ដោយៈ វ៉ៃ​កូ / ស្វាយរៀងៈ មនុស្ស​ប្រុស​ស្រី​ចំនួន បួន​នាក់ បាន​ស្លាប់​ភ្លាមៗ ក្នុងនោះ មាន ក្មេងប្រុស​ម្នាក់ និង​បុរស​ម្នាក់ រងរបួស​ធ្ងន់ ដោយសារ​រថយន្ត បែន​ដឹក​ដី បើកបរ​ក្នុង​ល្បឿន លឿន ដូច​ហោះ ដល់​ផ្លូវបែក​ជា​បួន បុក​រថយន្ត តូយ៉ូតា ហាយ​ឡែ​ន​ឌ័​រ ខ្ទប់​នឹង​បង្គោល​ភ្លើង​។​

​ករណី​គ្រោះថ្នាក់​ចរាចរណ៍​នេះ បានកើត​ឡើង កាលពី​វេលា​ម៉ោង ៤​និង​១០​នាទី ទៀបភ្លឺ ថ្ងៃទី ១៩ ខែមីនា ឆ្នាំ​២០២២ ស្ថិតនៅលើ​ផ្លូវជាតិ​លេខ​១ ត្រង់​ចន្លោះ គីឡូម៉ែត្រ​លេខ ១២៦ និង ១២៧ ស្ថិតក្នុង​ភូមិ​បាក់​រនាស់ សង្កាត់​សង្ឃ័រ ក្រុង​ស្វាយរៀង​។​

​សមត្ថកិច្ច បាន​ឲ្យ​ដឹងថាៈ ជនរងគ្រោះ ដែល​បាន​ស្លាប់​ទាំង បួន​នាក់​នោះ មានៈ ១.​ឈ្មោះ ស៊ុន ស្រី​ណង ភេទ​ស្រី អាយុ ៤៤ ឆ្នាំ , ២.​ឈ្មោះ ពេជ្រ ដាំ ភេទ​ប្រុស អាយុ ៤៨ ឆ្នាំ ពីរ​នាក់​នេះ មានមុខ​របរ លក់ដូរ និង​រស់នៅ ភូមិ​ជ្រៃ​ធំ សង្កាត់ ព្រៃ​អ​ង្គុ​ញ ក្រុង​បាវិត ខេត្តស្វាយរៀង​, ៣.​ឈ្មោះ ទីវ ឡ​ន ភេទ ស្រី អាយុ ៣២ ឆ្នាំ មានមុខ​របរ កម្មករ​រោងចក្រ រស់នៅ​ភូមិ​ដើម​ពោធិ៍ ឃុំ​ស្វាយ​តា​យាន ស្រុក​កំពង់រោទិ៍ ខេត្តស្វាយរៀង និង​៤.​ឈ្មោះ លុន រតនា ភេទ​ប្រុស អាយុ ៨ ឆ្នាំ មានមុខ​របរ សិស្ស រស់នៅ​ភូមិ​ដើម​ពោធិ៍ ឃុំ​ស្វាយ​តា​យាន ស្រុក​កំពង់រោទិ៍ ខេត្តស្វាយរៀង ។ ចំណែក​អ្នកបើកបរ រថយន្ដ​ម៉ាក​តូយ៉ូតា ហាយ​ឡែ​ន​ឌ័​រ ពណ៌​បៃតង ពាក់​ស្លាក​លេខ ភ្នំពេញ ២BD ១១៤១ ឈ្មោះ ហឹម ដា​នី ភេទ​ប្រុស អាយុ ៣៤ ឆ្នាំ មុខរបរ អ្នករត់​តាក់​សុ​ី រស់នៅ​ភូមិ​គោក​ល្វាង សង្កាត់​ព្រៃ​អ​ង្គុ​ញ ក្រុង​បាវិត ខេត្តស្វាយរៀង បាន​រងរបួស​ធ្ងន់​។​

​រីឯ​ភាគី​បង្កហេតុ គឺ​រថយន្ត​បែន​ដឹក​ដី ម៉ាក SCANIA ពណ៌ ស ពាក់​ស្លាក​លេខ កំពង់ចាម ៣B ០៣៣២ បើកបរ​ដោយ​ឈ្មោះ យឿន ភារ​ម្យ ភេទ​ប្រុស អាយុ ៣០ ឆ្នាំ មុខរបរ ជា​អ្នកបើកបរ រស់នៅ​ភូមិ​តា​ជោរ ឃុំ​សង្កែ ស្រុក​រំដួល ខេត្តស្វាយរៀង បាន​ត្រូវ​សមត្ថកិច្ច ឃាត់ខ្លួន ដោយ​គ្មាន​របួស ប៉ុន្តែ​រថយន្ដ ខូចខាត​ធ្ងន់ ។

​សមត្ថកិច្ច បានបញ្ជាក់​ថាៈ នៅ​មុនពេល​កើតហេតុ មាន​រថយន្ដ​បែន​ដឹក​ដី ម៉ាក SCANIA ពណ៌ ស ពាក់​ស្លាក​លេខ កំពង់ចាម ៣B ០៣៣២ បានធ្វើ​ដំណើរ ពី​ទិស​ខាងជើង ទៅខាង​ត្បូង ក្នុង​ល្បឿន​យ៉ាង​លឿន ហើយ​នៅពេល​មកដល់ ចំណុចកើតហេតុ​ខាងលើ បាន​បុក​រថយន្ដ ម៉ាក​តូយ៉ូតា ហាយ​ឡែ​ន​ឌ័​រ ពណ៌​បៃតង ពាក់​ស្លាក​លេខ ភ្នំពេញ ២BD ១១៤១ ដែល​បើកបរ​ពី​ទិសខាងកើត ទៅខាង​លិច បណ្ដាលឱ្យ​អ្នកបើករថយន្ដ ម៉ាក​តូយ៉ូតា ហាយ​ឡែ​ន​ឌ័​រ រងរបួស​ធ្ងន់ ចំណែកឯ​អ្នករួមដំណើរ​ជាមួយ ចំនួន បួន​នាក់ បាន​ស្លាប់ នៅ​កន្លែងកើតហេតុ​តែម្ដង​។​

​ក្រោយពី​កើតហេតុ​ភ្លាមៗ សមត្ថកិច្ច​បាន​ចុះមក​ជួយសង្គ្រោះ​ជនរងគ្រោះ និង​សម្រួល ចរាចរណ៍ ។ ចំណែក​សព​ប្រគល់អោយ​ក្រុមគ្រួសារ ។ ឯ​អ្នក​រង របួស នាំយកទៅ​សង្គ្រោះ បន្ទាន់ នៅ​មន្ទីរពេទ្យបង្អែក ខេត្តស្វាយរៀង ចំណែក​មធ្យោបាយ​ទាំង ២ គ្រឿង រក្សាទុក នៅ​ការិយាល័យ​ចរាចរណ៍ ខេត្តស្វាយរៀង ។​

​សមត្ថកិច្ច​ជំនាញ បានបញ្ជាក់​ទៀតថាៈ មូល​ហេតុដែល​បណ្តាល​ឲ្យ​កើត មាន​គ្រោះថ្នាក់ ចរាចរណ៍​ខាងលើនេះ គឺ​អ្នកបើកបរ​រថយន្ដ​បែន​ដឹក​ដី ប្រើប្រាស់​ល្បឿន​លឿន មិន​គោរព​សិទ្ធិ​អាទិភាព ៕/V​-PC