ដោយៈ ដេប៉ូ / ភ្នំពេញៈ ការពង្រឹង​គុណភាព​អប់រំ​វិស្វកម្ម គឺជា​បង្គោល​អាទិភាព​មួយ ក្នុង​ផែនការ​យុទ្ធសាស្ត្រ​អភិវឌ្ឍន៍​ជាតិ របស់​រាជរដ្ឋាភិបាល​កម្ពុជា​។ នេះ​ជាការ​ថ្លែង​ពី​សំណាក់ លោក អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ​។​

​បញ្ជាក់​ក្នុង​ពិធី​បិទ​អង្គ​មហាសន្និបាត បូកសរុប​លទ្ធផល​ការងារ រយៈពេល ៥​ឆ្នាំ អាណត្តិ​ទី​២ និង​ផែនការ​អនុវត្ត​បន្ត អាណត្តិ​ទី​៣ ឆ្នាំ​២០២២-២០២៧ របស់​គណៈ​វិស្វករ​កម្ពុជា លោក អ៉ិ​ត សំហេង រដ្ឋមន្ត្រីក្រសួង​ការងារ និង​ជា​ប្រធាន​ក្រុមប្រឹក្សា​គណៈ​វិស្វករ​កម្ពុជា តំណាង​ដ៏​ខ្ពង់ខ្ពស់ សម្ដេច​តេ​ជោ នាយករដ្ឋមន្ត្រី​នៃ​កម្ពុជា និង​ជា​ប្រធានកិត្តិយស គណៈ​វិស្វករ​កម្ពុជា បានឱ្យដឹងថាៈ រាជរដ្ឋាភិបាល បានចាត់ទុក​ការអប់រំ ប្រកបដោយ​គុណភាព លើ​វិស័យ​អប់រំ​វិស្វកម្ម គឺជា​ចំណុច​គន្លឹះ​មួយ ដែល​មិនអាច​ខ្វះ​បាន សម្រាប់​អភិវឌ្ឍន៍ ធនធានមនុស្ស និង​ការអភិវឌ្ឍ​សង្គមជាតិ ប្រកបដោយ​និរន្តរភាព​។ កម្ពុជា​ត្រូវការ​ជា​ចាំបាច់ ក្នុង​ការជំរុញ​ការអភិវឌ្ឍ​សង្គម និង​សេដ្ឋកិច្ច ដើម្បី​ដើរ​ឱ្យទាន់​ប្រទេសជិតខាង ក្នុង​តំបន់ និង​បណ្ដា​ប្រទេស​ផ្សេងទៀត ក្នុង​ពិភពលោក​។ ទស្សនៈ​ទាំងនេះ គឺ​បាន​ឆ្លុះបញ្ចាំង​ឱ្យឃើញ ច្បាស់​ថា ការអប់រំ​វិស្វកម្ម គឺជា​កូនសោ​បើកទ្វារ ឆ្ពោះទៅរក​ការអភិវឌ្ឍ​សង្គមជាតិ ប្រកបដោយ​ជោគជ័យ ។​

​ក្នុង​ពិធី​នេះ លោក អ៉ិ​ត សំហេង បានបង្ហាញ​នូវ​មោទនភាព កោតសរសើរ និង​វាយតម្លៃ​ខ្ពស់ ចំពោះ​ថ្នាក់ដឹកនាំ​របស់​គណៈ​វិស្វករ​កម្ពុជា និង​មន្ត្រីរាជការ ក្រោម​ឱវាទ​ទាំងអស់ ដែល​បាន​ខិតខំ បំពេញ​តួនាទី​ភារកិច្ច​របស់ខ្លួន យ៉ាងសកម្ម​រួមគ្នា និង​ពុះពារ​សម្រេចបាន នូវ​សមិទ្ធផល​ជាច្រើន ទាំង​ថ្នាក់ជាតិ និង​អន្តរជាតិ ជូន​ជាតិ​មាតុភូមិ និង​ប្រជាជន​កម្ពុជា នាពេល​កន្លងមក​។​

​នៅក្នុង​ឱកាស​នោះដែរ លោក​រដ្ឋមន្ត្រី បាន​សម្តែង​ការអបអរសាទរ​ចំពោះ លោក សុខុម រិទ្ធី​វុ​ធ ដែល​បាន​ជាប់ឆ្នោត ជា​អគ្គលេខាធិការ គណៈ​វិស្វករ​កម្ពុជា អាណត្តិ​ទី​៣ ហើយក៏​សូម​ចូលរួម អបអរសាទរ​ដល់ អគ្គលេខាធិការរង​ទាំងអស់ ដែល​បានទទួល​ការបោះឆ្នោត​គាំទ្រ សម្រាប់​អាណត្តិ​ទី​៣ នេះ​ផងដែរ​។​

