​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ជួប​ទល់មុខ​គ្នា​តាម​វីដេអូ លោក​ប្រធានាធិបតី​ចូ បៃ​ដិន​របស់​អាម៉េរិក​បាននិ​យាយ​ទៅកាន់​ប្រធានាធិបតី​ចិន​ស៊ី ជីន​ភីង​កាលពី​ថ្ងៃ​សុក្រ​ទី​១៨​មីនា​ពី​ផលវិបាក​​ដ៏​ខ្លាំងក្លា​ដែល​ចិន​នឹង​ត្រូវ​ប្រឈម​មុខ​ពី​សហរដ្ឋ​អាម៉េរិក ប្រសិន​បើ​ពួកគេ​ផ្តល់​ជំនួយ​ផ្នែក​យោធា​ឬ​សេដ្ឋកិច្ច​សម្រាប់​ការឈ្លានពាន​របស់​រុស្ស៊ី​លើ​អ៊ុ​យក្រែន​។​

​មិន​មាន​ការបញ្ជាក់​ថា​គាត់​ទទួលបាន​ការធានា​ណាមួយ​ជាការ​តបស្នង​នោះទេ​។​

​តាមពិតទៅ លោក​ស៊ី​បាន​ស្តីបន្ទោស​សហរដ្ឋ​អាម៉េរិក​ចំពោះ​វិបត្តិ​នេះ ហើយ​បាន​ទទូច​ជាមួយនឹង​សុភាសិត​ចិន​ថា វិធានការ​បន្ទាប់​គឺ​អាស្រ័យ​លើ​លោកបៃ​ដិន​។​

​យោងតាម​សេចក្តីថ្លែងការណ៍​របស់​រដ្ឋាភិបាល​ចិន លោក​ស៊ី​បាន​និយាយថា “​អ្នក​ដែល​ចង​កណ្ដឹង​នឹង​សត្វ​ខ្លា​ត្រូវតែ​ស្រាយ​វា​ចេញ​វិញ​”​។​

​បន្ទាប់​ពី​ការសន្ទនា​ជិត​ពីរ​ម៉ោង ក្រសួងការបរទេស​ចិន​បានចាត់ទុក “​ជម្លោះ​និង​ការប្រឈមមុខ​ដាក់​គ្នា​” ថា​”​មិន​ផ្តល់​ផលប្រយោជន៍​ដល់​នរណាម្នាក់​ទេ​”​ប៉ុន្តែ​មិន​បាន​ស្តីបន្ទោស​រុស្ស៊ី​និង​មិន​បាន​និយាយ​​អ្វី​អំពី​ជំហាន​បន្ទាប់​នោះទេ​។​

​នៅឯ​សេត​វិមាន អ្នកនាំពាក្យ ជេ​ន សា​គី (Jen Psaki)​បាន​និយាយថា​”​ចិន​ត្រូវ​តែ​ធ្វើការ​សម្រេចចិត្ត​ដោយ​ខ្លួនឯង​អំពី​កន្លែង​ដែល​ពួក​គេ​ចង់​ឈរ​និង​របៀប​ដែល​ពួក​គេ​ចង់​ឱ្យ​សៀវភៅ​ប្រវត្តិសាស្ត្រ​​មើល​មក​ពួកគេ​និង​មើល​មក​សកម្មភាព​របស់​ពួកគេ​”​។​

​លោកស្រី​បាន​បដិសេធ​មិន​ប្រាប់​លម្អិត​អំពី​ផលវិបាក​ដែល​អាច​កើត​មាន​ដែល​លោកបៃ​ដិនបាន​បញ្ជាក់ដល់​ប្រធានាធិបតីចិនទេ ប្រសិនបើ​ប្រទេស​របស់​លោក​ផ្តល់​ការគាំទ្រ​ដល់​ការឈ្លានពាន​របស់​រុស្ស៊ី​។​

​ប៉ុន្តែ​មន្ត្រី​រដ្ឋបាល​ជាន់ខ្ពស់​ម្នាក់ ដែល​ផ្តល់​ព័ត៌មាន​សង្ខេប​ដល់​អ្នកសារព័ត៌មាន​បន្ទាប់​ពី​ការជួប​គ្នា​តាម​វីដេអូ​របស់​មេដឹកនាំ​ទាំងពីរ បាន​និយាយថា​លោក​បៃ​ដិនបាន​ចង្អុលបង្ហាញ​ពីភាព​ឯកោ​ផ្នែក​​សេដ្ឋកិច្ច​ដែល​រុស្ស៊ី​បាន​ប្រឈមមុខ រួម​ទាំង​ទណ្ឌកម្ម​ដែល​ប៉ះពាល់​ដល់​សេដ្ឋកិច្ច​និង​សាជីវកម្ម​ធំៗ​របស់​លោក​ខាងលិច​ដែល​ផ្អាក​ប្រតិបត្តិការ ខណៈ​គាត់​ព្យាយាម​គូសបញ្ជាក់​អំពី​ការខាតបង់​ដែល​ចិន​​អាច​នឹង​ទទួលរង​។​

​លោក​ស៊ី​បាន​ជំរុញ​ឱ្យ​សហរដ្ឋ​អាម៉េរិក​និង​រុស្ស៊ី ដែល​មាន​ការភ្ជាប់​ទំនាក់​ទំនង​មាន​កម្រិត​ទាប​បំផុត​ចាប់តាំងពី​ការឈ្លានពាន​កាលពី​ថ្ងៃទី ២៤ ខែ​កុម្ភៈ ធ្វើការ​ចរចា​។ ​លោក​បាន​កត់សម្គាល់​ពី​ការបរិច្ចាគ​ជំនួយ​មនុស្សធម៌​របស់​ចិន​សម្រាប់​អ៊ុយ​ក្រែន​ខណៈ​ចោទប្រកាន់​សហរដ្ឋអាម៉េរិ​ក​ថា​បាន​បង្ក​រឿង​អុចអាល​ដល់​រុស្ស៊ី​និង​បញ្ឆេះ​ជម្លោះ​ដោយ​ការដឹកជញ្ជូន​អាវុធ​​ទៅកាន់​ប្រទេស​អ៊ុ​យក្រែន​។ យោងតាម​ប្រព័ន្ធ​ផ្សព្វផ្សាយ​រដ្ឋ​បានឱ្យដឹងថា លោក​ស៊ី​ក៏​បាន​បន្ត​ការរិះគន់​របស់​ចិន​ចំពោះ​ទណ្ឌកម្ម​ដែល​ដាក់​លើ​រុស្ស៊ី​ជុំវិញ​ការឈ្លានពាន​នេះ​ផងដែរ​។ ដូច​កាលពី​មុន​ដែរ លោក​ស៊ី​មិនបាន​ប្រើ​ពាក្យ​សង្គ្រាម​ឬ​ការ​លុកលុយ​ដើម្បី​ពណ៌នា​អំពី​សកម្មភាព​របស់​រុស្ស៊ី​នោះទេ​៕

​លោកបៃ​ដិន​ជួប​លោក​ស៊ី​តាម​វីដេអូ​កាលពី​ថ្ងៃ​សុក្រ