​ដោយៈ អង្គា​រ៍​ហេង / ភ្នំពេញៈ គណៈបញ្ជាការ​ឯកភាព​រដ្ឋបាល ខណ្ឌ​ពោធិ៍ សែន​ជ័យ ដឹកនាំ​ដោយ​លោក ប៉ាង លីដា អភិបាលរងខណ្ឌ បន្ត​សហការ​ជាមួយ កម្លាំង​ការិយាល័យ សាធារណការ​ខណ្ឌ ចុះ​រៀបចំ​សណ្ដាប់ធ្នាប់ និង​អនាម័យ តាម​បណ្ដោយ​ផ្លូវ​សហព័ន្ធរុស្ស៊ី និង​ផ្លូវ​ចូល​វត្ត​តាំង​កសាង (​ទាំងសងខាង​) ស្ថិតនៅក្នុង​សង្កាត់​កា​កាប​ទី​១ និង​កា​កាប​ទី​២ នា​រសៀល​ថ្ងៃទី​២០ ខែមីនា ឆ្នាំ​២០២២ ។​

​មន្ត្រី​ដែល​ស្ថិតក្នុង​ប្រតិបត្តិការ​នេះ បានឱ្យដឹងថាៈ អាជ្ញាធរ​ខណ្ឌ បានប្រកាស ផ្សព្វផ្សាយ សេចក្តីជូនដំណឹង ដល់​បងប្អូន ដែល​ប្រកប​អាជីវកម្ម​ផ្សេងៗ តាម​គោលដៅ​ខាងលើ ត្រូវ​លក់​មាន​របៀបរាបរយ តាម​អ្វីដែល រដ្ឋបាល​ខណ្ឌ បានកំណត់​ជូន ដោយ​ទុក​ចិញ្ចើមផ្លូវ សំរាប់​ថ្មើរជើង និង​រក្សា​អនាម័យ បរិស្ថាន ឲ្យ​បាន​ស្អាត មាន​សោភ័ណ​ភាពល្អ​។​

​ប្រភព បានបញ្ជាក់​ថាៈ មិនតែប៉ុណ្ណោះ អាជ្ញាធរ បាន​ប្រេ​ី​ធម៌​ក្ដៅ ដោយបាន កាត់​ផ្លាកសញ្ញា ដាក់​លក់ដូរ​បំពាន​ផ្លូវ និង​រនាំង​ដែក ដែល​ដាក់​លយ នៅលើ​ចិញ្ចើមផ្លូវ គ្មាន​សណ្ដាប់ធ្នាប់ ហើយ​ហៅ​ម្ចាស់ មក​ធ្វើ ការណែនាំ និង​កិច្ចសន្យា មិនឱ្យ​មាន​លើក​ក្រោយ​ទៀត​។

​ប្រភព​ដដែល បានបញ្ជាក់​ទៀតថាៈ ប្រតិបត្តិការ​នេះ បាន​ធ្វើឡើង​បន្ទាប់ពី អាជ្ញាធរ ខណ្ឌ​ពោធិ៍​សែន​ជ័យ បាន​ចុះ​ណែនាំ ប្រជាពលរដ្ឋ ដែលជា​អាជីវករ លក់ដូរ តាម​ចិញ្ចើមផ្លូវ សាធារណៈ ដែល​តែងតែ​ដាក់លក់​របស់ របរ​រកស៊ី គ្មាន​សណ្ដាប់ធ្នាប់ ជាច្រើនលើក​ច្រើនសារ បណ្ដាលឱ្យមាន​ការកកស្ទះ ចរាចរណ៍ ពិបាក​ក្នុងការ​ធ្វើដំណើរ​ទៅមក​៕/V​-PC