ល S-300 របស់​រុស្ស៊ី