​ប្រែ​សម្រួលៈ​បំណង​(ST)៖ ប្រធានាធិបតី​ចិន ស៊ី ជីន​ភីង កាលពី​ថ្ងៃ​សុក្រ​បាន​ប្រាប់​សម​ភាគី​អាម៉េរិក ចូ បៃ​ដិន ថា​ជម្លោះ​និង​ការប្រឈមមុខ រួម​ទាំង​សង្គ្រាម​នៅ​អ៊ុ​យក្រែន មិន​ជា​ផលប្រយោជន៍​របស់​​នរណា​ម្នាក់​ទេ នេះ​បើ​តាម​ការផ្សាយ​របស់​ក្រសួងការបរទេស​ចិន​។​

​ក្នុងអំឡុងពេល​សន្ទនា​តាម​វីដេអូ​បន្ត​ផ្ទាល់​អស់​ពេល​ពីរ​ម៉ោង​កាលពី​ល្ងាច​ថ្ងៃ​សុក្រ លោក​ស៊ី បាន​ប្រាប់​លោកបៃ​ដិនថា «​វិបត្តិ​អ៊ុយ​ក្រែន​មិន​ជា​អ្វីមួយ​ដែល​យើង​ចង់​ឃើញ​ទេ​។​ព្រឹត្តិការណ៍​នេះ​ជាថ្មីទៀត​​បង្ហាញថា ប្រទេស​នានា​គួរ​កុំ​នាំគ្នា​ទៅ​កាន់​ចំណុច​ជួប​គ្នា​នៅ​លើ​សមរភូមិ​។​ជម្លោះ​និង​ការប្រឈមមុខ​មិនជា​ផលប្រយោជន៍​របស់​នរ​ណា​ម្នាក់​ទេ ហើយ​សន្តិភាព​និង​សន្តិសុខ​គឺជា​អ្វី​ដែល​សហគមន៍​អន្តរ​​ជាតិ​គួរអោយ​តំលៃ​ខ្ពស់​បំផុត​»​។​

​លោក​បាន​បន្ថែមថា ចិន​និង​អាម៉េរិក​ត្រូវតែ​នាំ​ទំនាក់ទំនង​របស់​ខ្លួន​ឆ្ពោះទៅ​កាន់​ផ្លូវ​ត្រឹមត្រូវ និង​ចូលរួម​រែកពន់​ចំណែក​ទទួលខុសត្រូវ​អន្តរជាតិ​របស់​ខ្លួន ហើយ​ធ្វើការ​ដើម្បី​សន្តិភាព​ពិភពលោក​។​

​សេត​វិមាន​នៅ​មិន​ទាន់​ចេញ​សេចក្តីថ្លែងការណ៍​ណាមួយ​អំពី​ការសន្ទនា​រវាង​មេដឹកនាំ​ទាំង​ពីរ​នៅឡើយ​ទេ តែ​មុននេះ​កាលពី​ថ្ងៃ​ព្រហស្បតិ៍​ខ្លួន​បាន​និយាយថា​លោកបៃ​ដិ​ននឹង​ព្រមាន​លោក​ស៊ីអំពី​តំលៃ​​ត្រូវ​បង់​ដ៏​ខ្ពស់​សំរាប់​ចិន បើសិនជា​រដ្ឋាភិបាល​ក្រុង​ប៉េកាំង​ហ៊ាន​ជួយ​សព្វាវុធ​ដល់​រុស្ស៊ី​។​

