ដោយៈ ប​.​ជ័យ / បន្ទាយ​មាន​ជ័​យៈ បុរស​ម្នាក់ អស់​ចិត្តនឹង​ប្រពន្ធ ជាង ១ ឆ្នាំ​ហើយ តែ​នៅ​ចិញ្ចឹមចិត្ត​គុំកួន ប៉ង​ធ្វើឃាត​ប្រពន្ធ និង​ឪពុក ម្តាយក្មេក ដោយ​សម្តែង​គំនុំ​នោះ ក្នុង​រូបភាព​យក​សាំង ៣ ដប​ទឹក​សុទ្ធ ចាក់​ស្រោច បង្កាត់ភ្លើង​ដុត​ផ្ទះ ប៉ុន្តែ​អ្នកភូមិ បាន​ជួយ​ទាន់ ហើយ​សង្គ្រោះ អតីត​ប្រពន្ធ និង​អតីត​ឪពុក​ម្តាយក្មេក ចេញ ផុតពី​គ្រោះ​ព្យាបាទ​នោះ ។​

​រឿងរ៉ាវ​នេះ បានកើត​ឡើង នៅវេលា​ម៉ោង ៧ យប់​ថ្ងៃទី​១៨ ខែមីនា ឆ្នាំ​២០២២ នៅ​ចំណុច​ភូមិ​វត្ត​ចាស់ ឃុំ​ថ្មពួក ស្រុក​ថ្មពួក ខេត្តបន្ទាយមានជ័យ​។​

​មន្ត្រីនគរបាល​ស្រុក​ថ្មពួក បាន​ប្រាប់​ឲ្យ​ដឹងថាៈ ជនសង្ស័យ មានឈ្មោះ រីក ទូ​រី ភេទ​ប្រុស អាយុ ៣៩ ឆ្នាំ រស់នៅ​ភូមិ​ថ្នល់​ដាច់ ឃុំ​ថ្មពួក ស្រុក​ថ្មពួក​។​

​មន្ត្រី​ដដែល បាន​បន្តថាៈ បុរស​នេះ មាន​គំនុំ ដោយនៅ​ចិញ្ចឹមចិត្ត ប៉ុនប៉ង​ថា​នឹង​សម្លាប់ អតីត​ឪពុក ម្តាយក្មេក និង​អតីត​ប្រពន្ធ ព្រោះ​គិតថា បើ​ខ្លួន​លែង​បាន នៅក្នុង​គ្រួសារ​នេះ គ្រួសារ​នេះ ក៏​មិន​ត្រូវបាន​ទៅ​អ្នកណា​ដែរ​។ ហេតុនេះ ពេល​កើតហេតុ យប់​ស្ងាត់​នោះ យាយ និង​តា និង​កូន នៃ​គ្រួសារ បាន​ស្ថិតនៅ​ក្នុងផ្ទះ ។ ពេលនោះ ជនសង្ស័យ បាន​យក​សាំង ចំនួន ៣ ដប​ទឹក​សុទ្ធ និង​ចន្លុះ ១​ដើម ដែកកេះ​ចំនួន​១ ទៅ​ចាក់​បង្កាត់​ដុត​បន្ទះក្ដារ ឈើមូល ១​កំណាត់ ប្រវែង​កន្លះ​ម៉ែត្រ ហើយ​បាន​យក ទៅ​រុញ​ដុត​ផ្ទះ​នោះ​។​

​ពេលនោះ យាយ តា បាន​ចេញមក​ប្រតាយប្រតប់ យ៉ាងខ្លាំង ជាមួយ​ជនសង្ស័យ ។ ប៉ុន្តែ ដោយ​កម្លាំង​ខ្សោយ យាយ​តា (​អតីត​ឪពុក​ម្ដាយក្មេក​) នាំគ្នា​រត់​ចូលទៅ​បន្ទប់ ក្នុងផ្ទះ​បិទទ្វារ​។ ឯ​ជនបង្ករ​លោត​ធាក់​ទ្វារ និង​ជញ្ជាំង​ផ្ទះ ហេ​ី​យ​បាន​យក​សាំង ចំនួន​មួយ​ដប ទឹក​សុទ្ធ ចាក់​ស្រោច ទៅលើ​ជញ្ជាំង​ផ្ទះ និង​ស្រែក​គំរាមថា នឹង​ដុត​សម្លាប់​ទាំងអស់ ។ ប៉ុន្តែ​មិនបាន សំរេច ដោយសារ​កូន និង​អ្នកជិតខាង ទៅ​ជួយ​ឃាត់​ទាន់ និង​ចាប់​ឃាត់ បាន​ជនសង្ស័យ ប្រគល់​ទៅ​ឲ្យ​សមត្ថកិច្ច​។

​សមត្ថកិច្ច បាន​បន្តថាៈ ជនរងគ្រោះ មានឈ្មោះ ជួប លាភ ភេទ​ប្រុស អាយុ ៦៩ ឆ្នាំ រស់នៅ​ភូមិ​វត្ត​ចាស់ ឃុំ​ថ្មពួក ស្រុក​ថ្មពួក ខេត្តបន្ទាយមានជ័យ​។​

​ចំណែក​ជនសង្ស័យ បាន​ឆ្លើយ​សារភាពថាៈ ខ្លួន​ក៏​រងគ្រោះ​ដែរ ដោយសារ​គ្រួសារ​នេះ បង្ខំ​អោយ​ចាកចេញ ហើយ​ខ្លួន​មិន​អត់ទ្រាំ​ថា ត្រូវតែ​សងសឹក​មិនបាន ទើប​បញ្ចេញ​កំហឹង បែបនេះ ។​

​កម្លាំង​នគរបាល​ស្រុក​ថ្មពួក បាន​ចាប់បញ្ជូន​ជនសង្ស័យ មក​ការិយាល័យ​ព្រហ្ម​ទ័​ណ្ឌ​កម្រិតធ្ងន់ នៃ​ស្នងការដ្ឋាន​នគរបាល​ខេត្តបន្ទាយមានជ័យ ដើម្បី​សួរចម្លើយ​បន្ថែម និង​រៀបចំ​សំណុំរឿង បញ្ជូនទៅ​តុលាការ ដើម្បី​ចាត់ការ​តាម​នីតិវិធី​៕/V​