​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រធានាធិបតី​វ៉ូ​ឡូ​ឌី​មៀ ហ្សេ​លេន​ស្គី បាន​សរសើរ​នាង មី​ឡា គូ​នី​ស (Mila Kunis) និង​លោក អា​ស្តុន គូត​ឆឺ (Ashton Kutcher)​សម្រាប់​ការ​រៃ​​អង្គាស​ប្រាក់​បាន​ប្រហែល ៣៥ លាន​ដុល្លារ​ដើម្បី​គាំទ្រ​ជនភៀសខ្លួន ដែល​ភៀសខ្លួន​ចេញពី​ប្រទេស​អ៊ុយ​ក្រែន​ហែកហួរ​ដោយ​សង្គ្រាម​។​

​ប្រធានាធិបតី​អ៊ុយ​ក្រែន​បាន​សន្ទនា​តាម​វីដេអូ​បន្ត​ផ្ទាល់​ជាមួយ​គូស្នេហ៍​ជា​តារា​ល្បី​នេះ​កាលពី​ថ្ងៃអាទិត្យ​ទី​២០​មីនា​ដើម្បី​ពិភាក្សា​ការងារ​របស់​ពួកគេ​ខណៈដែល​ចំនួន​ជនភៀសខ្លួន​អ៊ុ​យក្រែន​​បាន​កើនឡើង​លើស​ពី ៣,២ លាន​នាក់ នេះ​បើ​យោង​តាម​ទិន្នន័យ​ចុងក្រោយ​របស់​អង្គការសហប្រជាជាតិ​។​

​លោក​គូត​ឆឺ​អាយុ ៤៤ ឆ្នាំ និង​នាង​គូ​នី​ស​អាយុ ៣៨ ឆ្នាំ ដែល​កើត​នៅ​ទីក្រុង​ឆែរ​នី​វ​ស៊ី (Chernivtsi) ប្រទេស​អ៊ុ​យក្រែន បាន​ចាប់ផ្តើម​កម្មវិធី​រៃអង្គាស GoFundMe កាលពី​ថ្ងៃទី ៣​ខែ​មីនា​​ដើម្បី​ផ្តល់​មូលនិធិ​ដល់​ក្រុមហ៊ុន Flexport និង Airbnb ដែល​មាន​មូលដ្ឋាន​នៅ​ទីក្រុង​សាន់​ហ្វ្រា​ន់​ស៊ី​ស្កូ​។ Flexport គឺជា​ក្រុមហ៊ុន​ដឹកជញ្ជូន​ទំនិញ​ផ្គត់ផ្គង់​ដល់​ជនភៀសខ្លួន​នៅ​ទូ​ទាំង​ទ្វីបអឺរ៉ុប ហើយ​ក្រុមហ៊ុន Airbnb កំពុង​ផ្តល់​ឱ្យ​ពួកគេ​នូវ​លំនៅដ្ឋាន​រយៈពេល​ខ្លី​ដោយ​ឥតគិតថ្លៃ​។​

​ប្រធានាធិបតី​អ៊ុយ​ក្រែន​បាន​បង្ហោះ​ពាក្យ​សរសើរ​អ្នក​ទាំង​ពីរ ដោយ​សរសេរថា “​ពួកគេ​គឺជា​អ្នក​ដំបូង​គេ​ដែល​ឆ្លើយតប​ចំពោះ​ទុក្ខព្រួយ​របស់​យើង​”​។ លោក​បាន​និយាយ​បន្តទៀតថា​”​ពួកគេ​បាន​រៃ​​អង្គាស​ប្រាក់​បាន ៣៥ លាន​ដុល្លារ​រួចហើយ ហើយ​កំពុង​ផ្ញើ​វា​ទៅ @flexport & @ Airbnb ដើម្បី​ជួយ​ជនភៀសខ្លួន [​ទង់ជាតិ​អ៊ុ​យក្រែន​]”​។​

​លោក​បាន​បញ្ចប់​ការសរសេរ​សារ​របស់​គាត់​ថា “​សូម​ថ្លែងអំណរគុណ​ចំពោះ​ការគាំទ្រ​របស់​ពួកគេ​។ ស្ងើចសរសើរ​ចំពោះ​ការតាំង​ចិត្ត​របស់​ពួកគេ​។ ពួកគេ​បំផុសទឹកចិត្ត​លើ​ពិភពលោក​។​#​សាមគ្គី​ជា​​មួយ​អ៊ុ​យក្រែន​”៕

​លោក​ហ្សលេន​ស្គី​សរសើ​រនាង​គូនី​ស​និង​លោកគូត​ឆឺ​សម្រាប់​ការ​រៃ​អង្គាស​លុយ​ជួយ​ជនភៀសខ្លួន​អ៊ុ​យក្រែន