ដោយៈ សុវណ្ណ​កុម្ភៈ​/​ភ្នំពេញៈ លោក វ៉ា​ត់ ចំរើន នាយ​បេសកកម្ម​របស់​កម្ពុ​ជាស​ម្រា​ប់​ស៊ី​ហ្គេម​បាន​ប្រាប់​ឲ្យ​ដឹង​ពី​ទីក្រុង​ហាណូយ​មក​ថា ម្ចាស់ផ្ទះ​វៀតណាម​បាន​បើ​ភ្លើង​ខៀវ​ជួយ​ដល់​កម្ពុ​ជានា​ស៊ី​ហ្គេម​ឆ្នាំ​២០២៣​ដែល​កម្ពុជា​ធ្វើជា​ម្ចាស់ផ្ទះ​ក្នុងនាម​ជា​ប្រទេស​មាន​អាទិភាព​ទៀតផង ។​

​លោក​មានប្រសាសន៍​បែបនេះ​នា​រសៀល​ថ្ងៃទី​១៩ មីនា ក្នុងអំឡុង​ង​ដែល​ប្រតិភូ​កម្ពុជា​ចូលរួម​ទស្សនកិច្ច​តាម​ទីលាន​ប្រកួត​នានា​ពិសេស​ពហុ​កីឡដ្ឋាន​ដែល​ត្រៀម​សម្រាប់​ពិធី​បើក​​និង​បិទ​ស៊ី​ហ្គេម​លើក​ទី​៣១​តែម្ដង ។​

​ទីលាន​ប្រកួត​មួយចំនួន​ត្រូវបាន​រៀបចំ​តុបតែង​រួចរាល់​ហើយ​តែ​ក៏មាន​ទីលាន​មួយចំនួន​​មិនទាន់​រៀបចំ​រួចរាល់​នោះទេ​។​កម្ពុជា​និង​បណ្ដា​ប្រទេស​ជា​សមាជិក​អាស៊ាន​មាន​ជំនឿ​ចិត្ត​ថា​ពេលវេលា​ដែល​សល់​ជាង​មួយខែ​ទៀត​នោះ​វៀតណាម​នឹង​រៀបចំ​ទាន់ពេលវេលា​គ្រប់​ហេដ្ឋារចនាសម្ព័ន្ធ​ទាំងអស់ ។​លោកនាយ​បេសកកម្ម​បន្ដថា​អ្វីដែល​សំខាន់​សម្រាប់​ការប្រជុំ​លើក​នេះ​ប្រតិភូ​កម្ពុជា​បានស្នើ​សុំ​នូវ​ចំណុច​មួយចំនួន​ឲ្យ​វៀតណាម​ជួយ​ដែល​ក្នុងនោះ​រួមមាន​៖

​ទី​១៖​កម្ពុជា​នឹង​បញ្ជូន​ប្រតិភូ​និង​អត្ដ​លិ​ក​ទ្រង់ទ្រាយ​ធំ​ជាង​៥០០​នាក់​ក្នុងនោះ​មាន​ប្រតិភូ​ចូលរួម​សិក្សា​ស្រាវជ្រាវ​របស់ CAMSOC និង​សហព័ន្ធ​កីឡា​ជាតិ (​នាយក​បច្ចេកទេស​)​។ ហេតុនេះ​យើង​សំណូមពរ​ឲ្យ​ម្ចាស់ផ្ទះ​ជួយ​សម្របសម្រួល​រៀប​ចំការ​ស្នាក់នៅ​ហូបចុក​ការដឹក​​ជញ្ជូន​ក៏ដូចជា​រៀបចំ​ការផ្ទេរ​ចំណេះដឹង​ទៅវិញទៅមក​ឮ​ដល់​ប្រតិភូ​របស់​យើង​។​ពិសេស​ការរៀបចំ​កម្រិត​បដិសណ្ឋារកិច្ច​ជាន់ខ្ពស់ ជូន​សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី​ក្រសួងការពារជាតិ និង​ជា​ប្រធាន​គណៈកម្មាធិការ​ជាតិ CAMSOC ដែល​ត្រូវ​អញ្ជើញ​ចូលរួម​ក្នុង​ពិធី​ផ្ទេរសិទ្ធិ​និង​ទទួល​ទង់​ស៊ី​ហ្គេម​ដល់​កម្ពុជា​បន្ដវេន​ធ្វើ​ម្ចាស់ផ្ទះ​ស៊ី​ហ្គេម នា​ឆ្នាំ​២០២៣​។​នេះ​ជា​អ្វីដែល​យើង​ត្រូវ​យកចិត្តទុកដាក់ ទាំង​សុវត្ថិភាព បដិសណ្ឋារកិច្ច និង​ពិធីការ ជាមួយ​ម្ចាស់ផ្ទះ​ហើយ​ម្ចាស់ផ្ទះ​បាន​ត្រៀម​ជួយ​ដល់​កម្ពុជា​ក្នុង​ដំណើរ​ទស្សនកិច្ច​ពិសេស​របស់​សម្ដេច​ពិជ័យ​សេនា ព្រមទាំង​ប្រតិភូ ដែលមាន​មន្ដ្រីជាន់ខ្ពស់​ថ្នាក់​រដ្ឋមន្ដ្រី​មួយចំនួនទៀត ដែល​ត្រូវ​អញ្ជើញ​ចូលរួម​ពិធី​បើក​-​បិទ​ការប្រកួត​ផងដែរ​។​

