​ដោយ​៖ ដេប៉ូ / កំពត​៖ រដ្ឋលេខាធិការ​ក្រសួងបរិស្ថាន លោក នេត្រ ភក្ត្រា បាន​ថ្លែងថាៈ ប៉ម​ចម្រោះ​ទឹកស្អាត ដែល​ផ្តល់​ដោយ​មូលនិធិ​កូ​កា​-​កូ​ឡា នៃ​ក្រុមហ៊ុន​ភេសជ្ជៈ​កូកាកូឡា​កម្ពុជា បាន​ចូលរួម​ផលិត​ទឹកស្អាត ប្រកបដោយ​គុណភាព សម្រាប់​សិស្សានុសិស្ស នៃ​វិទ្យាល័យ ហ៊ុន សែន ព្រែក​ត្នោត និង​ប្រជាពលរដ្ឋ នៅ​ជុំវិញ​តំបន់​នោះ ប្រើប្រាស់ សម្រាប់​ពិសា ដោយ​ឥតគិតថ្លៃ និង​បាន​ចូលរួម​ក្នុង ការ​សន្សំសំចៃ​ថវិកា របស់​សិស្សានុសិស្ស លើ​ការទិញ​ទឹក និង​ថែមទាំង​បាន​ចូលរួម កាត់បន្ថយ​សំណល់​ប្លា​ស្ទិ​ក ពី​ការប្រើប្រាស់ ទឹកដប​ប្លា​ស្ទិ​ក ធ្វើឱ្យ​សាលារៀន និង​សហគមន៍​មាន​បរិស្ថាន និង​អនាម័យ​ល្អ​។​

​គួរ​បញ្ជាក់ថា ការលើកឡើង​ពី​សំណាក់ លោក នេត្រ ភក្ត្រា រដ្ឋលេខាធិការ​ក្រសួងបរិស្ថាន និង​ជា​អនុប្រធាន​ក្រុមការងារ រាជរដ្ឋាភិបាល បែបនេះ នា​ក្រុង​បូកគោ កាលពី​ព្រឹក​ថ្ងៃទី​១៨ ខែមីនា ឆ្នាំ​២០២២ ក្នុង​ពិធី​ប្រគល់​ទទួល​ប៉ម​ចម្រោះ​ទឹកស្អាត ដែល​មូលនិធិ​កូ​កា​-​កូ​ឡា ប្រគល់ជូន​សាលា​វិទ្យាល័យ ហ៊ុន សែន ព្រែក​ត្នោត ក្នុង​សង្កាត់​ព្រែក​ត្នោត ក្រុង​បូកគោ តាមរយៈ​ក្រសួងបរិស្ថាន​។​

​លោក រដ្ឋលេខាធិការ​ក្រសួងបរិស្ថាន បាន​មានប្រសាសន៍ថាៈ ការផ្តល់​ឧបករណ៍​ចម្រោះ​ទឹក ស្អាត​នេះ បាន​ចូលរួមចំណែក ជួយ​លើកកម្ពស់​សុខុមាលភាព សិស្សានុសិស្ស ឱ្យ​កាន់តែ​ប្រសើរ ព្រោះ​ទឹកជា​ជីវិត និង​មនុស្ស​ម្នាក់ៗ មាន​តម្រូវការ​ទឹក ជា​ចាំបាច់ សម្រាប់​ការរស់នៅ​ប្រចាំថ្ងៃ​។​

​គួរ​បញ្ជាក់ថា ប៉ម​ចម្រោះ​ទឹកស្អាត ដែល​ផ្តល់ជូន​វិទ្យាល័យ ហ៊ុន សែន ព្រែក​ត្នោត​នេះ គឺជា​ប៉ម​ចម្រោះ​ទី​២ របស់​ក្រុមហ៊ុន ដែល​ត្រូវបាន​ដំឡើង នៅ​ឆ្នាំ ២០២២ នេះ ហើយ​ជា​ប៉ម ចម្រោះ​ទឹកស្អាត​ទី ៣៣ ដែល​ត្រូវបាន​ដំឡើង​ឱ្យប្រើ​ប្រាស់ នៅតាម​សាលារៀន​នានា ក្នុងប្រទេស​កម្ពុជា​។ ប៉ម​ចម្រោះ​ទឹកស្អាត AQUATOWER គឺជា​ប្រព័ន្ធ​ចម្រោះ​ទឹកស្អាត ដែល​ត្រូវបាន​ដំឡើង រួមជាមួយ​នឹង AquaSan ដែលជា​ប្រព័ន្ធ​លាង​សម្អាត​បន្ទប់ទឹក ដែល​នឹង​ផ្តល់​អត្ថប្រយោជន៍ ដល់​សិស្សានុសិស្ស លោកគ្រូ អ្នកគ្រូ ព្រមទាំង​ប្រជា​សហគមន៍ ប្រមាណ ៣០០ នាក់​នៅទីនេះ​។ បើទោះជា​ការប្រគល់ ប៉ម​ចម្រោះ​ទឹកស្អាត​នេះ អាចជា​ការបង្ហាញ ពី​ការបញ្ចប់​គម្រោង​ក៏ដោយ ក៏​ការប្តេជ្ញាចិត្ត​របស់​យើង មិន​បញ្ឈប់​ត្រឹម ការតំឡើង​ប៉ម​នេះដែរ យើង​នឹង​បន្ត​គាំទ្រ និង​សហការ យ៉ាង​ពេញទំហឹង ជាមួយ​មូលនិធិ Planet Water ក្នុងការ​អនុវត្ត​កម្មវិធី​អប់រំ​សុខភាព ការប្រើប្រាស់​ទឹកស្អាត ប្រកបដោយ ប្រសិទ្ធភាព ការថែរក្សា​អនាម័យ បរិស្ថាន ការអប់រំ បណ្តុះបណ្តាល ប្រជា​សហគមន៍ អំពី​ការថែរក្សា​ការពារ ប៉ម​ចម្រោះ​ទឹក​នេះ រួមទាំង​ការថែទាំ រយៈពេល ៥ ឆ្នាំ ក្រោយ​ការដំឡើង​។​

​ជាមួយគ្នានេះ លោក រដ្ឋលេខាធិការ ក្រសួងបរិស្ថាន បាន​អំពាវនាវ ដល់​សិស្សានុសិស្ស និង​ថ្នាក់ដឹកនាំ​សាលា ត្រូវ​ចូលរួម​ថែរក្សា​ឧបករណ៍​ចម្រោះ​ទឹកស្អាត​នេះ ដើម្បី​អាច​ប្រើប្រាស់ សម្រាប់​ពេល​យូរអង្វែង និង​សម្រាប់​សិស្សានុសិស្ស ជំនាន់​ក្រោយ​ទៀត​៕/V