ដោយ៖តារារិទ្ធ/ភ្នំពេញ៖តាមការគ្រោងទុកនៅវេលាម៉ោង ១៤៖៥៥ នាទីរសៀលថ្ងៃទី២០ ខែមីនា ២០២២ នេះ លោក គីស៊ីដា ហ្វឹមីអូ (KISHIDA Fumio) នាយករដ្ឋមន្រ្តីជប៉ុន នឹងមកដល់ព្រលានយន្តហោះអន្តរជាតិភ្នំពេញតាមជើងយន្តហោះពិសេសដើម្បីបំពេញទស្សនកិច្ចផ្លូវការនៅព្រះរាជាណាចក្រកម្ពុជារយៈពេល២ ថ្ងៃ ដោយចាប់ពីថ្ងៃទី២០ ដល់២១ ខែមីនា ឆ្នាំ២០២២។

លោកនាយករដ្ឋមន្ត្រី​ជប៉ុន​លោក ហ្វូមីអូ គីស្សីដា (Fumio Kishida)

សេចក្តីប្រកាសព័ត៌មានរបស់ក្រសួង​ការបរទេស​កម្ពុជាបានប្រកាស​ថានាយករដ្ឋមន្ត្រី​ជប៉ុន​លោក ហ្វូមីអូ គីស្សីដា (Fumio Kishida)នឹង​ជួបពិភាក្សា​ទ្វេភាគីជាមួយសម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដើម្បី​ពិភាក្សា​អំពី​ការ​ពង្រឹង​ទំនាក់ទំនងនិង​កិច្ច​សហប្រតិបត្តិការរវាង​ប្រទេស​ទាំងពីររួមមាន​ក្នុង​វិស័យ​ពាណិជ្ជកម្ម វិនិយោគ អប់រំ ហេដ្ឋារចនាសម្ព័ន្ធ សន្តិសុខនិង​ការ​ស្តារ​សង្គម​-​សេដ្ឋកិច្ច​ឡើងវិញក្រោយពី​វិបត្តិ​នៃ​ជំងឺ​កូ​វីដ​១៩ ព្រមទាំង​វិស័យ​ផ្សេងៗ​ទៀតព្រមទាំងផ្លាស់ប្តូរទស្សនៈលើ​បញ្ហា តំបន់និងអន្តរជាតិដែលជាផលប្រយោជន៍និងកង្វល់រួម ។ បន្ទាប់ពីជំនួបនោះនឹងមានពិធីចុះហត្តលេខានិងសន្និសីទកាសែតរួមគ្នា ។ នៅរាត្រីថ្ងៃទី ២០ ខែ ​មីនា សម្តេចតេជោ​ ហ៊ុន សែន មានរៀបចំពិធី ជប់លៀងជាផ្លូវការជូននាយករដ្ឋមន្ត្រីជប៉ុននិងគណៈប្រតិភូនៅវិមានសន្តិភាព។

ក្នុង​អំឡុងពេល​ទស្សន​កិច្ច​នេះ​ដែរលោក KISHIDA Fumio នឹងអញ្ជើញទៅគោរពវិញ្ញាណក្ខន្ធលោក NAKATA HARUYUKI ជនជាតិជប៉ុន ដែលជាអតីតអធិការប៉ូលិសអ៊ុនតាក់នៅ វត្តតាំងក្រសាំង និង លោក NAKATA ATSUHITO ជនជាតិជប៉ុនដែលជាអតីតបុគ្គលិកស្ម័គ្រចិត្តរបស់អង្គការសហប្រជាជាតិ ។លោក KISHIDA Fumio និង​ ប្រតិភូជាន់ខ្ពស់ជប៉ុន នឹងអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យនិង​ដាក់កម្រងផ្កាគោរពវិញ្ញាណក្ខន្ធព្រះបរមរតនកោដ្ឋ ព្រះករុណា​ ព្រះបាទសម្តេច ព្រះនរោត្តម សីហនុ​ ។

សេចក្តីប្រកាសព័ត៌មានរបស់ក្រសួងការបរទេសបានបង្ហាញថាដំណើរទស្សនកិច្ចផ្លូវការរបស់លោកនាយករដ្ឋមន្ត្រី KISHIDA Fumio មកកាន់ព្រះរាជាណាចក្រកម្ពុជាសង្កត់ធ្ងន់លើ ការប្តេជ្ញាចិត្តយ៉ាងមុតមាំរបស់ភាគីទាំងពីរក្នុងការលើកកម្ពស់និងពង្រឹងទំនាក់ទំនងល្អប្រពៃដែលមានស្រាប់និងភាព ជាដៃគូយុទ្ធសាស្ត្រក៏ដូចជាកិច្ចសហប្រតិបត្តិការរវាងកម្ពុជានិង ជប៉ុន ក្នុងក្របខ័ណ្ឌទ្វេភាគីនិងពហុភាគីដើម្បីផលប្រយោជន៍ទៅវិញទៅមកនៃប្រទេ សទាំងពីរ ។

លោក ហ្វូមីអូ គីស្សីដា គឺជា​ប្រធាន​គណបក្ស​ប្រជាធិបតេយ្យ​សេរី (LDP)ដែល​កំពុង​កាន់​អំណាច​នៅ​ប្រទេស​ជប៉ុន​។លោក​ត្រូវ​បាន​សភា​ជប៉ុន​បោះឆ្នោត​គាំទ្រ​ជា​ផ្លូវការឲ្យ​ឡើងកាន់​ តំណែង​ជានាយករដ្ឋមន្ត្រី​ជប៉ុនកាល​ពី​ថ្ងៃទី​១០ ខែ​វិច្ឆិកា ឆ្នាំ​២០២១៕