ប្រែ​សម្រួលៈ​បំណង​(​ដេល្លី​ម៉េល​)៖ ដើម្បី​ជា​ផ្នែក​នៃ​កិច្ច​ខិតខំ​ជួយ​ប្រជាជាតិ​ដែន​កោះ​ដែល​កំពុង​ជួប​វិបត្តិ​ខ្វះ​សាច់ប្រាក់​និង​បំណុល​បរទេស​នេះ ចិន​កំពុង​ពិចារណា​ផ្តល់​ឥណទាន​១,៥​ពាន់​លាន​ដុល្លារ​​ដល់​ស្រីលង្កា និង​ការសំរេចចិត្ត​មួយ​នឹង​ត្រូវ​ធ្វើឡើង​ក្នុងពេល​ឆាប់ៗ នេះ​បើ​តាម​មន្ត្រីជាន់ខ្ពស់​ចិន​ម្នាក់​បាន​ប្រាប់អោយដឹង​កាលពី​ថ្ងៃ​ចន្ទ ។​

​ឯកអគ្គរដ្ឋទូត​ចិន​ប្រចាំ​ស្រីលង្កា​លោក ឈី ហ្សេ​នហុង​(Qi Zhenhong)​បាន​ប្រាប់​អ្នកយកព័ត៌មាន​ថា ភាគី​ទាំងពីរ​បាន​ពិភាក្សា​អំពី​កំចី​ដាច់ដោយឡែក​មួយ​តំលៃ​មួយ​ពាន់​លាន​ដុល្លារ​ទៀត ដែល​​រដ្ឋាភិបាល​ស្រីលង្កា​ស្នើសុំ​។​

​លោក​បាន​បន្ថែមថា ប្រទេស​អាស៊ី​ខាងត្បូង​មួយ​នេះ​ត្រូវបាន​ធនាគារ​អភិវឌ្ឍន៍​ចិន​សុំ​ផ្តល់​កំចី​ចំនួន​៥០០​លាន​ដុល្លារ​កាលពី​ថ្ងៃ​១៨​មីនា​។​

​ស្រីលង្កា​ត្រូវ​សងបំណុល​ប្រមាណ​៤​ពាន់​លាន​ដុល្លារ​នៅ​ឆ្នាំនេះ រួមមាន​១​ពាន់​លាន​ជា​មូល​ប​ត្រ​អន្តរជាតិ​ដែល​ត្រូវ​សង​នៅ​ខែកក្កដា តែ​ទុនបំរុង​របស់​ខ្លួន​នៅសល់តែ​២,៣១​ពាន់​លាន​ដុល្លារ គិត​ត្រឹម​ចុងខែ​​កុម្ភៈ ដោយ​ធ្លាក់​ចុះ​អស់​ប្រមាណ​៧០​ភាគរយ​ធៀប​នឹង​ពីរ​ឆ្នាំមុន​។​

​សូមបញ្ជាក់​ថា ប្រទេស​នេះ​កំពុង​ខិតខំ​ស្វែងរក​លុយ​ពី​ប្រភព​ផ្សេងៗ​ដើម្បី​ទិញ​ទំនិញ​ចាំបាច់​មក​ពី​ក្រៅប្រទេស ដូចជា​ប្រេងឥន្ធនៈ និង​ថ្នាំពេទ្យ ។​ការខ្វះ​ប្រេង​សំរាប់​ដំណើរការ​ម៉ាស៊ីនភ្លើង​នាំ​ដល់​ការ​កាត់​​បន្ថយ​ការផ្គត់ផ្គង់​ចរន្ត​អគ្គិសនី ឬ​ដូរ​វេន​គ្នា​ដាច់​ភ្លើង​នៅ​ទូទាំង​ប្រទេស​។​

​ចិន​ជា​ម្ចាស់បំណុល​ធំ​បំផុត​ទី​បួន​របស់​ស្រីលង្កា ដោយ​នៅ​ពីក្រោយ​ទីផ្សារ​ហិរញ្ញវត្ថុ​អន្តរជាតិ ធនាគារ​អភិវឌ្ឍន៍អាស៊ី​និង​ជប៉ុន​។​

​នៅ​រយៈពេល​មួយ​ទសវត្សរ៍​មក​នេះ ចិន​បាន​អោយ​ស្រីលង្កា​ខ្ចី​ប្រាក់​ជាង​៥​ពាន់​លាន​ដុល្លារ​សំរាប់​សាងសង់​ផ្លូវ​ហាយវ៉េ កំពង់ផែ អាកាសយានដ្ឋាន​មួយ​ព្រមទាំង​រោងចក្រ​អគ្គិសនី​ដើរ​ដោយ​ថាមពល​ធ្យូង​ថ្ម​​មួយ​ផង​ដែរ​។​

​ប្រធានាធិបតី​ស្រីលង្កា​លោក ហ្គោ​តាបា​យ៉ា រ៉ា​ចា​ប៉ាក់​សា​(Gotabaya Rajapaksa)​បាន​ស្នើ​អោយ​ចិន​ជួយ​កែសម្រួល​ការ​សងបំណុល​ឡើងវិញ កាល​ពី​លោក​ជួប​រដ្ឋមន្ត្រីការបរទេស​ចិន​លោក​វ៉ាង យី​​កាលពី​ខែ​មករា តែ​ចិន​នៅ​មិនទាន់​ឆ្លើយតប​ទេ​។​

​ប្រភព​ក្រសួង​ហិរញ្ញវត្ថុ​មួយ​បាន​និយាយថា ការសង​ចិន​មាន​ចំនួន​ប្រមាណ​៤០០​ទៅ​៥០០​លាន​ដុល្លារ​។​

​លោក រ៉ា​ចា​ប៉ាក់​សា បាន​និយាយ​កាលពី​សប្តាហ៍​មុន​ថា លោក​នឹង​ធ្វើការ​ជាមួយ​អង្គការ​មូលនិធិ​រូបិយវត្ថុ​អន្តរជាតិ​IMF​ដើម្បី​ជួយ​ប្រទេស​ដោះស្រាយ​វិបត្តិ​សេដ្ឋកិច្ច ហើយ​កិច្ច​ពិ​ភក្សា​ផ្លូវការ​នឹង​ចាប់​​ផ្តើម​នៅ​ខែ​មេសា​៕

​មុន​ពេល​ផ្ទុះ​ជំងឺ​កូវី​ដ​១៩ ចិន​ជា​ប្រភព​ទេសចរ​ដ៏​ធំ​របស់​ស្រីលង្កា​និង​ប្រទេស​នេះ​នាំ​ទំនិញ​ចូល​ពី​ចិន​ច្រើន​ជាង​ប្រទេស​ណាៗ​ទាំងអស់​