​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បង់​ក្លា​ដែស​បាន​ចាប់ផ្តើមក​ម្ម​វិធី​ឧបត្ថម្ភ​ស្បៀងអាហារ​ទូទាំង​ប្រទេស​កាល​ពី​ថ្ងៃអាទិត្យ​ទី​២០​មីនា បន្ទាប់​ពី​តម្លៃ​ប្រេង​ចម្អិន​អាហារ សណ្តែកសៀង​និង​អាហារ​​សំខាន់ៗ​ផ្សេងទៀត​បាន​ឡើងថ្លៃ​បន្ទាប់​ពី​ការ​លុកលុយ​របស់​រុស្ស៊ី​លើ​អ៊ុ​យក្រែន​។​

​ការកើនឡើង​ថ្លៃដើម​ផលិតផល ដែល​មន្ត្រី​ស្តីបន្ទោស​លើ​ការប្រែប្រួល​តម្លៃ​ប្រេង​ឆៅ​ក្នុង​ទីផ្សារ​ប្រេង​ពិភពលោក​ចាប់តាំងពី​ជម្លោះ​បាន​ចាប់ផ្តើម​បាន​បង្កឱ្យមាន​ការ​មិន​សប្បាយ​ចិត្ត​នៅ​ជុំវិញ​ប្រជាជាតិ​​អាស៊ី​ខាងត្បូង​ដែល​មាន​ប្រជាជន ១៧០ លាន​នាក់​នេះ​ក្នុង​ប៉ុន្មាន​សប្តាហ៍​ថ្មីៗ​នេះ​។​

​សកម្មជន​បក្សប្រឆាំង​បាន​ចោទប្រកាន់​ពាណិជ្ជក​រថា​កេងចំណេញ​និង​បាន​រៀបចំ​បាតុកម្ម​ជាច្រើនលើក ដោយ​កូដកម្ម​ទូទាំង​ប្រទេស​ប្រឆាំងនឹង​ការ​ឡើងថ្លៃ​គ្រោង​នឹង​ធ្វើ​នៅ​ចុង​ខែ​នេះ​។​

​រដ្ឋមន្ត្រី​ក្រសួង​ពាណិជ្ជកម្ម​លោក ថា​ផាន កាន់​ធី ហ្គោស (Tapan Kanti Ghosh) បាន​និយាយថា កម្មវិធី​នេះ​នឹង​ផ្តល់​អាហារ​ថោក​ដល់​មនុស្ស ១០ លាន​នាក់​ហើយ​ដំណើរការ​រហូត​ដល់​ចុងបញ្ចប់​​នៃ​បុណ្យ​រ៉ា​ម៉ា​ដន (Ramadan) ដែល​ជា​ខែ​ប្រពៃណី​នៃ​ការ​តម​អាហារ​ក្នុង​ជំនឿ​អ៊ីស្លាម​រយៈពេល​ប្រាំ​មួយ​សប្តាហ៍​។​

​លោក​បាន​ប្រាប់​ទីភ្នាក់ងារ​សារព័ត៌មាន AFP ថា “​សង្គ្រាម​អ៊ុយ​ក្រែន​បានបង្កើន​តម្លៃ​ប្រេង​ឆៅ ដែល​បាន​ប៉ះពាល់​ដល់​តម្លៃ​ទំនិញ​ទូទាំង​ពិភពលោក​”​។​

​មនុស្ស​រាប់រយ​នាក់​ឃើញ​តម្រង់​ជួរ​ក្រោម​ព្រះអាទិត្យ​ដ៏​ក្ដៅ រង់ចាំ​អាហារ​នៅ​ថ្ងៃ​ដំបូង​នៃ​កម្មវិធី​ឧបត្ថម្ភ​ធន​ស្បៀងអាហារ​នៅ​ទីក្រុង​ហ្វា​ទូ​លឡា (Fatullah) ដែល​ជា​មជ្ឈមណ្ឌល​ឧស្សាហកម្ម​នៅ​ជាយក្រុង​ដា​ក្កា​។​

​លោក ម៉ូ​សា​រ៉ា​ហ្វ ហូ​ស​សេន (Mosharraf Hossain) ជា​អ្នក​កាន់ចង្កូត​កាណូត​ក្នុងស្រុក​បាន​និយាយថា គាត់​ត្រូវ​រង់ចាំ​បួន​ម៉ោង​មុន​ពេល​បាន​ទិញ​អាហារ​។​

​គាត់​បាន​ប្រាប់ AFP ថា “​វា​នៅតែ​មាន​តម្លៃ​ក្នុង​ការរង់ចាំ​។ ការកើនឡើង​តម្លៃ​នៅក្នុង​ទីផ្សារ​ធម្មតា​គឺ​មិន​គួរ​ឱ្យ​ជឿ​ទេ​”​។​

​លោក​ហូ​ស​សេន​បាន​និយាយថា ម្ចាស់​អាជីវកម្ម​បាន​ប្រាប់​គាត់​ថា “​សង្គ្រាម​ដែល​កំពុង​បន្ត​នៅ​ជិត​ប្រទេស​រុស្ស៊ី​” គឺជា​ហេតុផល​ដែល​ពួកគេ​បាន​ដំឡើង​ថ្លៃទំនិញ ប៉ុន្តែ​គាត់​មាន​មន្ទិល​ពី​ការដំឡើងថ្លៃ​។​

​លោក​បាន​បន្តថា “​អង្ករ សណ្ដែក និង​ស្ករ​ភាគច្រើន​ផលិត​នៅក្នុង​ប្រទេស​របស់​យើង​។ តើ​សង្គ្រាម​កើត​ឡើង​នៅ​ទីនេះ​ក្នុងប្រទេស​បង់​ក្លា​ដែស​មែនទេ​? នេះ​ជា​ការ​បំផ្លើស​សុទ្ធសាធ​”៕

​កម្មវិធី​នេះ​នឹង​ផ្តល់​អាហារ​ថោក​ដល់​មនុស្ស ១០ លាន​នាក់ ហើយ​ដំណើរការ​រហូត​ដល់​ចុងបញ្ចប់​នៃ​បុណ្យ​រ៉ា​ម៉ា​ដន