​ប្រែ​សម្រួល : កញ្ញា​ដា​លី​ស (theguardian) ៖ រុស្ស៊ី​បាន​និយាយថា ខ្លួន​បាន​ប្រើ​មី​ស៊ី​ល​លឿន​ជាង​សំឡេង​គីន​ហ្សា​ល់​- Kinzhal (​កាំបិ​ស្នៀត​)​ថ្មី​បំផុត​របស់​ខ្លួន​ពីរ​ដង​ក្នុង​ប្រទេស​អ៊ុ​យក្រែន​​ដោយ​អះអាង​កាលពី​ថ្ងៃអាទិត្យ​ទី​២០​មីនា​ថា​បាន​បំផ្លាញ​ឃ្លាំង​ផ្ទុក​ប្រេងឥន្ធនៈ​នៅ​ជិត​ទីក្រុង​ម៉ា​យ​កូឡាយ (Mykolaiv)​និង​នៅ​ថ្ងៃ​សៅរ៍​បាន​បំផ្លាញ​ឃ្លាំង​ស្តុក​ទុក​មី​ស៊ី​ល​ក្រោម​ដី​និង​គ្រាប់កាំភ្លើង​នៅ​​ភាគ​ខាងលិច​ប្រទេស​។​

​ទីភ្នាក់ងារ​សារព័ត៌មាន​រដ្ឋ​អរ​អាយ​អេ ណូវ៉ូ​ស្ទី​- RIA Novosti បាន​និយាយថា ការវាយប្រហារ​នេះ​តំណាង​ឱ្យ​ការប្រើប្រាស់​អាវុធ​ជំនាន់​ក្រោយ​ជា​លើកដំបូង​ចាប់​តាំងពី​ការចាប់ផ្តើម​នៃ​សង្គ្រាម​​ក្នុងប្រទេស​អ៊ុ​យក្រែន ហើយ​អ្នកវិភាគ​លោក​ខាងលិច​បាន​និយាយថា វា​ជា​លើកទីមួយ​ហើយ​ដែល​មី​ស៊ី​ល​លឿន​ជាង​សំឡេង​ត្រូវបាន​ប្រើប្រាស់​ក្នុង​ការប្រយុទ្ធ​។​

​ប្រធានាធិបតី​រុស្ស៊ី លោក​វ្ល៉ា​ឌី​មៀ ពូ​ទីន បាន​ពណ៌នា​មី​ស៊ី​ល Kinzhal ដែល​រចនា​ឡើង​ដើម្បី​បាញ់​ចេញពី​យន្តហោះ​ចម្បាំង MiG ថា​ជា “​អាវុធ​ដ៏​ល្អឥតខ្ចោះ​”​។​វា​អាច​ហោះ​បាន​ក្នុង​ល្បឿន​ជាង​សំឡេង​​រហូតដល់ ១០​ដង ហើយ​ដូច​មី​ស៊ី​ល​បញ្ជា​ទិស​ដែល​យឺត​ជាង​នេះ​ដែរ វា​អាច​កាច់ចង្កូត​នៅ​ពាក់កណ្តាល​នៃ​ការហោះហើរ ដោយ​ធ្វើឱ្យ​វា​ពិបាក​សម្រាប់​ប្រព័ន្ធ​ការពារ​អាកាស​ក្នុង​ការតាមដាន​និង​ស្ទាក់ចាប់​។​

​មី​ស៊ី​ល​នេះ​អាច​ត្រូវបាន​ប្រើ​ដើម្បី​បញ្ជូន​ក្បាល​គ្រាប់​ធម្មតា​ក្នុង​ល្បឿន​កាន់តែ​លឿន​និង​បាញ់​ចំៗ​គោលដៅ​ជាង​គ្រាប់​ផ្សេងទៀត ប៉ុន្តែ​ក៏​អាច​ប្រើ​ដើម្បី​បញ្ជូន​អាវុធ​នុយក្លេអ៊ែរ​ផងដែរ​។ ​ប្រទេស​ជាច្រើន​កំពុង​ធ្វើការ​លើ​បច្ចេកវិជ្ជា​នេះ រួម​ទាំង​ចិន​និង​សហរដ្ឋ​អាម៉េរិក​។​