​លោក អ៉ិ​ត សំហេង បាន​គូសបញ្ជាក់ថាៈ កន្លងមក យើង​ឃើញថាៈ គណ​វិស្វករ​កម្ពុជា ពិតជា​បាន​ចូលរួមចំណែក ក្នុង​ការខិតខំ​សម្រេចបាន តាម​បេសកកម្ម​ជាច្រើន ដែល​ការអភិវឌ្ឍ​ធនធាន​វិស្វកម្ម គឺជា​កម្លាំងចលករ​មួយ ដ៏​ខ្លាំងក្លា​បំផុត មិនអាច​ខ្វះ​បាន សម្រាប់​អភិវឌ្ឍន៍​សង្គមជាតិ​មួយ ឱ្យមាន​ការរីកចម្រើន​គ្រប់​វិស័យ​។ ក្នុងនាម​រាជរដ្ឋាភិបាល ត្រូវតែ​បង្កើន​យន្តការ​ដឹកនាំ ដើម្បី​ធ្វើឱ្យ​ស្ថាប័ន​វិស្វកម្ម​មួយ​នេះ ក្លាយជា​មជ្ឈមណ្ឌល មួយ​ដ៏​រឹងមាំ ដែល​អាច​ចូលរួមចំណែក ជាមួយ​រាជរដ្ឋាភិបាល ក្នុងការ​រៀបចំ​ផែនការ អភិវឌ្ឍន៍​សង្គមជាតិ ប្រកបដោយ​ចីរភាព​។​

​លោក​រដ្ឋមន្ត្រី បានលើកឡើង ដោយ​បញ្ជាក់ថាៈ “ អនាគត​ប្រទេសជាតិ​របស់​យើង គឺ​ត្រូវ​ពឹង​ផ្អែកលើ​អ្វី ដែល​វិស្វករ​យើង​អាច​ធ្វើបាន នាពេល​បច្ចុប្បន្ន និង​ទៅ​អនាគត គឺ​ត្រូវ​ផ្ដល់​ការអប់រំ​វិស្វកម្ម ប្រកបដោយ​គុណភាព គឺជា​ជម្រើស​មួយ​ដ៏​ប្រសើរ​បំផុត ដល់​វិស្វករ​ជាតិ​របស់​យើង ក្នុងការ​ប្រកួតប្រជែង អភិវឌ្ឍ​សមត្ថភាព ក្នុងការ​ដោះស្រាយ បញ្ហា​ចូលរួម​គិតគូ ជាមួយ​រាជរដ្ឋាភិបាល ប្រកបដោយ​សុភ​វិនិច្ឆ័យ និង​ការអប់រំ សីលធម៌ វិជ្ជាជីវៈ​ត្រឹមត្រូវ សម្រាប់​ទ្រទ្រង់​អាជីព​ការងារ ទាំងមូល​របស់​វិស្វករ ប្រកបដោយ​កិត្តិយស សេចក្ដីថ្លៃថ្នូរ សុចរិត​ភាព និង​ការទទួលខុសត្រូវ​ខ្ពស់ បស់​វិស្វករ​យើង​។​”

​ជាមួយគ្នានេះ លោក រដ្ឋមន្ត្រី បាន​រំលឹកថា​៖ “​ក្រោយ​ថ្ងៃ​រំដោះ ៧​មករា ធនធានមនុស្ស របស់​យើង​នៅសល់​តិចតួច​ណាស់ ដែល​រស់រានមានជីវិត រួចផុត​ពីរ​បប​ប្រល័យពូជសាសន៍ ប៉ុល ពត ជាពិសេស​ធនធានមនុស្ស ដែលជា​វិស្វករ​នេះ​តែម្តង ត្រូវបាន​ខ្មែរក្រហម សំលាប់ចោល​ស្ទើរ​អស់​។ រាជរដ្ឋាភិបាល បាន​ខិតខំ​គ្រប់បែបយ៉ាង ក្នុង​ការកសាង​ធនធាន មនុស្ស ទាំង​នៅក្នុង​ស្រុក និង​បញ្ជូនទៅ​សិក្សា​នៅ​បរទេស ដែលជា​លទ្ធផល យើង​ឃើញថា ធនធានមនុស្ស ផ្នែក​វិស្វកម្ម យើង​បាន​កើនឡើង ទាំង​បរិមាណ​នឹង​គុណភាព​គួរ​ជាទី​មោទន​។ ជាក់ស្តែង ក្នុង​ឆ្នាំ​២០២១ កន្លងទៅនេះ គណ​វិស្វករ​កម្ពុជា ទទួលបាន​ការចុះបញ្ជី​វិស្វករ ៧៤៧ នាក់ បើ​គិត​មកទល់​បច្ចុប្បន្ន មាន​វិស្វករ​ចុះបញ្ជី សរុប​ចំនួន ៦.០០៨ នាក់ (​ស្រី ២៤០​នាក់​) ក្នុងនោះ វិស្វករ​ជាតិ ចំនួន ៥.៩២៤ នាក់ (​ស្រី ២៣៨​នាក់​) និង​វិស្វករ​បរទេស ចំនួន ៨៤​នាក់ (​ស្រី ២​នាក់​)”៕/V