​ប្រែ​សម្រួលៈ​បំណង​(ST)៖ ឯកអគ្គរដ្ឋទូត​ចិន​ប្រចាំ​សហរដ្ឋ​អាម៉េរិក​បាន​និយាយ​កាលពី​ថ្ងៃអាទិត្យ​ទី​២០​មីនា​ថា ប្រទេស​លោក​មិន​បាន​បញ្ជូន​សព្វាវុធ​ទៅកាន់​រុស្ស៊ី​ដើម្បី​ប្រើប្រាស់​នៅ​អ៊ុយ​ក្រែនទេ តែ​មិន​​បាន​ច្រានចោល​លទ្ធភាព​ដែល​រដ្ឋាភិបាល​ក្រុង​ប៉េកាំង​អាច​ធ្វើ​ដូច្នេះ​ទេ​នៅ​ពេល​អនាគត​។​

ឯកអគ្គរដ្ឋទូតចិនលោក គីន ហ្កាង ជៀសវាងការនិយាយថាតើចិននឹងជួយសព្វាវុធដល់រុស្ស៊ីដែរឬអត់នៅពេលអនាគត តែកន្លងមកអត់មានជួយទេ

​ក្នុង​ការសន្ទនា​តាម​ទូរស័ព្ទ​អស់​ពេល​ដ៏​យូរ​កាលពី​ថ្ងៃ​សុក្រ​សប្តាហ៍​មុន ប្រធានាធិបតី​អាម៉េរិក​លោកចូ បៃ​ដិន បាន​ព្រមាន​សម​ភាគី​ចិន ស៊ី ជីន​ភីង ថា​នឹង​មាន​«​ផលវិបាក​»​បើសិនជា​រដ្ឋាភិបាល​ក្រុង​ប៉េ​​កាំ​ង​ផ្តល់​ការគាំទ្រ​ជា​សម្ភារ​ដល់​រដ្ឋាភិបាល​ក្រុង​មូ​ស្គូ ដែល​កំពុង​ធ្វើ​សង្គ្រាម​នៅ​អ៊ុ​យក្រែន​។​

​នៅពេល​ត្រូវ​បាន​សារព័ត៌មាន​CBS​សួរថា​តើ​ចិន​អាច​បញ្ជូន​លុយ​ឬ​សព្វាវុធ​ទៅអោយ​រុស្ស៊ី​ដែរឬទេ លោក​ឯកអគ្គរដ្ឋទូត គីន ហ្កាង​(Qin Gang)​បាន​និយាយថា​«​មាន​ព័ត៌មាន​មិន​ពិត​អំពី​ចិន​ផ្តល់​ជំ​​នួយ​យោធា​ទៅ​កាន់​រុស្ស៊ី​។​យើង​សូម​ជំទាស់​របាយការណ៍​ដូច្នេះ​»​។​លោក​បាន​បន្តថា «​ផ្ទុយទៅវិញ អ្វី​ដែល​ចិន​ធ្វើ​គឺ​កំពុង​បញ្ជូន​ស្បៀងអាហារ ថ្នាំពេទ្យ ភួយ​មុង​និង​ទឹកដោះគោ​កូនក្មេង មិនមែន​សព្វាវុធ​​និង​គ្រាប់រំសេវ​ទៅ​អោយ​ភាគី​ណាមួយ​ទេ​»​។​

​ជំនួយ​មនុស្សធម៌​ចិន​ក្រុម​ទី​បី​បាន​ទៅ​ដល់​អ៊ុយ​ក្រែន​កាលពី​សប្តាហ៍​មុន​

អាម៉េរិកផ្តល់សព្វាវុធដល់អ៊ុយក្រែនដើម្បីតតាំងជាមួយកងកម្លាំងរុស្ស៊ី តែមិនបានជំរុញការចរចាទេ

​ទោះជា​យ៉ាងណា​លោក គីន ជៀសវាង​និយាយថា រដ្ឋាភិបាល​ក្រុង​ប៉េកាំង​នឹង​មិន​លក់​សព្វាវុធ​ទៅអោយ​រុស្ស៊ី តែ​ថា​ចិន​នឹង​រក្សា​ទំនាក់ទំនង​ពាណិជ្ជកម្ម​ដោយ​«​សីលធម៌​»​ជាមួយ​សម្ពន្ធមិត្ត​ជិតដិត​​របស់​ខ្លួន​មួយ​នេះ​។​«​ចិន​មាន​កិច្ចសហការ​ពាណិជ្ជកម្ម សេដ្ឋកិច្ច ហិរញ្ញ​វត្ថ​និង​ថាមពល​ជាមួយ​រុស្ស៊ី​ធម្មតា​។​វា​ជា​ធុរកិច្ច​ធម្មតាៗ​រវាង​រដ្ឋ​អធិបតេយ្យ​ពីរ​»​។​

​សូមបញ្ជាក់​ថា រដ្ឋាភិបាល​ក្រុង​ប៉េកាំង​ដែល​មាន​ទំនាក់ទំនង​ល្អ​ជាមួយ​រដ្ឋាភិបាល​ក្រុង​មូ​ស្គូ បាន​ជៀសវាង​មិន​ថ្កោលទោស​ប្រតិបត្តិការ​សឹក​របស់​រុស្ស៊ី​នៅ​អ៊ុយ​ក្រែន​ទោះ​ជារង​សម្ពាធ​ពី​អាម៉េរិកអោយ​ធ្វើ​​ដូច្នេះ​។​

​លោក​គីន បាន​និយាយថា រដ្ឋាភិបាល​ក្រុង​ប៉េកាំង​បន្ត​«​ជំរុញ​កិច្ច​ពិភាក្សា​រក​សន្តិភាព​សន្តិភាព​និង​អំពាវនាវ​អោយ​មាន​បទ​ឈប់​បាញ់​គ្នា​ជាបន្ទាន់​»​តែ​ប្រភេទ​នៃ​ការ​ថ្កោលទោស​ជា​សាធារណៈ​ដូច​ដែល​​ពួក​លោក​ខាងលិច​បាន​ធ្វើ «​មិន​ជួយ​ដោះស្រាយ​បញ្ហា​ទេ​។​យើង​ត្រូវការ​ហេតុផល​។​យើង​ត្រូវការ​សេចក្តីក្លាហាន និង​យើង​ត្រូវការ​កិច្ចការ​ទូត​ល្អ​»​។​

​ក្រសួងការបរទេស​ចិន​បាន​និយាយថា លោកខាងលិច​ត្រូវតែ​យក​ការព្រួយបារម្ភ​អំពី​សន្តិសុខ​របស់​រុស្ស៊ី​មក​ពិចារណា​៕