ដោយៈ​សុ​ផានី​តា​/​កោះកុងៈ លោក ផៃ ស៊ី​ផាន ប្រធាន​អង្គភាព​អ្នកនាំពាក្យ​រាជរដ្ឋាភិបាល​កម្ពុជា នៅ​ព្រឹក​ថ្ងៃទី​២១ ខែមីនា ឆ្នាំ​២០២២ បាន​បំផុសស្មារតី និង​ចែករំលែក​ចំណេះដឹង​ពី​វិស័យ​ព័ត៌មាន​ដល់​មន្ត្រី​ថ្នាក់ក្រោម​ជាតិ​ឱ្យ​ហ៊ាន​ផ្សព្វផ្សាយ ក៏ដូចជា​ឆ្លើយតប​ព័ត៌មាន​ប្រកបដោយ​ភាព​ទទួលខុសត្រូវ​ខ្ពស់​។​

​នៅ​ចំពោះមុខ​អភិបាលរង​ខេត្តកោះកុង ខេត្ត​កែប កំពត កែប និង​មន្ត្រី​មកពី​មន្ទីរ​អង្គភាព​ជំនាញ​ច្រើន​រូប​ទៀត លោក ផៃ ស៊ី​ផាន រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​ប្រធាន​អង្គភាព​អ្នកនាំពាក្យ​រាជរដ្ឋាភិបាល បានឱ្យដឹងថា នៅក្នុង​បរិបទ​នេះ ព័ត៌មាន​ត្រូវ​ស្ថិតក្នុង​វិស័យ និង​ចរាចរណ៍​ចេញពី​ប្រភព​ផ្លូវការ​ទៅដល់​សាធារណជន ដើម្បី​ការយល់ដឹង​ចូលរួម​លើ​កិច្ច​កសាង​នីតិរដ្ឋ​ប្រកបដោយ​ការទទួលខុសត្រូវ ស្របតាម​គោលនយោបាយ​អភិបាលកិច្ច​ល្អ​នៃ​យុទ្ធសាស្ត្រ​ចតុកោណ​ដំណាក់កាល​ទី​៤​។​

​លោក ផៃ ស៊ី​ផាន គូសបញ្ជាក់​ក្នុង​ការបើក​សិក្ខា​សាល​ការិយាល័យ​ព័ត៌មាន​ឈ្លាសវៃ និង​អភិបាលកិច្ច​ល្អ​ក្នុង​វិស័យ​ព័ត៌មាន​ថា ទស្សនទាន យន្តការ និង​យុទ្ធសាស្ត្រ​ចែករំលែក​ចំណេះដឹង​ពី​វិស័យ​ព័ត៌មាន​នៅថ្ងៃនេះ ជា​មូលដ្ឋានគ្រឹះ​មួយ​របស់​រដ្ឋ​ក្នុងទិសដៅ​កសាង​ឱ្យបាន​នូវ​អភិបាលកិច្ច​ល្អ​លើ​វិស័យ​ព័ត៌មាន​ថ្នាក់ក្រោម​ជាតិ ដើម្បី​ជំរុញ​ប្រសិទ្ធិភាព​នៃ​ការផ្សព្វផ្សាយ​បំផុស​ប​ញ្ចូ​ន​ព័ត៌មាន​ចូល​កៀក​ប្រជាពលរដ្ឋ​សម្រាប់​ផលប្រយោជន៍​ផ្ទាល់​នៅ​មូលដ្ឋាន​ដោយ​ភាពត្រឹមត្រូវ​ច្បាស់លាស់​។​

​ប្រធាន​អង្គភាព​អ្នកនាំពាក្យ​រាជរដ្ឋាភិបាល សង្កត់ធ្ងន់​ដែរ​ថា ភាព​ទទួលខុសត្រូវ​ផ្សព្វផ្សាយ និង​ទំនាក់ទំនង​ឆ្លើយតប​បំភ្លឺ​លើ​បញ្ហា​អ្វីមួយ​នៅ​ថ្នាក់ក្រោម​ជាតិ គឺមាន​សារៈសំខាន់ ចៀ​វាង​អ្នកទទួល​ព័ត៌មាន​មានការ​ភ័ន្តច្រឡំ​បង្ក​ឱ្យ​ស្មុគស្មាញ​លំបាក​ដោះស្រាយ​។​បច្ចុប្បន្ន​អង្គភាព​អ្នកនាំពាក្យ​រាជរដ្ឋាភិបាល​បាន​បន្ត​ពង្រឹង​ការអនុវត្ត​តួនាទី​ភារកិច្ច​ស្នូល​របស់ខ្លួន​ដោយ​ឆន្ទៈ​ប្តេជ្ញា​យ៉ាង​មុះ​មុត​ចូលរួមចំណែក​លើ​អភិបាលកិច្ច​ល្អ​នៃ​វិស័យ​ព័ត៌មាន​ក្នុង​កិច្ចការពារ​សន្តិភាព ស្ថិរភាព​សង្គម និង​ការអភិវឌ្ឍន៍​ដ៏​ផុសផុល​ក្រោម​ម​គ្គុ​ទេសភាព​ដ៏​ប៉ិនប្រសប់​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​។​

