​ប្រែ​សម្រួលៈ​បំណង​(​ដេល្លី​ម៉េល​,ST)៖​ជប៉ុន​កាលពី​ថ្ងៃ​អង្គារ​បាន​ប្រឆាំង​ជំទាស់​ជាខ្លាំង​ចំពោះ​ការសំរេចចិត្ត​របស់​រដ្ឋាភិបាល​ក្រុង​មូ​ស្គូក្នុង​ការបោះបង់​ចោល​កិច្ច​ពិភាក្សា​ស្តីពី​សន្ធិសញ្ញា​សន្តិភាព​សង្គ្រាម​​លោក​លើក​ទី​ពីរ ដោយសារ​តែ​ចម្លើយ​តប​ដ៏​ខ្លាំងក្លា​របស់​រដ្ឋាភិបាល​ក្រុង​តូ​ក្យូ​ចំពោះ​ប្រតិបត្តិការ​យោធា​របស់​រុស្ស៊ី​នៅ​អ៊ុ​យក្រែន​។​

​នាយករដ្ឋមន្ត្រី​ជប៉ុន​លោក ហ្វ៊ុយ​មី​អូ គី​ស៊ី​ដា បាន​និយាយ​នៅក្នុង​សភា​ថា «​សភាពការណ៍​ចុងក្រោយ​កើតឡើង​ដោយសារ​លទ្ធផល​នៃ​ការឈ្លានពាន​របស់​រុស្ស៊ី​លើ​អ៊ុ​យក្រែន ហើយ​ការប៉ុនប៉ង​របស់​រុស្ស៊ី​ដើម្បី​​បង្វែរ​បញ្ហា​ទៅ​កាន់​ទំនាក់ទំនង​ជប៉ុន​-​រុស្ស៊ី វា​មិន​ត្រឹមត្រូវ​ខ្លាំង​មែនទែន និង​មិន​អាច​ទទួលយកបាន​ទាំងស្រុង​»​។​

​ដោយ​ថ្កោលទោស​រុស្ស៊ី​ចំពោះ​ការប្រើ​កម្លាំង​ដើម្បី​ផ្លាស់ប្តូរ​ស្ថានភាព​ជាក់ស្តែង​ជា​ឯ​តោ​ភាគី លោក​បាន​បន្ថែមថា «​ជប៉ុន​សូម​ប្រឆាំង​ជំទាស់​យ៉ាង​មុតមាំ​»​។​

​សូមបញ្ជាក់​ថា ជប៉ុន​និង​រុស្ស៊ី​អស់​ពេល​ជា​ច្រើន​ឆ្នាំ​បាន​ប៉ុនប៉ង​បង្កើត​កិច្ចព្រមព្រៀង​ស្តីពី​សន្ធិសញ្ញា​ក្រោយ​សង្គ្រាមលោកលើកទីពីរ តែ​ឋានៈ​កោះ​ចំនួន​បួន​ដែល​រុស្ស៊ី​កាន់កាប់​ក្រោយ​សង្គ្រាមលោកលើកទី​​ពីរ​តែ​ជប៉ុន​អះអាងថា​ជា​របស់​ខ្លួន​នោះ នៅតែ​ជា​ចំណុច​រាំងស្ទះ​ដ៏​សំខាន់​។​

​ដោយ​ទំនង​ជា​សងសឹក​នឹង​ជំហរ​ខ្លាំងក្លា​របស់​រដ្ឋាភិបាល​ក្រុង​តូ​ក្យូ​ក្នុង​ការដាក់ទណ្ឌកម្ម​លើ​ខ្លួន រុស្ស៊ី​កាលពី​យប់​ថ្ងៃ​ចន្ទ​បាន​និយាយថា ខ្លួន​នឹង​បោះបង់​ចោល​កិច្ចពិភាក្សា​នេះ ដោយ​លើ​ហេតុផល​ថា​«​មិន​​អាច​បន្ត​ការពិភាក្សា​តទៅទៀត​បាន​ជាមួយ​ប្រទេស​មួយ​ដែល​ប្រកាន់​ជំហរ​អរិភាព​ដោយ​បើកចំហ និង​ព្យាយាម​បង្ក​ផលប៉ះពាល់​លើ​ផលប្រយោជន៍​របស់​ប្រទេស​យើង​»​។​

​រដ្ឋាភិបាល​ក្រុង​មូ​ស្គូ ក៏​បាន​បញ្ចប់​របប​មិន​យក​ទិដ្ឋាកា​លើ​ប្រជាជន​ជប៉ុន​ដែល​ចង់​ទៅ​ទស្សនា​កោះមាន​ជម្លោះ​ទាំង​បួន ព្រមទាំង​ដកខ្លួន​ចេញពី​កិច្ច​ពិ​ភក្សា​អំពី​សកម្មភាព​សេដ្ឋកិច្ច​រួម​គ្នា​នៅ​ទីនោះ​។​

​ជប៉ុន​ស្ថិត​ក្នុងចំណោម​ក្រុម​ប្រទេស​មាន​សេដ្ឋកិច្ច​ជឿនលឿន​ទាំង​ប្រាំពីរ​ហៅថា G-7​ក្នុង​ការដាក់ទណ្ឌកម្ម​តឹងរឹង​លើ​បណ្តា​ស្ថាប័នហិរញ្ញវត្ថុ​និង​ក្រុម​មេដឹកនាំ​រុស្ស៊ី​។​

​លោក​គី​ស៊ី​ដា បាន​និយាយ​កាលពី​ថ្ងៃ​អង្គារ​ថា «​ជំហរ​របស់​ជប៉ុន​ក្នុង​ការដោះស្រាយ​បញ្ហា​ដែនដី​ខាងជើង​រហូតដល់​ការចុះហត្ថលេខា​លើ​សន្ធិសញ្ញា​សន្តិភាព​មួយ​គឺ​មិន​ផ្លាស់ប្តូរ​ទេ​។​តែ​ការឈ្លានពាន​របស់​​រុស្ស៊ី​លើ​អ៊ុ​យក្រែន នាំអោយ​យើង​មិន​មាន​សង្ឃឹម​សំរាប់​បញ្ហា​នេះ​»៕

​លោក​គី​ស៊ី​ដា បាន​និយាយថា ឥឡូវ​វា​មិន​អាច​ស្រ​មៃដល់​កិច្ចសហប្រតិបត្តិការ​សេដ្ឋកិច្ច​ថ្មី​ជាមួយ​រុស្ស៊ី​ទេ តែ​ជប៉ុន​នៅ​មិនទាន់​ដកខ្លួន​ចេញពី​គំរោង​ថាមពល​រួមគ្នា​ជាមួយ​រុស្ស៊ី​នៅឡើយ​ទេ​