​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​រុស្ស៊ី​លោក វ្ល៉ា​ឌី​មៀរ ពូ​ទីន បាន​បង្ហាញខ្លួន​នៅឯ​ការជួបជុំ​ដែល​មាន​ការ​គ្រវីទង់ជាតិ​ដ៏​ធំ​នៅ​ពហុ​កីឡដ្ឋាន​មូ​ស្គូ​កាលពី​ថ្ងៃ​សុក្រ​ទី​១៨​មីនា​ហើយ​​បាន​សរសើរ​កងទ័ព​របស់​គាត់​ដែល​កំពុង​ប្រយុទ្ធ​ក្នុងប្រទេស​អ៊ុយ​ក្រែន​អស់​រយៈពេល​បី​សប្តាហ៍​មក​ហើយ ដែលនាំឱ្យ​រុស្ស៊ី​ខាតបង់​ច្រើនជាង​ការរំពឹង​ទុក​នៅ​លើ​សម​រ​ភូមិ​និង​នាំឱ្យ​មាន​ភាព​ផ្តាច់ការ​​កាន់តែ​ខ្លាំង​ឡើង​នៅក្នុង​ស្រុក​។​

​ទន្ទឹមនឹងនោះ មេដឹកនាំ​នៃ​គណៈប្រតិភូ​រុស្ស៊ី​ក្នុង​កិច្ចចរចា​ការទូត​ជាមួយ​អ៊ុយ​ក្រែន​បាន​និយាយថា ភាគី​ទាំងពីរ​បាន​បង្រួម​ការ​ខ្វែងគំនិត​គ្នា តែ​ភាគី​អ៊ុយ​ក្រែន​បាន​និយាយថា​ជំហររ​បស់​ខ្លួន​នៅតែ​​មិន​ផ្លាស់ប្តូរ​។​

​ការ​លុកលុយ​នេះ​បាន​ធ្វើឱ្យ​មាន​ការផ្ទុះ​ការតវ៉ា​ប្រឆាំង​សង្គ្រាម​នៅ​ក្នុងប្រទេស​រុស្ស៊ី​ហើយ​ការប្រមូលផ្តុំ​គ្នា​នៅ​ទីក្រុង​មូ​ស្គូ​កាលពី​ថ្ងៃ​សុក្រ​នេះ​ត្រូវ​បាន​ហ៊ុម​ព័ទ្ធ​ដោយ​ការសង្ស័យថា​វា​ជា​ការបង្ហាញ​អំពី​ការ​ស្នេហា​ជាតិ​ដែល​រៀបចំ​ដោយ​វិមាន​ក្រឹម​ឡាំង​។ បណ្តាញ Telegram ជាច្រើន​ដែល​រិះគន់​វិមាន​ក្រឹម​ឡាំង បាន​រាយការណ៍​ថា​និស្សិត​និង​និយោជិត​នៃ​ស្ថាប័នរដ្ឋ​នៅក្នុង​តំបន់​មួយចំនួន​ត្រូវបាន​បញ្ជា​ដោយ​ថ្នាក់​​លើ​របស់​ពួកគេ​ឱ្យ​ចូលរួម​ការជួបជុំ​និង​ការប្រគុំ​តន្ត្រី​រំលឹក​ខួប​លើក​ទី​ប្រាំបី​នៃ​ការ​កាត់​យក​តំបន់​គ្រី​មេ​ពី​សំណាក់​ទីក្រុង​មូ​ស្គូ ដែល​រឹបអូស​ពី​អ៊ុ​យក្រែន​។

​នៅ​កន្លែង​ផ្សេងទៀត ទាហាន​រុស្ស៊ី​បាន​បន្ត​បាញ់ស្រោច​យ៉ាង​សាហាវ​ទៅលើ​ទីក្រុង​នានា​របស់​អ៊ុ​យក្រែន រួម​ទាំង​រដ្ឋធានី​គៀវ និង​បាន​វាយលុក​លើ​ទីតាំង​ជួសជុល​យន្តហោះ​នៅ​ជាយក្រុង​ល្វីវ (Lviv)​ជិត​​ព្រំដែន​ប៉ូឡូញ​។ មន្ត្រី​អ៊ុយ​ក្រែន​បាន​និយាយ​កាលពី​ល្ងាច​ថ្ងៃ​សុក្រ​ទី​១៨​មីនា​ថា ទីក្រុង​កំពង់ផែ​ម៉ា​រី​វ​ប៉ូល (Mariupol) ភាគ​ខាងត្បូង​ដែល​ត្រូវបាន​ឡោមព័ទ្ធ​បាន​បាត់បង់​ការចូល​ទៅ​កាន់​សមុទ្រ​អា​ហ្សូ​វ (Azov) ហើយ​កងកម្លាំង​រុស្ស៊ី​នៅតែ​ព្យាយាម​វាយលុក​ទីក្រុង​នេះ​។ គេ​មិន​ទាន់​ដឹង​ច្បាស់​ថា​តើ​ពួកគេ​បាន​ដណ្តើម​យក​ទីក្រុង​នេះ​បាន​ហើយ​ឬ​យ៉ាងណាទេ​។​

​លោកពូ​ទីន​បាន​និយាយ​អំពី​កងកម្លាំង​របស់​វិមាន​ក្រឹម​ឡាំង​នៅក្នុង​ការបង្ហាញ​ខ្លួន​ជា​សាធារណៈ​ដ៏​កម្រ​ចាប់​តាំងពី​ការចាប់ផ្តើម​សង្គ្រាម​ថា “​ស្មា​កៀក​ស្មា ពួកគេ​ជួយ​និង​គាំទ្រ​គ្នា​ទៅវិញទៅមក​”​។ លោក​បាន​បន្ថែមថា “​យើង​មិន​ដែល​មាន​ការរួបរួម​គ្នា​បែប​នេះ​យូរ​មក​ហើយ​”​។​

​ប៉ូលិស​ក្រុង​មូ​ស្គូបា​ននិយាយថា មនុស្ស​ជាង ២០០.០០០ នាក់​បាន​នៅក្នុង​និង​ជុំវិញ​កីឡដ្ឋាន Luzhniki ។ ព្រឹត្តិការណ៍​នេះ​រួម​មាន​បទ​ចម្រៀង​ស្នេហា​ជាតិ ដូចជា​បទ “Made in the USS.R.” ជាមួយនឹង​ឃ្លា​បើកឆាក “​អ៊ុយ​ក្រែ​ន​និង​គ្រីមេ បេឡា​រូស​និង​ម៉ុល​ដាវី ទាំងអស់​នេះ​ជា​ប្រទេស​របស់​យើង​”៕

​លោកពូ​ទី​បង្ហាញខ្លួន​ជា​សាធារណៈ​ដ៏​កម្រ​ចាប់​តាំងពី​ការចាប់ផ្តើម​សង្គ្រាម