​ដោយ​៖ សុវណ្ណ​កុម្ភៈ / ភ្នំពេញ​៖ នាយ​បេសកកម្ម សម្រាប់​ការប្រកួត​កីឡា​ស៊ី​ហ្គេម លើក​ទី​៣១ របស់​កម្ពុជា លោក វ៉ា​ត់ ចំរើន បាន​ថ្លែងប្រាប់​ពី​ទីក្រុង​ហាណូយ មក​ថា កិច្ចប្រជុំ របស់​នាយ​បេសកកម្ម នៃ​បណ្ដា​ប្រទេស​អាស៊ាន ដែល​កំពុងតែ​ធ្វើ​នៅ​ទីក្រុង​ហាណូយ គឺ​ជជែក​គ្នា​ដោយ​សង្កត់ធ្ងន់ ទៅលើ​ការប្រកួត​កីឡា​ស៊ី​ហ្គេម លើក​ទី​៣១ ពីថ្ងៃ​ទី​១២ ដល់ ២៣ ឧសភា ។​

​កិច្ចប្រជុំ​ដែល​ធ្វើឡើង ក្រោម​ការចូលរួម​ពី​សំណាក់ លោក Nguyen Van Hung ដែលជា​រដ្ឋមន្ត្រីក្រសួង​វប្បធម៌ ទេសចរណ៍​កីឡា​វៀតណាម និង​ជា​ប្រធាន​គណៈកម្មាធិការ ជាតិ​អូឡាំពិក​វៀតណាម បាន​បើក​កិច្ចប្រជុំ​ដោយផ្ទាល់ និង​តាម​អន​ឡាញ ជាមួយ​បណ្ដា នាយ​បេសកកម្ម​ដែលជា​សមាជិក​អាស៊ាន ។​

​ក្នុង​កិច្ចប្រជុំ​នេះ បានធ្វើ​បទ​បង្ហាញ អំពី​ការ​ស្នាក់នៅ ហូបចុក ការដឹកជញ្ជូន ការទទួល​បដិសណ្ឋារកិច្ច រួមជាមួយ​វិធានការ ទប់ស្កាត់​ជំងឺ​កូ​វីដ ១៩ ព្រមទាំង​បង្ហាញ អំពី​ទី​លាន​សម្រាប់​ដំណើរការ​ប្រកួត​ទៀតផង ។​

​លោក វ៉ា​ត់ ចំរើន បានចាត់ទុក​ថាៈ ការប្រជុំ​នាយ​បេសកកម្ម​នេះ សំខាន់​ខ្លាំងណាស់ ដើម្បី​ឲ្យ​ថ្នាក់ដឹកនាំ នៃ​គណៈកម្មកា​ជំនាញ របស់​គណៈកម្មាធិការ​ជាតិ រៀបចំ​ស៊ី​ហ្គេម ឆ្នាំ​២០២៣ (CAMSOC) បាន​សិក្សា​ស្វែងយល់ ពី​វិធាន​នៃ​ការរៀបចំ​ស៊ី​ហ្គេម បន្តវេន លើក​ទី​៣២ ឆ្នាំ​២០២៣ នៅ​កម្ពុជា ។ ពត៌មាន​ទាំងអស់ ដែល​ពាក់ព័ន្ធ​នឹង​ការគ្រប់គ្រង ដំណើរការ​អនុវត្តន៍ រៀបចំ​ស៊ី​ហ្គេម​ការផ្លាស់ប្ដូរ​យោបល់​គ្នា ពិសេស​ការថែរក្សា​កីឡាករ កីឡាការិនី ក្នុងពេល​ប្រកួត​។ ក្នុងករណី​មាន​កីឡាករ ឬ កីឡាការិនី កើត​ជំងឺ​កូ​វីដ ១៩ ក្នុងអំឡុងពេល​ប្រកួត ត្រូវ​ព្យាបាល​យ៉ាងម៉េច ហើយ​ត្រូវ​ហាមឃាត់ របៀប​ណាខ្លះ​? នេះ​ជា​បញ្ហាសំខាន់ៗ ត្រៀម​យកមក​អនុវត្តន៍ ក្នុង​ស៊ី​ហ្គេម​លើក​ទី​៣២ ឆ្នាំ​២០២៣ ដែល​កម្ពុជា ធ្វើជា​ម្ចាស់ផ្ទះ​នោះ​។​

