ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អ្នកនាំពាក្យ​ការិយាល័យ​របស់​នាយក​រដ្ឋមន្ត្រី​ម៉ា​រី​អូ ដ្រា​ហ្គី (Mario Draghi) បាន​និយាយ​កាលពី​ថ្ងៃ​សុក្រ​ទី​១៨​មីនា​ថា​អ៊ីតាលី​បាន​រឹបអូស​អគារ​មួយ​​នៅលើ​កោះ​សា​ឌី​នីញ៉ា (Sardinia) នៅ​តំបន់​សមុទ្រ​មេ​ឌី​ទែ​រ៉ាណេ ដែល​មាន​តម្លៃ​ប្រហែល ១០៥ លាន​អឺរ៉ូ (​ជាង​១១៦​លាន​ដុល្លារ​) ដែល​ជា​កម្មសិទ្ធិ​របស់​អ្នកជំនួញ​រុស្ស៊ី​លោក អា​ឡិច​ស៊ី ម៉ូ​ដា​សូវ (Alexei Mordashov)​។​

​ប្រតិបត្តិការ​នេះ​គឺជា​ផ្នែក​មួយ​នៃ​ការជំរុញ​យ៉ាង​ទូលំទូលាយ​របស់​លោក​ខាងលិច​ដើម្បី​ដាក់ទណ្ឌកម្ម​មហាសេដ្ឋី​រុស្សី​ដែលមាន​ទំនាក់ទំនង​ជាមួយ​ប្រធានាធិបតី វ្ល៉ា​ឌី​មៀរ ពូ​ទីន​បន្ទាប់ពី​ការ​លុកលុយ​​អ៊ុយ​ក្រែន​កាលពី​ថ្ងៃទី ២៤ ខែ​កុម្ភៈ​។​

​វា​ជា​លើក​ទី​ពីរ​ក្នុង​ខែ​នេះ ដែល​ទ្រព្យសម្បត្តិ​របស់​លោក​ម៉ូ​ដា​សូវ ត្រូវបាន​រឹបអូស​នៅក្នុង​ប្រទេស​អ៊ីតាលី​។ កាលពី​ថ្ងៃទី ៤ ខែ​មីនា​ប៉ូលិស​បាន​ឃាត់​នាវា​កម្សាន្ត​ប្រវែង ៦៥ ម៉ែត្រ​របស់គាត់ ឈ្មោះ “Lady M” ដែល​មាន​តម្លៃ ៦៥ លាន​អឺរ៉ូ​។​

​លោក​ម៉ូ​ដា​សូវ​អាយុ ៥៦ ឆ្នាំ​គឺជា​កូនប្រុស​របស់​កម្មករ​រោង​ម៉ាស៊ីនកិនស្រូវ​មួយ ដែល​បាន​ក្លាយជា​មហាសេដ្ឋី​ដែកថែប​មាន​ទ្រព្យសម្បត្តិ​ប៉ាន់ស្មាន​ចំនួន ២៩,១ ពាន់​លាន​ដុល្លារ​អាម៉េរិក​។​

​ក្នុង​រយៈពេល​ពីរ​សប្តាហ៍​ចុងក្រោយ​នេះ ប៉ូលិស​អ៊ីតាលី​បាន​រឹបអូស​ផ្ទះ​វីឡា​និង​នាវា​កម្សាន្ត ដែល​មាន​តម្លៃ​ជាង ៧៨០ លាន​អឺរ៉ូ​ពី​អ្នក​មាន​ស្តុកស្តម្ភ​រុស្ស៊ី​ចំនួន ៧ នាក់ ដែល​ត្រូវបាន​ដាក់​ក្នុង​បញ្ជី​ទណ្ឌកម្ម​របស់​សហភាព​អឺរ៉ុប​បន្ទាប់​ពី​ការ​វាយលុក​លើ​អ៊ុ​យក្រែន​។​

​ទ្រព្យសម្បត្តិ​ថ្លៃ​បំផុត​ដែល​រឹបអូស​បាន​រហូត​មក​ទល់​ពេល​នេះ គឺ នាវា​ទំនើប​របស់​មហាសេដ្ឋី អង់​ដ្រេ អ៊ី​ហ្គោរី​វិច មែ​ល​នី​ឆេន​កូ (Andrey Igorevich Melnichenko) ដែល​មាន​តម្លៃ​ប្រហែល ៥៣០ លាន​អឺរ៉ូ ហើយ​ត្រូវបាន​ឃាត់ទុក​នៅ​ទីក្រុង​កំពង់ផែ ទ្រី​អេ​ស្តេ (Trieste) ភាគ​ខាងជើង​ប្រទេស​កាលពី​ថ្ងៃ​សៅរ៍​សប្តាហ៍​មុន​៕

អ្នកជំនួញ​រុស្ស៊ី​លោក អា​ឡិច​សី ម៉ូ​ដា​សូវ​