​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រមុខ​មន្ទីរ​បញ្ច​កោណ​បាន​និយាយ​កាលពី​ថ្ងៃអាទិត្យ​ទី​២០​មីនា​ថា​រុស្ស៊ី​អះអាងថា​ខ្លួន​បាន​ប្រើ​មី​ស៊ី​ល​លឿន​ជាង​សំឡេង​ក្នុង​ប្រទេស​អ៊ុយ​ក្រែន​ដើម្បី​ជា​មធ្យោបាយ​​ដណ្តើម​យក​ប្រៀប​ឈ្នះ​មកវិញ​នៅក្នុង​សង្គ្រាម ប៉ុន្តែ​អាវុធ​ជំនាន់​ក្រោយ​នេះ​មិន​បាន​បង្ហាញ​ថា​ជា “​អ្នក​ផ្លាស់ប្តូរ​ស្ថានការណ៍​” នោះទេ​។​

​ទីក្រុង​មូ​ស្គូបា​ននិយាយថា ខ្លួន​បាន​បាញ់​មី​ស៊ី​ល​លឿន​ជាង​សំឡេង​ពីរ​គ្រាប់​នៅក្នុង​ប្រទេស​អ៊ុ​យក្រែន ហើយ​ខណៈ​ដែល​រដ្ឋមន្ត្រី​ការពារ​ជាតិ​អាម៉េរិក លោក ឡយ អូ​ស្ទីន មិន “​បញ្ជាក់ ឬ​ប្រកែក​”​ថា​តើ​រុស្ស៊ី​​បាន​ប្រើប្រាស់​អាវុធ​បែប​នេះ​ឬ​អត់​នោះ គាត់​បាន​ព្រមាន​ថា ការ​លុកលុយ​របស់​ប្រធានាធិបតី វ្ល៉ា​ឌី​មៀ ពូ​ទីន កំពុង​ឆ្លងកាត់​ការផ្លាស់ប្តូរ​យុទ្ធសាស្ត្រ រួម​ទាំង​ការតម្រង់​គោលដៅ​ទៅលើ​ជន​ស៊ីវិល​។

​ការប្រើប្រាស់​របស់​រុស្ស៊ី​នូវ​អាវុធ​លឿន​ជាង​សំឡេង​ដែល​ពិបាក​ស្ទាក់​ចាប់​អាច​នឹង​បង្ហាញ​ពី​ការបង្កើន​យុទ្ធនាការ​របស់​ខ្លួន​ដើម្បី​បង្ខំ​អ៊ុយ​ក្រែន​ឱ្យ​បោះបង់​ចោល​ក្តី​សង្ឃឹមនៃ​ទំនាក់ទំនង​ជិតស្និទ្ធ​ជាមួយ​​លោកខាងលិច​។​

​ប៉ុន្តែ​លោក​អូ​ស្ទីន​បាន​ប្រាប់​កម្មវិធី “Face the Nation” របស់​ទូរទស្សន៍ CBS ថា “​ខ្ញុំ​មិន​មើល​ឃើញ​វា​ជា​អ្នក​ផ្លាស់ប្តូរ​ស្ថានការណ៍​ទេ​”​។​

​លោក​បាន​បន្ថែមថា “​ខ្ញុំ​គិតថា​ហេតុផល​ដែល​គាត់​ងាក​មក​ប្រើ​អាវុធ​ប្រភេទ​នេះ គឺ​ដោយសារតែ​គាត់​កំពុង​ព្យាយាម​បង្កើត​សន្ទុះ​យកឈ្នះ​ឡើងវិញ​។​ហើយ​ជា​ថ្មី​ម្តង​ទៀត​យើង​បាន​ឃើញ​គាត់​វាយប្រហារ​​ទីប្រជុំជន​និង​ទីក្រុង និង​ជន​ស៊ីវិល (​ហើយ​) យើង​រំពឹងថា​នឹង​ឃើញ​រឿង​នេះ​កើត​ឡើង​ជា​បន្ត​”​។​

​យោធា​អ៊ុយ​ក្រែន​ដែល​មាន​អាវុធ​តិច​ជាង​បាន​ធ្វើ​ការតស៊ូ​យ៉ាង​ខ្លាំងក្លា​មិន​នឹកស្មាន​ដល់ ដែល​បាន​បង្អាក់​ការ​រុលទៅមុខ​របស់​រុស្ស៊ី​ដោយបាន​ទប់​ជាប់​កងកម្លាំង​របស់​រុស្ស៊ី​នៅ​ខាងក្រៅ​រដ្ឋធានី​គៀវ​​និង​ទីក្រុង​មួយចំនួនទៀត ដោយ​ធ្វើឱ្យ​បណ្តាញ​ផ្គត់ផ្គង់​របស់​ទីក្រុង​មូ​ស្គូ​ងាយ​រងគ្រោះ​ពី​ការវាយប្រហារ​របស់​អ៊ុ​យក្រែន​។​

​លោក​អូ​ស្ទីន​បាន​និយាយថា “​ពួកគេ​បាន​បង្ហាញ​បញ្ហាសំខាន់ៗ​មួយចំនួន​សម្រាប់​រុស្ស៊ី​” ហើយ​ការជាប់គាំង​នៃ​កងទ័ព​របស់​ពូ​ទីន​នៅនឹងកន្លែង​”​បាន​ជះ​ឥទ្ធិពល​ដល់​គាត់​ក្នុងការ​ចល័ត​ទី​កងកម្លាំង​​របស់​គាត់​ចូលទៅក្នុង​ម៉ាស៊ីន​អារឈើ​។ អ៊ុយ​ក្រែន​បាន​បន្ត​វាយបំបាក់ក​ង​កម្លាំងរ​បស់​គាត់ ហើយ​ពួកគេ​បាន​ប្រើ​ឧបករណ៍​ដែល​យើង​បាន​ផ្តល់ឱ្យ​ពួកគេ​យ៉ាង​មាន​ប្រសិទ្ធភាព​”​។​

​លោក​អូ​ស្ទីន​បាន​បំពេញ​ទស្សនកិច្ច​នៅ​អឺរ៉ុប​កាលពី​សប្តាហ៍​មុន​ក្នុង​គោលបំណង​ពង្រឹង​ការរួបរួម​របស់​អង្គការ​ណា​តូ​និង​ពង្រឹង​ផ្នែក​ខាងកើត​របស់​សម្ពន្ធមិត្ត​។​

​ប្រធានាធិបតី​អាម៉េរិក​លោក ចូ បៃ​ដិនបាន​ប្រកាស​ផ្តល់ជំនួ​យ​សន្តិសុខ​ថ្មី​ចំនួន ៨០០ លាន​ដុល្លារ​ដល់​ទីក្រុង​គៀវ ដោយ​ឆ្លើយតប​នឹង​ការ​អង្វរ​របស់​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​​សម្រាប់​ជំនួយ​យោធា​បន្ថែម​ទៀត និង​ទទួលយក​ជំនួយ​សរុប​របស់​សហ​រដ្ឋ​អាម៉េរិក​ក្នុង​ខែ​នេះ​រហូតដល់​ទៅ ១ ពាន់​លាន​ដុល្លារ​៕

​យន្តហោះ​រុស្ស៊ី​សម្រាប់​ដឹក​មី​ស៊ី​ល​លឿន​ជាង​សំឡេង Kinzhal