​ប្រែ​សម្រួល : កញ្ញា​ដា​លី​ស (​បាល់ទាត់​) ៖ វា​ជា​ជំនួប​ដ៏​តានតឹង​នៅ​ក្បាល​ព្រលប់​ថ្ងៃ​សៅរ៍​នេះ​នៅក្នុង EPL ពេល Arsenal ទៅសួរសុខទុក្ខ Aston Villa ខណៈ​ថ្ងៃ​សៅរ៍​ដដែល​ក៏​មាន​១​គូ​ទៀត​ដែរ​នៅ​អង់គ្លេស​គឺ​ការប្រកួត FA Cup វគ្គ​១/៤​ផ្តាច់ព្រ័ត្រ​រវាង Middlesbrough និង Chelsea​។

​សម្រាប់​ថ្ងៃអាទិត្យ​នៅអេ​ស្ប៉ាញ​គឺ​មាន​ជំនួប El Clásico ដែល​មាន​មនុស្ស​រង់ចាំ​ទស្សនា​ច្រើន​បំផុត​លើ​ពិភពលោក ដោយ​ក្នុងជំនួប​នេះ​ក្រុម Real Madrid​ត្រូវ​គេ​ព្យាករណ៍​ថា​មាន​ប្រៀប​​ឈ្នះ​ខ្ពស់​លើ Barcelona​។

​ត្បិត​គូ​ធំៗ​នៅ​អង់គ្លេស​មានតែ​២​គូ​សម្រាប់​ថ្ងៃ​សៅរ៍ ក៏​ប៉ុន្តែ​នៅ​លី​ក​ដទៃទៀត​គឺ​មាន​ការប្រកួត​ច្រើន​សម្រាប់​ចុង​សប្តាហ៍​នេះ ហើយ​គូ​រំពឹង​មាន​ភាគរយ​ឈ្នះ​ខ្ពស់​ជាងគេ​គឺ Mainz, Bayern, Leipzig, Leverkusen, Dortmund, Lens, Rennes, Napoli និង Juventus​។​

​ទោះ​យ៉ាងណា​យើង​នឹង​លើកយក​តែ​២​គូ​មក​វិភាគ​ជូន​ប៉ុណ្ណោះ ៖

– Aston Villa vs Arsenal (EPL)

Arsenal ប្រឈម​មុខ​នឹង​ការធ្វើដំណើរ​ដ៏​លំបាក​ទៅកាន់​ទឹកដី Villa Park ខណៈ​ដែល​ពួកគេ​សម្លឹង​រក​ការ​ឈ្នះ​ពី​បរាជ័យ​ក្រោម​ស្នាដៃ​ក្រុម Liverpool ។​

​ការ​ឈ្នះ​៥​ប្រកួត​ជាប់ៗ​គ្នា​របស់​កាំភ្លើង​ធំ​ត្រូវបាន​បញ្ឈប់​ដោយ​ការ​ស៊ុត​បញ្ចូល​ទី​ពី​កីឡាករ Diogo Jota និង Roberto Firmino កាលពី​យប់​ថ្ងៃ​ពុធ ដែល​វាយ​សំពង​លើ​ក្តីសង្ឃឹម​សម្រាប់​កៅអី​ក្របខ័ណ្ឌ Champions League របស់ Arsenal​។​

​ដោយ​នៅ​តែ​ឈរ​នៅ​លេខ​រៀង​ទី ៤ និង​មាន​២​ប្រកួត​ក្នុង​ដៃ​លើ​គូ​ប្រជែង​របស់​ពួកគេ ក្រុម Arsenal ត្រូវ​ប្រឈម​មុខ​នឹង​ក្រុម Aston Villa ក្នុង​ការប្រកួត​នៅ​ក្បាល​ព្រលប់​ថ្ងៃ​សៅរ៍ ដោយ​ដឹងថា​ពួកគេ​មាន​ប្រៀប​លើ​តារាង​ពិន្ទុ​ជាង​ម្ចាស់ផ្ទះ ទោះ​លទ្ធផល​ចេញ​មក​យ៉ាងណា​ក៏ដោយ​។​

​ចំណែក Villa វិញ ការបរាជ័យ​ក្រោម​ស្នាដៃ​ក្រុម​ញញួរ​ធំ West Ham កាលពី​សប្តាហ៍​មុន​បានបញ្ចប់​ការ​ឈ្នះ ៣ ប្រកួត​ជាប់ៗ​គ្នា​របស់​ខ្លួន ខណៈ​ឥឡូវ​ពួកគេ​បាន​ត្រឹម​ផ្តោត​អាទិភាព​បញ្ចប់ទៅ​នៅ​ចំណាត់ថ្នាក់​ល្អ​ពាក់កណ្តាល​តារាង​ប៉ុណ្ណោះ​។​

​សម្រាប់ Aston កីឡាករ Marvelous Nakamba (​របួស​ជង្គង់​) នឹង​អវត្តមាន ខណៈ Lucas Digne (​របួស​សាច់ដុំ​), Douglas Luiz (​របួស​មាត់​) និង Calum Chambers (​របួស​ក្បាល​) ស្ថិត​ក្នុង​មន្ទិលសង្ស័យ​មិនដឹង​អាច​លេង​បាន​ឬ​អត់​។​

​ជាថ្មី​ម្តងទៀត Arsenal កំពុង​រង់ចាំ​មើល​លទ្ធផល​ថា​តើ​ខ្សែការពារ Takehiro Tomiyasu នឹង​អាច​ចូល​ក្រុម​វិញ​បាន​ឬ​អត់ ខណៈ​កំពុង​តស៊ូ​នឹង​របួស​កំភួនជើង​។​

