ដោយៈ ភ្នំ​សន្ទុក / កំពង់ធំៈ លោកស្រី ឃួន ឃុន​ឌី អនុប្រធាន​កិត្តិយស គណៈកម្មការ​សាខា សមាគមនារី​ខេត្តកំពង់ធំ បាន​មានប្រសាសន៍ នា​សៀ​ល​ថ្ងៃទី​២០ ខែមីនា ឆ្នាំ​២០២២ ថាៈ ដើម្បី​ពង្រឹងសមត្ថភាព​ស្ត្រី ក្នុង​គោលបំណង​ជួយ​ដល់ ក្រុម​ស្ត្រី ស្ដីពី​គោលនយោបាយ ឈ្នះ​ឈ្នះ និង​គោលការណ៍​របស់ គណបក្ស​ប្រជាជន​កម្ពុជា ក្រោម​ការដឹកនាំ​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជា ណា​ចក្រ​កម្ពុជា បាន​ខិតខំ និង​ជំរុញ​ការលើកកម្ពស់​គុណភាព​ស្ត្រី តាមរយៈ ការពង្រឹង​សមត្ថភាព​ស្ត្រី ឲ្យ​ក្លាយជា​អ្នកដឹកនាំ តាម​ក្រសួង ស្ថាប័ន របស់​ជាតិ រួមមាន ស្ថាប័នព្រឹទ្ធសភា ស្ថាប័ន​រដ្ឋសភា រាជរដ្ឋាភិបាល និង​បង្កើន​ការយក ចិត្ត​ទុកដាក់ ក្នុងការ​អភិវឌ្ឍន៍​ធនធាន​ស្ត្រី ក្នុង​វិស័យ​នយោបាយ វិស័យសេដ្ឋកិច្ច និង វិស័យ​សង្គមកិច្ច សំដៅ​ធានា​ឆ្លើយតប​ទៅនឹង​សាកលភាវូបនីយកម្ម ទាំង​ក្នុង​ក្របខណ្ឌ​តំបន់ និង​ពិភពលោក​។

​លោកស្រី បាន​បន្តទៀតថាៈ ថ្ងៃនេះ យើង​មាន​មោទនភាព ដើម្បី​ពង្រឹង​នូវ ចំណេះដឹង​ដល់​ស្ត្រី យើង មានការ​បញ្ជ្រាប​យេនឌ័រ និង​ការបង្កើន​ភាព អង់អាច​ក្លាហាន​ដល់​ស្ត្រី បាន​ចាត់ទុកជា បញ្ហា​អន្តរ​វិស័យ នៃ​កម្មវិធី​ជាតិ សម្រាប់​ការអភិវឌ្ឍន៍ តាមបែប​ប្រជាធិបតេយ្យ តាមរយៈ ការដាក់ចេញ នូវ​គោលការណ៍​សមភាព និង​សមធម៌ យេនឌ័រ​។ ការដោះស្រាយ​បញ្ហា វិសមភាព​យេនឌ័រ នៅក្នុង​ថ្នាក់មូលដ្ឋាន ការបញ្ជ្រាប​យេនឌ័រ និង​បង្កើន​ភាព អង់អាច​ដល់​ស្ត្រី ទាំង​ក្នុង​កម្រិត​បុគ្គល និង កម្រិត​ស្ថាប័ន និង​ជា​មូលដ្ឋានគ្រឹះ ក្នុងការ​តាក់តែង​ផែនការ និង​ការអភិវឌ្ឍន៍​កម្មវិធី​ជាតិ​។ បន្ត​ចូលរួម​លុបបំបាត់ រាល់​ទម្រង់ នៃ​ការរើសអើង​ប្រឆាំងនឹង​ស្ត្រី ដោយបាន​ចាត់ទុក​ស្ត្រី​ជា​ឆ្អឹង ខ្នង​នៃ​សេដ្ឋកិច្ច របស់​សង្គមជាតិ ។​

​ដោយឡែក លោកស្រី លំ គ​ន្ធា​រី អភិបាលរង​ខេត្ត ជា​ប្រធាន​គណៈកម្មការ សាខាសមាគម នារី​ខេត្ត ក្នុងឱកាស​នោះ បាន​សំណូមពរ ដល់​ក្រុម​គណៈ ចលនា​ស្ត្រី​ទាំងអស់ ឱ្យចូល​រួម ចំណែក​យ៉ាងសកម្ម ក្នុងការ​អភិវឌ្ឍ​ស្រុក / ខេត្ត ការងារ​មនុស្សធម៌ និង​សកម្មភាព​ផ្សេងទៀត ជាពិសេស​ត្រូវ​ដើរតួនាទី យ៉ាងសំខាន់ នៅក្នុង​ការជំរុញ​ស្ត្រី កុមារ និង​ជន​ងាយ​រងគ្រោះ ឲ្យ​ទទួលបាន នូវ​សិទ្ធិ​ការពារ និង​ផលប្រយោជន៍ តាមរយៈ​ការកែប្រែ​ឥរិយាបថ​សង្គម ដោយ​ទទួលស្គាល់​ស្ត្រី ជា​ដៃគូ​ដ៏​សំខាន់ នៅក្នុង​ការអភិវឌ្ឍន៍​សង្គម​៕/V​-PC