​ទី​២៖​ស្នើសុំ​ការយោគយល់ និង​ផ្ដល់នូវ​ការហ្វឹកហាត់​មុន​ព្រឹត្តិការណ៍​ស៊ី​ហ្គេម នៅ​វៀតណាម ដោយ​ប្រតិភូ​កម្ពុជា បាន​ស្នើសុំ​ផ្ដល់ជូន​នូវ​កម្មវិធី​ហ្វឹកហាត់​មុន​ស៊ី​ហ្គេម ១​ខែ ឬ ជាង​១​ខែ នេះ ដល់​ប្រភេទ​កីឡា​មួយចំនួន ដូចជា​កីឡា​វ៉ូ​វី​ណា​ម កីឡាហែលទឹក និង​កីឡា​កាយសម្ព័ន្ធ ដែល​យើង​ស្នើសុំ​ឲ្យ​វៀតណាម​ផ្ដល់នូវ​ការ​គាំពារ និង​គាំទ្រ ក៏ដូចជា​រៀបចំ​ទទួល​ប្រភេទ​កីឡា ៣ នេះ​។​

​លោក វ៉ា​ត់ ចំរើន បន្ដថា នេះ​គឺជា​អ្វីដែល​យើង​បាន​ពិភាក្សាគ្នា ហើយ​ភាគី​វៀតណាម បានទទួល​យក​ហើយ​ថា​កម្ពុជា​គឺជា​មិត្ត​ល្អ​កម្ពុជា​អាច​ត្រូវបាន​វៀតណាម​ចាត់ទុកថា​នឹងធ្វើ​បដិសណ្ឋារកិច្ច​ការទទួល​និង​ផ្ដល់នូវ​អាទិភាព​តាម​សំណូមពរ​របស់​កម្ពុជា​គឺជា​អ្វីដែល​យើង​ធ្វើការ​នៅទីនេះ​ទាំង​ព្រឹក​ទាំង​ល្ងាច​ដែល​យើង​មាន​ការងារ​ប្រជុំ​ផង​ពិនិត្យ​ទីលាន​ផង​និង​ពិគ្រោះ​យោបល់​ជាមួយ​ភាគី​ពាក់ព័ន្ធ​ផង ។​

​ជាមួយគ្នា​នោះ គ្រប់​បណ្ដា​ប្រទេស ដែល​បាន​ចូលរួម​ប្រជុំ​នាយ​បេសកកម្ម​ខាងលើ បាន​អបអរសាទរ ចំពោះ​ភាព​រីកចម្រើន​នៃ​ការត្រៀមខ្លួន​ធ្វើ​ម្ចាស់ផ្ទះ​ស៊ី​ហ្គេម ឆ្នាំ​២០២៣ របស់​កម្ពុជា និង​ត្រៀម​ចូលរួម​ប្រជុំ​ក្រុមប្រឹក្សា​កីឡា​អាស៊ីអាគ្នេយ៍ លើក​ទី​១ នៅ​ខេត្តសៀមរាប ពីថ្ងៃ​ទី​០៨-១០ ខែមេសា​ខាងមុខ ពិសេស​បាន​សន្យា​នឹង​បញ្ជូន​ប្រតិភូ និង​អត្ត​ព​លិ​ក​ចូលរួម ក៏ដូចជា​បង្ហាញ​នូវ​ការគាំទ្រ ចំពោះ​ការប្រកួត​កីឡា​ស៊ី​ហ្គេម​ជា​ប្រវត្តិសាស្ដ្រ​នៅ​កម្ពុជា​ទៀតផង ។​

​សូមបញ្ជាក់ថា ក្រោម​ការណែនាំ​ដ៏​ខ្ពង់ខ្ពស់​របស់​សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី​ក្រសួងការពារជាតិ​និង​ជា​ប្រធាន CAMSOC ក៏ដូចជា​លោក​បណ្ឌិត ថោង ខុន រដ្ឋមន្ដ្រី​ក្រសួងទេសចរណ៍ និង​ជា​អនុប្រធាន​អចិន្ដ្រៃយ៍ CAMSOC គឺ​បាន​បញ្ជូន​ប្រតិភូ ១​ក្រុម ដឹកនាំ​ដោយ​ឯកឧត្តម វ៉ា​ត់ ចំរើន ចូលរួម​ប្រជុំ​នាយក​បេសកកម្ម​នៅ​ទីក្រុង​ហាណូយ​ហើយ​ធ្វើការ​ស្រាវជ្រាវ​និង​ផ្លាស់ប្ដូរ​យោបល់​ពិសេស​ក្រេប​យក​បទពិសោធន៍​ល្អៗ​សម្រាប់​ត្រៀម​រៀបចំ​ការប្រកួត​កីឡា​ស៊ី​ហ្គេម ឆ្នាំ​២០២៣ នៅ​កម្ពុជា​៕​