​លោក វ៉ា​ស៊ី​លី កា​ស៊ីន (Vasily Kashin)​ជា​អ្នកវិភាគ​រុស្ស៊ី បាន​ប្រាប់​ទីភ្នាក់ងារ​សារព័ត៌មាន​បារាំង AFP​ថា ការ​រុលចូល​និង​ថាមពល​បំផ្លិចបំផ្លាញ​ដ៏​ខ្លាំងក្លា​នៃ​ប្រព័ន្ធ​មី​ស៊ី​ល Kinzhal​មាន​ប្រសិទ្ធ​ភាព​ជាង​មី​ស៊ី​ល​ធម្មតា​ក្នុង​ការបំផ្លាញ​ទីតាំង​ស្តុក​ទុក​ក្រោម​ដី ប៉ុន្តែ​អ្នកជំនាញ​ផ្សេងទៀត​បាន​លើកឡើង​ថា វា​នឹង​មិន​មាន​ផលប៉ះពាល់​ខ្លាំង​ដល់​ដំណើរការ​នៃ​ជម្លោះ​នោះទេ​។​

​លោក ផាវែល ហ្វែល​ហ្គេន​ហូ​អឺ (Pavel Felgenhauer)​ជា​អ្នកវិភាគ​រុស្ស៊ី​ម្នាក់ទៀត បាន​និយាយថា មី​ស៊ី​ល​នេះ​នឹង​ផ្លាស់ប្តូរ​តិចតួច​នៅនឹងកន្លែង​ជាក់ស្តែង​ក្នុងប្រទេស​អ៊ុយ​ក្រែន​ក្រៅពី​”​ការផ្តល់​ឥទ្ធិ​​ពល​ផ្លូវចិត្ត​និង​ការឃោសនា​ជាក់លាក់​” ដោយ​បន្ថែម​ថា ការប្រើប្រាស់​មី​ស៊ី​ល​នេះ​ប្រហែល​ជា​បង្ហាញ​ថា​កងកម្លាំង​រុស្ស៊ី​កំពុង​អស់​អាវុធ​ផ្សេង​។​

​អ្នកវិភាគ​យុទ្ធសាស្ត្រ​ការពារជាតិ​របស់​បែលហ្ស៊ិក លោក យ៉ូ​សេប ហិន​រ៉ូ​ទីន (Joseph Henrotin) ក៏​បាន​សរសេរ​នៅលើ Twitter ដែរ​ថា រុស្ស៊ី​អាច​នឹង​អស់​មី​ស៊ី​ល​ផ្លោង​រយៈ​ចម្ងាយ​ខ្លី Iskander ឬ ចង់​បង្កើន​ប្រៀប​ឈ្នះ​ឡើងវិញ​ដោយ​ប្រើ​មី​ស៊ី​ល​លឿន​ជាង​សំឡេង ដែល​មាន​សមត្ថភាព​នុយក្លេអ៊ែ​រ​។​

​រដ្ឋាភិបាល​អ៊ុយ​ក្រែន​បានបញ្ជាក់​ពីការវាយ​ប្រ​ហារ​នេះ ប៉ុន្តែ​និយាយថា​ខ្លួន​មិន​ទាន់​អាច​និយាយថា ប្រភេទ​មី​ស៊ី​ល​អ្វី​ត្រូវ​បាន​ប្រើ​នោះឡើយ​៕

​រុស្ស៊ី​ប្រើមី​ស៊ី​ល​លឿន​ជាង​សំឡេង Kinzhal ថ្មី​បំផុត​របស់​ខ្លួន​ពីរ​ដង​ក្នុង​ប្រទេស​អ៊ុ​យក្រែន