​លោកនាយ​បេសកកម្ម​របស់​កម្ពុជា បាន​អះអាងថាៈ ភាគី​វៀតណាម បាន​ស្វាគមន៍​ប្រតិភូ​ទាំងអស់ យ៉ាង​យកចិត្តទុកដាក់ ។ កិច្ចប្រជុំ​ថ្ងៃ​ដំបូង បានទទួល​លទ្ធផល​ល្អ ម្ចាស់ផ្ទះ​វៀតណាម បាន​លើកទឹកចិត្ត ដល់​បណ្ដា​ប្រទេស ក្នុង​តំបន់​អាស៊ីអាគ្នេយ៍​ទាំងអស់ ចុះឈ្មោះ​ឲ្យ​បាន​រួសរាន់ ព្រោះ​ការចុះឈ្មោះ ត្រូវបាន​ពន្យារ រហូតដល់​ថ្ងៃទី​៣១ មីនា ទើប​បិទ​បញ្ជី ។ ម្ចាស់ផ្ទះ ក៏បាន​ស្នើ​ដល់​បណ្ដា​ប្រទេស​ទាំងអស់ ជួយ​ជំរុញ​ឲ្យ​ស៊ី​ហ្គេម លើក​ទី​៣១ បានទទួល​លទ្ធផល​ល្អ ។​

​សូមបញ្ជាក់ថា កាលពី​រសៀល ថ្ងៃទី​១៨ មីនា ក៏មាន​កិច្ច​ពិភាក្សាគ្នា លក្ខណៈ​ជំនាញ បច្ចេកទេស រវាង​គណៈកម្មាធិការ​រៀបចំ ការប្រកួត​ស៊ី​ហ្គេម​វៀតណាម និង​ក្រុម​ប្រតិភូ គណៈកម្មាធិការ​ជាតិ រៀបចំ​ស៊ី​ហ្គេម​កម្ពុជា ( CAMSOC) ។​

​លោក វ៉ា​ត់ ចំរើន បាន​វាយតម្លៃ​ខ្ពស់ ចំពោះ​ការខិតខំ​របស់ ក្រុម​ប្រតិភូ​កម្ពុជា និង​សង្ឃឹមថា ការចូលរួម​របស់​ក​ម្ពុ​ជា ក្នុង​បេសកកម្ម ជា​ប្រវត្តិសាស្ត្រ​នេះ ដើម្បី​យកទៅអនុវត្ត​ស៊ី​ហ្គេម បន្តវេន ឆ្នាំ​២០២៣ ឲ្យ​ទទួលបាន​ជោគជ័យ​។ អ្វីដែល​ពិសេស លោកនាយ​បេសកកម្ម ក៏​សម្តែង​ការដឹងគុណ ដ៏​ជ្រាលជ្រៅ​បំផុត ជូន​ចំពោះ សម្តេច​ពិជ័យ​សេនា ទៀ បាញ់ ឧបនាយក​ដ្ឋ​មន្ត្រី រដ្ឋមន្ត្រី ក្រសួងការពារជាតិ និង​ជា​ប្រធាន​គណៈកម្មាធិការ​ជាតិ CAMSOC និង លោក​បណ្ឌិត ថោង ខុន ប្រធាន​គណៈកម្មាធិការ​ជាតិ​អូឡាំពិក​ម្ពុ​ជា និង​ជា​អនុប្រធាន​អចិន្ត្រៃយ៍ CAMSOC ដែល​បានចង្អុលបង្ហាញ ដល់​ក្រុម​ប្រតិភូ កីឡា​កម្ពុជា នៅក្នុង​បេសកកម្ម ដ៏​មាន​សារៈសំខាន់ រយៈពេល ៣ ថ្ងៃនេះ​៕/V​