​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​ជឿថា ទាហាន​រុស្ស៊ី​បាន​ស្លាប់​ឬ​របួស​ទាហាន​រហូតដល់ ២៨.០០០ នាក់​ក្នុងអំឡុង​ការប្រយុទ្ធ​គ្នា​បី​សប្តាហ៍​ក្នុងប្រទេស​អ៊ុយ​ក្រែន​ខណៈ​ដែល​ការលុក​​លុយ​របស់​វ្ល៉ា​ឌី​មៀរ ពូ​ទីន ជាប់គាំង​គ្រប់​សមរភូមិ​ជួរ​មុខ​ទាំងអស់ ប៉ុន្តែ​ការបាញ់​ផ្លោង​លើ​ទីក្រុង​នានា​រួម​ទាំង​ទីក្រុង​គៀវ​នៅតែ​បន្ត​។​

​មន្ទីរ​បញ្ច​កោណ​បាន​ប៉ាន់ប្រមាណ​ថា យ៉ាងហោច​ណាស់​ទាហាន​រុស្ស៊ី ៧.០០០ នាក់​បាន​បាត់បង់​ជីវិត​នៅក្នុង​ការប្រយុទ្ធ​គ្នា​នេះ ខណៈ​ដែល​ទាហាន ១៤.០០០ ទៅ ២១.០០០ នាក់​ផ្សេងទៀត​បាន​រងរបួស ដែល​ស្មើនឹង​ជិត​មួយ​ភាគ​ប្រាំ​នៃ​ទាហាន​ប៉ាន់ស្មាន ១៥០.០០០ នាក់​ដែល​ពូ​ទីន​បាន​ប្រមូលផ្តុំ​នៅតាម​ព្រំដែន មុនពេល​ចេញ​បញ្ជា​ឱ្យ​វាយប្រហារ​កាលពី ២១ ថ្ងៃមុន​។​

​ចំនួន​ស្លាប់​ដ៏​គួរឱ្យភ្ញាក់ផ្អើល​នេះ​គឺ​ស្មើ​ប្រហែល​ពីរ​ដង​នៃ​ការបាត់បង់​ទាហាន​ណា​តូ​នៅក្នុង​ប្រទេស​អា​ហ្វ​ហ្គានី​ស្ថានក្នុង​ការប្រយុទ្ធ​គ្នា​រយៈពេល​ពីរ​ទសវត្ស​រ៍ហើយ​ប្រហែល​ស្មើ​ការស្លាប់​របស់​ទាហាន​អាម៉េរិក​​នៅក្នុង​សមរភូមិ​អាយ​វ៉ូ​ជី​ម៉ា (Iwo Jima) រយៈពេល ៣៦ ថ្ងៃ ដែល​ជា​ការ​ប៉ះទង្គិច​គ្នា​យ៉ាង​បង្ហូរឈាម​បំផុត​នៅ​តំបន់​ប៉ាស៊ីហ្វិក​ក្នុងអំឡុង​សង្គ្រាមលោកលើកទីពីរ​។ ​ការបាត់បង់​ឥឡូវនេះ​គឺ​ធ្ងន់ធ្ងរ​ណាស់​រហូតដល់​ថ្នាក់​ចារកម្ម​អាម៉េរិក​ជឿថា​អង្គភាព​រុស្ស៊ី​មួយចំនួន​មិន​អាច​បន្ត​ប្រយុទ្ធ​បានទេ​។​

​ចំនួន​ស្លាប់​នេះ​គឺ​ស្របគ្នា​ជាមួយនឹង​ការវាយតម្លៃ​ដោយ​ចារកម្ម​អង់គ្លេស ដែល​និយាយ​កាលពី​ថ្ងៃ​ព្រហស្បតិ៍​ទី​១៨​មីនា​ថា ការ​លុកលុយ​របស់​រុស្ស៊ី​បាន​ជាប់គាំង “​នៅ​គ្រប់​សមរភូមិ​ជួរ​មុខ​ទាំង​អស់​”​ដោយ​​មាន​វឌ្ឍនភាព​តិចតួច​នៅលើ​ដីគោក សមុទ្រ ឬ​ផ្លូវអាកាស ក្នុង​រយៈពេល ២៤ ម៉ោង​ចុងក្រោយ​នេះ ខណៈ​បន្ត “​ទទួលរង​ការខាតបង់​យ៉ាងធ្ងន់ធ្ងរ​”​។​

​ប៉ុន្តែ​ការបាញ់​ផ្លោង​លើ​ទីក្រុង​នានា​របស់​អ៊ុយ​ក្រែន​នៅតែ​បន្ត​កើតមាន​ជា​បន្តបន្ទាប់ ដោយ​ទីក្រុង​គៀវ​បាន​រង​ការវាយប្រហារ​ដោយ​មី​ស៊ី​ល​ជាច្រើន​កាលពី​ព្រឹក​ព្រលឹម​ថ្ងៃ​ព្រហស្បតិ៍​ដោយ​មី​ស៊ី​ល​មួយ​​ត្រូវ​បាន​បាញ់​ទម្លាក់ ប៉ុន្តែ​បំណែក​គ្រាប់​នៅតែ​វាយ​ចំ​ប្លុក​ផ្ទះល្វែង​កម្ពស់ ១៦ ជាន់ ដោយ​បាន​សម្លាប់​មនុស្ស​ម្នាក់ និង បង្ក​ឱ្យ​មាន​ការឆាបឆេះ បណ្តាលឱ្យ​មនុស្ស​រាប់​សិប​នាក់​រងរបួស​។​

​ទីក្រុង​ម៉ា​រី​វ​ប៉ូល ដែល​ត្រូវបាន​ឡោម​ព័ទ្ធ​ខ្លាំងជាងគេ​នៅ​ភាគខាងត្បូង​នៃ​ប្រទេស​អ៊ុ​យក្រែន ក៏​បាន​បន្ត​រង​ការបាញ់​ផ្លោង​យ៉ាងធ្ងន់ធ្ងរ​ផងដែរ ខណៈ​ក្រុម​មន្ត្រី​ទីក្រុង​បាន​ប៉ាន់ប្រមាណ​ថា​មនុស្ស​យ៉ាង​​ហោច​ណាស់ ២.៤០០ នាក់​ត្រូវបាន​សម្លាប់​នៅ​ទីនោះ ទោះបីជា​ទីប្រឹក្សា​អភិបាលក្រុង លោក ប៉េ​ត្រូ អាន់ឌ្រា​ស​ឆេន​កូ (Petro Andriushchenko)​និយាយ​ថា​ចំនួន​អ្នក​ស្លាប់​ពិតប្រាកដ​អាច​​កើនឡើង​ដល់ ២០.០០០ ពេលណា​ដែល​តំបន់​កាត់ផ្តាច់​អាច​ចូល​ទៅ​ដល់​ដើម្បី​ស្វែងរក​ជនរងគ្រោះ​ក៏ដោយ​៕

​ចារកម្ម​អាម៉េរិក​ជឿ​ថា​រុស្ស៊ី​បាត់បង់​ទាហាន ២៨.០០០ នាក់​នៅ​អ៊ុយ​ក្រែន​ក្នុងរយៈពេល​២១​ថ្ងៃ​មកនេះ​