​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​កាលពី​ថ្ងៃអាទិត្យ​ទី​២០​មីនា​បាន​អំពាវនាវ​ឱ្យ​កងកម្លាំង​អ៊ុយ​ក្រែន​ទម្លាក់អាវុធ​ចុះ​នៅ​ក្នុង​ទីក្រុង​កំពង់ផែ ម៉ា​រី​វ​ប៉ូល (Mariupol) ភាគ​ខាងកើត កន្លែង​ដែល​ទីក្រុង​មូ​ស្គូ​និយាយថា “​មហន្តរាយ​មនុស្សធម៌​ដ៏​គួរ​ឱ្យ​ភ័យខ្លាច​” កំពុង​កើតឡើង​។​

​លោក​ឧត្តមសេនីយ៍ឯក មី​ខា​អ៊ី​ល មី​ហ្ស៊ី​ន​សេវ (Mikhail Mizintsev)​ជា​នាយក​មជ្ឈមណ្ឌល​ជាតិ​គ្រប់គ្រង​ផ្នែក​ការពារ​ជាតិ​រុស្ស៊ី​បាន​និយាយ​នៅក្នុង​សន្និសីទ​ខ្លី​មួយ​ដែល​ចែកចាយ​ដោយ​​ក្រសួង​ការពារ​ជាតិ​ថា “​សូម​ទម្លាក់អាវុធ​របស់​អ្នក​ចុះ​”​។​

​លោក​មី​ហ្ស៊ី​ន​សេវ​និយាយថា “​មហន្តរាយ​មនុស្សធម៌​ដ៏​គួរ​ឱ្យ​ភ័យខ្លាច​បានវិវត្ត​។ អ្នក​ដែល​ទម្លាក់អាវុធ​ចុះ​នឹង​ធានា​បាន​ការចាកចេញ​ដោយ​សុវត្ថិភាព​ពី​ទីក្រុង​ម៉ា​រី​វ​ប៉ូល​”​។​

​ម៉ា​រី​វ​ប៉ូល​បាន​ទទួលរង​នូវ​ការបាញ់​ផ្លោង​យ៉ាង​ធ្ងន់ធ្ងរ​បំផុត​ចាប់តាំងពី​រុស្ស៊ី​បាន​ឈ្លានពាន​អ៊ុយ​ក្រែន​កាលពី​ថ្ងៃទី ២៤ ខែ​កុម្ភៈ​។ អ្នកស្រុក​ជា​ច្រើន​ក្នុងចំណោម​អ្នកស្រុក ៤០០.០០០​នាក់​របស់​ខ្លួន​នៅតែ​​ជាប់គាំង​នៅ​ក្នុង​ទីក្រុង​ជា​មួយ​អាហារ ទឹក និង​ថាមពល​សល់​តិចតួច​ប៉ុណ្ណោះ​។​

​លោក​មី​ហ្ស៊ី​ន​សេវ​បាន​និយាយថា ច្រករបៀង​មនុស្សធម៌​សម្រាប់​ជន​ស៊ីវិល​នឹងត្រូវ​បើក​នៅ​ទិស​ខាងកើត​និង​ខាង​លិច​ចេញពី​ទីក្រុង​ម៉ា​រី​វ​ប៉ូល​នៅ​ម៉ោង ១០ ព្រឹក ម៉ោង​នៅ​ទីក្រុង​មូ​ស្គូ​នៅ​ថ្ងៃ​ចន្ទ​ទី​២១​មីនា​។​

​លោក​បាន​និយាយថា អ៊ុយ​ក្រែន​មាន​ពេល​រហូតដល់​ម៉ោង​៥ ព្រឹក​ម៉ោង​នៅ​ទីក្រុង​មូ​ស្គូ​ដើម្បី​ឆ្លើយតប​ទៅ​នឹង​ការផ្តល់ជូន​ស្តីពី​ច្រករបៀង​មនុស្សធម៌​និង​ការទម្លាក់​អាវុធ​ចុះ​។​

​រុស្ស៊ី​និង​អ៊ុយ​ក្រែន​បាន​ស្តីបន្ទោស​គ្នា​ចំពោះ​ការបរាជ័យ​ក្នុង​ការបើក​ច្រករបៀង​បែបនេះ​ក្នុង​ប៉ុន្មាន​សប្តាហ៍​ថ្មីៗ​នេះ​។​

​លោក​មី​ហ្ស៊ី​ន​សេវ​បាន​និយាយ​ដោយ​មិន​ផ្តល់​ភស្តុតាង​ថា “​ក្រុមចោរ​” “​ក្រុម​ណា​ស៊ី​និយម​” និង​ក្រុម​អ្នក​ជាតិនិយម​អ៊ុយ​ក្រែន​បាន​ចូលរួម​ក្នុង “​ភេរវកម្ម​ដ៏​ធំ​”​ហើយ​បាន​បន្ត​ការសម្លាប់​មនុស្ស​នៅក្នុង​​ទីក្រុង​។​

​អ៊ុយ​ក្រែ​ននិយាយថា ខ្លួន​កំពុង​ប្រយុទ្ធ​ដើម្បី​អត្ថិភាព​របស់​ខ្លួន ហើយ​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី បាន​និយាយ​កាលពី​ថ្ងៃ​សៅ​រ៍ថា ការឡោមព័ទ្ធ​ទីក្រុង​ម៉ា​រី​វ​ប៉ូល​គឺជា​”​ភេរវកម្ម​ដែល​នឹង​ត្រូវ​ចងចាំ​​ជាច្រើន​សតវត្សរ៍​ទៅមុខទៀត​”​។

​លោក​ខាងលិច​បាន​ដាក់​ទណ្ឌកម្ម​យ៉ាង​សន្ធឹកសន្ធាប់​លើ​ប្រទេស​រុស្ស៊ី ដែល​វិមាន​ក្រឹម​ឡាំង​និយាយថា ស្មើ​នឹង​ការប្រកាសសង្គ្រាម​សេដ្ឋកិច្ច​ដោយ​សហរដ្ឋ​អាម៉េរិក​និង​សម្ពន្ធមិត្ត​របស់ខ្លួន​។​

​លោក​មី​ហ្ស៊ី​ន​សេវ​បាន​និយាយថា រុស្ស៊ី​មិនបាន​ប្រើ​អាវុធ​ធុន​ធ្ងន់​នៅ​ម៉ា​រី​វ​ប៉ូល​ទេ​។ លោក​បាន​និយាយថា រុស្ស៊ី​បាន​ជម្លៀស​មនុស្ស​ចំនួន ៥៩.៣០៤ នាក់​ចេញពី​ទីក្រុង ប៉ុន្តែ​ជន​ស៊ីវិល ១៣០.០០០​នាក់​​ទៀត​នៅតែ​ជា​ចំណាប់ខ្មាំង​នៅ​ទីនោះ​។ លោក​បាន​និយាយថា មនុស្ស ៣៣០.៦៨៦ នាក់​ត្រូវបាន​ជម្លៀស​ចេញពី​អ៊ុយ​ក្រែន​ដោយ​រុស្ស៊ី ចាប់​តាំងពី​ការចាប់ផ្តើម​នៃ “​ប្រតិបត្តិការ​យោធា​ពិសេស​”៕

អគារ ៩០ ភាគរយ​នៃ​ទីក្រុង​ម៉ា​រី​វ​ប៉ូល​ត្រូវបាន​បំផ្លាញ