ដោយៈ គង់​ហេង / កំពង់ចាមៈ សមត្ថកិច្ច​កំពុង​ស្វែងរក​អត្តសញ្ញាណ អ្នកបើកបរ​រថយន្ត ដឹក​ប្រេង​មួយ ដែល​គេចខ្លួន ក្រោយពី បាន​បើក​បុក ម៉ូតូ​មួយគ្រឿង បណ្តាលឱ្យ​បុរស​ម្នាក់ ស្លាប់ និង​ម្នាក់ទៀត រងរបួស​ធ្ងន់ នៅលើ​ស្ពាន​គី​ហ្សូ​៊​ណា កាលពី​ម៉ោងជាង ៦ ល្ងាច​ថ្ងៃទី ២០ មីនា ម្សិលមិញ​នេះ​។​

​ប្រភពព័ត៌មាន​ពី​មន្ត្រីនគរបាល ដែល​ចុះ​ប្រតិបត្តិការ លើ​កន្លែងកើតហេតុ បាន​និយាយថាៈ ជនរងគ្រោះ​ដែល​បាន​ស្លាប់ នៅនឹងកន្លែង ដោយសារ​ការ កិន​របស់​កង់​មុខ​រថយន្ត លើ​ដងខ្លួន​ឈ្មោះ ឈន វ៉ាន់​ឆៃ អាយុ ២៨ ឆ្នាំ ជា​អ្នកជិះ​ម៉ូតូ​ខាងក្រោយ និង​អ្នករបួស ជា​អ្នកបើកបរ​ម៉ូតូ​ម៉ាក វី​សិន គ្មាន​ស្លាក​លេខ ឈ្មោះ អែល តុង​ហេង អាយុ ២២ ឆ្នាំ​។ អ្នកស្លាប់ និង​អ្នករបួស មាន​ទីលំនៅ ភូមិ​ប្រ​សំ ឃុំ​រអាង ស្រុក​កំពង់សៀម ខេត្តកំពង់ចាម​។​

​ប្រភពព័ត៌មាន​ដដែល បាន​និយាយទៀតថាៈ ចំណែក​ឯខាង​រថយន្ត ប្រភេទ​ស៊ីទែន​ប្រេង របស់​ក្រុមហ៊ុន​តេ​លា ម៉ាក​អាង​ទ័​រណាស់​សូ​ណាស់ ពណ៌​ស ពាក់​ស្លាក​លេខ ភ្នំពេញ 3D-6133 សណ្តោង​រ៉ឺម៉ក​ស៊ីទែន​សាំង ពាក់​ស្លាក​លេខ ភ្នំពេញ 4A-2641 ។ ដោយសារតែ​ការខ្វះ ការប្រុងប្រយ័ត្ន ក្នុងការ​បើកបរ បាន​ទៅបុក​ម៉ូតូ​ខាងលើ ដែល​កំពុង​បើកបរ​ទិសដៅ​បញ្ច្រាស​គ្នា កិន​ចំ​ដងខ្លួន ស្លាប់​ម្នាក់ និង​កិន​ជើង របួសធ្ងន់​ម្នាក់ ហើយ​ខាង​អ្នកបើកបរ​រថយន្ត ដែល​នៅ​មិនទាន់ ស្គាល់​អត្តសញ្ញាណ បាន​ចត​ទុកចោល គេចខ្លួនបាត់​៕/V​-PC