​ត្បិត​ប៉ុន្មាន​ប្រកួត​ចុងក្រោយ​នេះ ក្រុម​កាំភ្លើង​ធំ​មិន​ដែល​ឈ្នះ​នៅ​ទឹកដី Aston ក៏​ប៉ុន្តែ​ពួកគេ​មាន​សន្ទុះ​ចិត្ត​ខ្ពស់​ជាង​ម្ចាស់ផ្ទះ​ដើម្បី​ដណ្តើម​កៅអី Top 4​។

​លទ្ធផល​ព្យាករណ៍ Arsenal ឈ្នះ ១-០​។

– Middlesbrough vs Chelsea (FA Cup)

​ក្រុម Middlesbrough និង Chelsea នឹង​ត្រូវ​ប៉ះគ្នា​សម្រាប់​ការប្រកួត​វគ្គ​១/៤​ផ្តាច់ព្រ័ត្រ FA Cup នៅ​ចំពោះមុខ​ហ្វូង​ទស្សនិកជន​របស់ Boro ទាំងស្រុង ដែល​ទិញ​សំបុត្រ​ចូល​មើល​អស់រលីង​នៅ​កីឡដ្ឋាន Riverside Stadium ខណៈ​អ្នកគាំទ្រ​តោ​ខៀវ​ត្រូវ​ជាប់​ទណ្ឌកម្ម​មិនអាច​ទិញ​សំបុត្រ​ចូល​មើល​បានទេ​។ ក្រុម​ម្ចាស់ផ្ទះ​ច្បាស់​ជា​រំភើប​ក្នុង​ការលេង​ការប្រកួត​នេះ​នៅក្នុង​ផ្ទះ ខណៈ​ពួកគេ​បាន​លេង​៣​ប្រកួត​ចុងក្រោយ​នៅ​ក្រៅ​ផ្ទះ​រហូត​។ Middlesbrough កំពុង​រីករាយ​នឹង​ការលេង​ដ៏​ល្អ​បំផុត​របស់​ពួកគេ​នៅក្នុង FA Cup ចាប់តាំងពី​ឆ្នាំ ២០១៧ ហើយ​កំពុង​ទទួល​បាន​រហស្ស​នាម​ថា “​អ្នក​សម្លាប់​យក្ស​” ខណៈ​ដែល​ពួកគេ​បាន​ទម្លាក់​ក្រុម​គីឡូ​ធ្ងន់ Premier League ដូចជា Tottenham និង Manchester United នៅ​ជុំ​មុនៗ​។ ត្បិត​ដូច្នេះ​ក្តី Middlesbrough ជួប Chelsea ៨ លើកចុងក្រោយ​គិតពី​ឆ្នាំ ២០០៦ គឺ​ចាញ់​រហូត ដោយ​ស៊ុត​មិន​ចូល​ទី​របស់​តោ​ខៀវ​សូម្បីតែ​មួយ​គ្រាប់​។ ពួកគេ​បាន​ចាញ់​ក្នុង​វគ្គ​១/៤​ផ្តាច់ព្រ័ត្រ​ចំនួន​៤​លើក​មុនៗ​របស់​ពួកគេ​ទល់នឹង Chelsea ហើយ​ការ​បង្ហាញខ្លួន​ដល់​វគ្គ​ពាក់កណ្តាល​ផ្តាច់ព្រ័ត្រ​ចុងក្រោយ​របស់​ពួកគេ​គឺ​កើតឡើង​ក្នុង​រដូវ​កាល ២០០៥/០៦​។​

Chelsea មានរឿង​រំខាន​នៅក្រៅ​ទីលាន​ជាច្រើន ប៉ុន្តែ​ទម្រង់​លេង​របស់​ពួកគេ​នៅលើ​ទីលាន​គឺ​ល្អ​ដូច​ផ្កា​។ ពួកគេ​បាន​ឈ្នះ ២-១ ក្រៅ​ទឹកដី​លើ​ក្រុម Lille ក្នុង​ការប្រកួត​ចុងក្រោយ​របស់​ពួកគេ ដោយ​ធ្វើឱ្យ​ពួកគេ​ឈ្នះ ៥ លើ​ក​ជាប់ៗ​គ្នា​។ Chelsea ចាញ់​តែ​ម្តង​គត់​ក្នុង​ការប្រកួត ១៣ លើក​ចុងក្រោយ​របស់​ពួកគេ​នៅ​គ្រប់​ការប្រកួត​ទាំងអស់ ដោយ​ការ​ចាញ់​នោះ​គឺ​កើតឡើង​ក្នុង​វគ្គ​ផ្តាច់ព្រ័ត្រ League Cup ទល់នឹង Liverpool​។ Chelsea បានឈ្នះ Boro ក្នុង FA Cup ក្នុងជំនួប ៣ លើកចុងក្រោយ​។ ហើយ​បើ​និយាយ​ពី​ការ​ប៉ះគ្នា​៨​លើក​ចុង​ក្រោយ​នៅ​គ្រប់​ក្របខ័ណ្ឌ​ទាំងអស់​គឺ Middlesbrough ចាញ់ Chelsea រហូត ដោយ Chelsea ស៊ុត​ចូល ១៩ គ្រាប់ និង របូត​សូន្យ​គ្រាប់​។

​ក្រុម Middlesbrough នឹង​ប្រឹង​ទប់ Chelsea រហូត​ដល់​ទីបញ្ចប់ ហេតុ​ដូច្នេះ​យើង​រំពឹង​មាន​គ្រាប់​បាល់​តិច​បំផុត​សម្រាប់​ការប្រកួត​នេះ​។

​លទ្ធផល​ព្យាករណ៍ Chelsea ឈ្នះ ១-០៕

Arsenal នៅតែ​រំពឹង​ទទួល​លទ្ធផល​ល្អ​នៅ​ទឹកដី Aston