​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​អះអាង​កាលពី​ថ្ងៃអាទិត្យ​ទី​២០​មីនា​ថា កងកម្លាំង​របស់​ខ្លួន​បាន​បាញ់សម្លាប់​មេបញ្ជាការរង​នៃ​កង​នាវា​សមុទ្រ​ខ្មៅ​របស់​រុស្ស៊ី​ក្នុងកា​វាយ​សំពង​​ដ៏​ធ្ងន់​មួយ​ទៀត​ចំពោះ​កងកម្លាំង​របស់​លោក​វ្ល៉ា​ឌី​មៀ ពូ​ទីន​។​

​អនុសេនីយ៍ឯក អង់​ដ្រេ ប៉ា​លី​យ (Andrey Paliy) អាយុ ៥១ ឆ្នាំ​គឺជា​មន្ត្រី​កងទ័ពជើងទឹក​ជាន់ខ្ពស់​តែមួយគត់​ដែល​ត្រូវបាន​សម្លាប់​នៅ​ក្នុង​សង្គ្រាម​ក្នុងប្រទេស​អ៊ុ​យក្រែន ។​

​លោក​វរសេនីយ៍ឯក សឺ​ហ្គេ ស៊ូ​ខា​រ៉េ​វ (Sergei Sukharev) នៃ​កងវរសេនាធំ​វាយលុក​ឆត្រយោង​លេខ ៣៣១ មក​ពី​កូ​ស្ត្រូ​ម៉ា (Kostroma) ត្រូវបាន​សម្លាប់​នៅ​ថ្ងៃទី ១៨ ខែ​មីនា ហើយ​លោក អង់​ដ្រេ ស៊ូ​ខូ​វេត​ស្គី (Andrei Sukhovetsky) អាយុ ៤៧ ឆ្នាំ​ត្រូវបាន​សម្លាប់​ក្នុង​ប្រតិបត្តិការ​ពិសេស​មួយ​ដោយ​អ្នក​លប​បាញ់កាំភ្លើង​ស៊ី​ប​នៅ​ថ្ងៃទី ៣ ខែ​មីនា​។​

​ក្រៅពីនេះ ឧត្តមសេនីយ៍ទោ អូ​ឡេក មី​តយ៉ា​អេវ (Oleg Mityaev) អាយុ ៤៧ ឆ្នាំ មេបញ្ជាការ​កងពលធំ​កាំភ្លើង​វែង​លេខ ១៥០​របស់​កងទ័ពជើងគោក​បាន​ស្លាប់​ក្នុងការ​ប្រយុទ្ធ​គ្នា​ជុំវិញ​ទីក្រុង​​ម៉ា​រី​វ​ប៉ូល ឧត្តមសេនីយ៍ វី​តា​លី ជើ​រ៉ាស៊ី​ម៉ូ​វ (Vitaly Gerasimov) អាយុ ៤៥ ឆ្នាំ​ត្រូវបាន​សម្លាប់​នៅ​ថ្ងៃទី ៧ ខែ​មីនា​នៅ​ក្រៅ​ក្រុង​ខា​គី​វ (Kharkiv) ភាគ​ខាងកើត និង​វរសេនីយ៍ឯក អង់​ដ្រេ កូឡេស​នី​កូវ (Andrey Kolesnikov) មេបញ្ជាការ​កង​ឆ្មាំ​រថក្រោះ​កាន់តេ​មី​រ៉ូ​វស្កា​យ៉ា (Kantemirovskaya) ត្រូវបាន​សម្លាប់​នៅ​ក្នុង​ការប្រយុទ្ធ​គ្នា​នៅ​ថ្ងៃទី ១១ ខែ​មីនា​។​

​ដំណឹង​នេះ​កើតឡើង​ខណៈ​រុស្ស៊ី​អះអាងថា​បាន​វាយ​ចំ​ទីតាំង​ហ្វឹកហ្វឺន​សម្រាប់​អ្នក​ប្រយុទ្ធ​បរទេស ដោយ​សម្លាប់​កងកម្លាំង​ពិសេស​និង ទាហាន​ស៊ីឈ្នួល​មិនមែន​ជនជាតិ​អ៊ុយ​ក្រែន​ជាង ១០០ នាក់​។​

​ការស្លាប់​របស់​លោក​ប៉ា​លី​យ​ហាក់​ត្រូវ​បាន​បញ្ជាក់​ដោយ​មិត្តភក្តិ​ជនជាតិ​រុស្សី​ឈ្មោះ កុន​ស្តា​ទីន សារិន​កូ (Konstantin Tsarenko)​ជា​លេខាធិការ​នៃ​ក្រុមប្រឹក្សា​សាធារណៈ​នៃ​សាលា​កងទ័ព​ជើង​​ទឹក ទោះបីជា​ការស្លាប់​មិន​ត្រូវបាន​ទទួល​ស្គាល់​ជា​ផ្លូវការ​ដោយ​ទីក្រុង​មូ​ស្គូ​ក៏ដោយ​៕

​អនុសេនីយ៍ឯក អង់​ដ្រេ ប៉ា​លី​យ ត្រូវបាន​សម្លាប់​កាលពី​ថ្ងៃ​អាទិត្យ​នៅ​សមរភូមិ​ក្រុង​ម៉ា​រី​វ​ប៉ូល​