​សូមបញ្ជាក់​ថា ការគាំទ្រ​កល​យុទ្ធ​របស់​ចិន​ចំពោះ​រុស្ស៊ី ចំ​ពេល​លោក​ខាងលិច​ដឹកនាំ​ដោយ​អាម៉េរិក បើក​យុទ្ធនាការ​ធ្វើអោយ​រដ្ឋាភិបាល​ក្រុង​មូ​ស្គូ​នៅ​ឯកោ បាន​ក្លាយជា​បញ្ហា​រំខាន​ដល់​ទំនាក់ទំនង​រវាង​​ក្រុង​វ៉ាស៊ីនតោន​និង​ប៉េកាំង ដែល​កំពុង​ចេញ​មក​លើក​ហេតុផល​រៀងៗ​ខ្លួន​អំពី​របៀប​ដោះស្រាយ​ជម្លោះ​យោធា​ធំ​បំផុត​នៅ​អឺរ៉ុប​ចាប់តាំងពី​សង្គ្រាមលោកលើកទី​ពីរ​។​

​អាម៉េរិក​ដែល​កាន់តែ​ស្រែក​ឡូឡា​ខ្លាំង​ឡើង​អំពី​ការព្រួយបារម្ភ​របស់ខ្លួន​ចំពោះ​ការ​ដែល​ចិន​មិន​ថ្កោលទោស​អំពើ​របស់​រុស្ស៊ី ចង់អោយ​រដ្ឋាភិបាល​ក្រុង​ប៉េកាំង​ធ្វើអោយ​ច្រើន​ថែមទៀត​ដើម្បី​ដាក់​សម្ពាធ​លើ​​ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន អោយ​បញ្ចប់សង្គ្រាម​នេះ​។​ក្នុងពេល​ជាមួយគ្នា ចិន​ចង់​រក្សា​មិត្តភាព​ជា​មួយ​រុស្ស៊ី ជៀសវាង​ទណ្ឌកម្ម​និង​ជំរុញ​កិច្ចពិភាក្សា​ស្វែងរក​សន្តិភាព​ជាជាង​ការបន្ថែម​សព្វា​​វុ​ធ​ដែលជា​«​ការបន្ថែម​ប្រេង​លើ​អណ្តាតភ្លើង​»​។​

​ក្នុងពេល​ជាមួយគ្នា កាសែត​រដ្ឋ​ចិន​Global Times​បាន​និយាយថា «​ចិន​មិន​ដែល​ទទួលយក​ការ​គំរាម​និង​ការបង្ខិតបង្ខំ​ពី​អាម៉េរិក​ទេ ហើយ​បើ​អាម៉េរិក​ចាត់វិធានការ​ដែល​ធ្វើអោយ​ប៉ះពាល់​ផល​ប្រ​​យោជន៍​ស្របច្បាប់​របស់​ចិន ផលប្រយោជន៍​របស់​ក្រុមហ៊ុន​សហគ្រាស​និង​បុគ្គល​ចិន ចិន​នឹង​មិន​អង្គុយ​ស្ងៀម​ហើយ​នឹង​ឆ្លើយតប​យ៉ាង​ខ្លាំងក្លា​»​។​

​កាលពី​ថ្ងៃ​ព្រហស្បតិ៍​រដ្ឋមន្ត្រីការបរទេស​អាម៉េរិក អ៊ែន​ថូ​នី ប្លីង​កិន ក៏​បាន​ប្រាប់​អ្នកយកព័ត៌មាន​ថា លោកបៃ​ដិន​«​នឹង​បញ្ជាក់​ច្បាស់​ថា​ចិន​នឹង​ទទួលខុសត្រូវ​ចំពោះ​អំពើ​ណាមួយ​ដែល​ត្រូវ​គេ​គិត​ថា​ជា​​ការគាំទ្រ​ការឈ្លានពាន​របស់​រុស្ស៊ី​។​យើង​នឹង​មិន​ស្ទាក់ស្ទើរ​ដាក់​ទណ្ឌកម្ម​ឬ​វាយ​ពន្ធ​ពិន័យ​ទេ​»៕

​ស៊ី​និង​បៃ​ដិនបាន​សន្ទនា​គ្នា​អស់​ពីរ​ម៉ោង​កាលពី​ល្ងាច​ថ្ងៃ​សុក្រ ភាគច្រើន​ផ្តោតលើ​បញ្ហា​អ៊ុ​យក្រែន