​លោក ស្រេង ហុង អភិបាលរង​ខេត្តកោះកុង ថ្លែងថា រដ្ឋបាលខេត្ត​កំពុង​រៀបចំ​យ៉ាង​ច្បាស់លាស់ និង​ធានាថា​ដំណើរការបាន​ចំពោះ​យន្តការ​នៃ​លំហូ​ព័ត៌មាន និង​ប្រព័ន្ធ​ទំនាក់ទំនង​សាធារណៈ ដើម្បី​បង្កើន​ប្រសិទ្ធភាព​ការងារ​ក្នុង​អង្គភាព និង​ជួយ​ដល់​ការងារ​ផ្តល់​សេវាសាធារណៈ​ក្នុង​មូលដ្ឋាន​។​
​បើតាម​លោក​អភិបាលរង​ខេត្តកោះកុង ការគ្រប់គ្រង​ព័ត៌មាន​ដែល​បាន​ផ្សព្វផ្សាយ​ចេញ​ដើម្បី​ឈានទៅ​កាត់បន្ថយ​ឱ្យបាន​កម្រិត​អប្បបរមា​ចំពោះ​ព័ត៌មាន​ប្រឌិត ដែលមាន​ចេតនា​បង្កើត​ការភ័ន្តច្រឡំ​បំផុស​ការសង្ស័យ​ញុះញុង់​បង្ក​អសន្តិសុខ​សណ្តាប់ធ្នាប់​។​

​រីឯ​លោក គឹម ចំណាន មន្ត្រី​នៃ​មន្ទីរ​ផែនការ​ខេត្ត​ព្រះសីហនុ និង​លោក វ៉ា វណ្ណ​ទិ​ត្យ ប្រធានការិយាល័យ​រដ្ឋ​បាល​មន្ទីរ​សាធារណការ និង​ដឹកជញ្ជូន​ខេត្តកោះកុង ឯកភាព​នូវ​អ្វីដែល​ជាការ​បំផុសស្មារតី​របស់លោក​ប្រធាន​អង្គភាព​អ្នកនាំពាក្យ​រាជរដ្ឋាភិបាល ដោយ​ចាត់ទុកថា កិច្ចការ​ប្រមូល ប​ញ្ចូ​ន​ផ្សព្វផ្សាយ និង​ឆ្លើយតប​ព័ត៌មាន​បំភ្លឺ​ទៅកាន់​ប្រជាពលរដ្ឋ​ពិត​ជាមាន​សារៈសំខាន់​ខ្លាំងណាស់ ដើម្បី​ចៀសវាង​ការភ័ន្តច្រឡំ​ណាមួយ​ដែល​ពុំមែន​ជាការ​ពិតប្រាកដ​។​

​ក្រុមមន្ត្រី​ដែល​មក​ទទួល​វគ្គប​ណ្តុះ​បណ្តាល​នេះ អះអាងថា ពួកគេ​នឹង​យកចំណេះ​ដឹង​ដែល​បាន​សិក្សា​ទៅ​អនុវត្ត​ប្រកបដោយ​ការទទួលខុសត្រូវ​ប្រក​ប​ដោយ​ប្រសិទ្ធិភាព តម្លាភាព​ទៅកាន់​ប្រជាពលរដ្ឋ ព្រមទាំង​សាធារណជន​ដោយ​មិន​អនុញ្ញាតឱ្យ​កើតមាន​ព័ត៌មាន​ក្លែងក្លាយ​មក​បំភ្លៃ​នោះទេ​។​

​អង្គភាព​អ្នកនាំពាក្យ​រាជរដ្ឋាភិបាល បង្ហាញថា កន្លងទៅ​មន្ត្រី​ថ្នាក់ក្រោម​ជាតិ​មួយចំនួនធំ​មាន​សមត្ថភាព​គ្រប់គ្រាន់​ហើយ​សម្រាប់​ឆ្លើយតប​បកស្រាយ​រាល់​បញ្ហា​នានា​ដែល​កើតមានឡើង​នៅតាម​អង្គភាព​មន្ទីរ​របស់​ពួកគេ​។ ក៏ប៉ុន្តែ​ទោះជា​យ៉ាងណា អង្គភាព​អ្នកនាំពាក្យ​រាជរដ្ឋាភិបាល​នៅតែ​បន្ត ពង្រឹង​ចំណេះដឹង​សមត្ថភាព​បន្ថែម​ដល់​អ្នក​ដែល​មិនទាន់​យល់ដឹង​ពី​តួនាទី​ភារកិច្ច​ជាម​ន្ត្រី​ព័ត៌មាន​៕​