​ប្រែ​សម្រួលៈ​បំណង​(​ដេល្លី​ម៉េល​)៖​យន្តហោះ​Boeing 737​មួយ​របស់​ក្រុមហ៊ុន​អាកាសចរណ៍​ចិន​China Eastern​ជាមួយនឹង​មនុស្ស​១៣២​នាក់​នៅក្នុង​យន្តហោះ​បាន​ធ្លាក់​កាលពី​ថ្ងៃ​ចន្ទ​ទី​២១​មីនា​​នៅ​ខេត្ត​ហ្កាងស៊ី​។​

​រដ្ឋបាល​អាកាសចរណ៍​ស៊ីវិល​(CAAC)​ចិន​បាន​និយាយ​នៅក្នុង​សេចក្តីថ្លែងការណ៍​មួយ​ថា ការធ្លាក់​បាន​កើត​ឡើង​ជិត​ទីក្រុង វូ​ចូ​វ​(Wuzhou)​។​យន្តហោះ​បាន​ចេញពី​ទីក្រុង​គុន​មិញ​ក្នុង​ខេត្ត​យុន​ណាន​ទៅ​​កាន់​ទីក្រុង​ឧស្សាហកម្ម​ក្វាង​ចូ​វ​នៅតាម​ឆ្នេរ​ខាងកើត​។​

​នៅ​មិនទាន់មាន​សេចក្តីរាយការណ៍​អំពី​ការស្លាប់​ឬ​រងរបួស​ពី​គ្រោះថ្នាក់​យន្តហោះ​នេះ​នៅឡើយ​ទេ​។​យន្តហោះ​បាន​ដឹក​អ្នកដំណើរ​១២៣​នាក់​និង​សមាជិក​យន្តហោះ​ចំនួន​៩​នាក់ សរុប​១៣២​នាក់​នៅ​ពេល​វា​​ធ្លាក់​។​

CAAC​បាន​និយាយថា ខ្លួន​បាន​បញ្ជូន​មន្ត្រី​មួយក្រុម​ទៅកាន់​កន្លែង​ធ្លាក់ និង​បុគ្គលិក​សេវា​អគ្គិភ័យ​ខេត្ត​ហ្កាងស៊ី​បាន​និយាយថា ខ្លួន​កំពុង​ធ្វើ​ការគ្រប់គ្រង​អគ្គិភ័យ​បង្កឡើង​ដោយ​ការធ្លាក់​យន្តហោះ​។​

​រូបភាព​ផ្កាយរណប​បង្ហាញ​អគ្គិភ័យ​ដ៏​ធំ​មួយ​នៅ​កន្លែង​យន្តហោះ​ធ្លាក់​នៅ​ពេល​ការ​ទូរស័ព្ទ​ទៅកាន់​ក្រុមហ៊ុន​អាកាសចរណ៍​China Eastern មិន​មាន​ការឆ្លើយតប​។​

​ក្នុងពេល​ជាមួយគ្នា សារព័ត៌មាន​រដ្ឋ​ចិន​បាន​និយាយថា ប៉ូលិស​មូលដ្ឋាន​បាន​ទទួល​ការហៅ​ទូរស័ព្ទ​មកពី​អ្នក​ភូមិ​ប្រាប់​ពី​ការធ្លាក់​យន្តហោះ​នៅ​ម៉ោង​ប្រមាណ​២​កន្លះ​រសៀល​៕

​រូប​ឯកសារ​បង្ហាញ​យន្តហោះ​ដឹក​អ្នកដំណើរ​ក្នុង​ក្រុមហ៊ុន​China Eastern​មួយ​ត្រៀម​ចេញដំណើរ​នៅ​ក្រុង​ប៉េកាំង​កាលពី​ឆ្នាំ​២០១៩

​រូបភាព​ផ្កាយរណប​បង្ហាញ​អគ្គិភ័យ​ដ៏​ធំ​មួយ​នៅ​កន្លែង​យន្តហោះ​ធ្លាក់ តែស្លាប់ឬរបួសប៉ុន្មាននៅមិនទាន់ដឹងនៅឡើយទេ