​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ជនភៀសខ្លួន​រ៉ូ​ហ៊ីង​យ៉ា​នៅក្នុង​ប្រទេស​បង់​ក្លា​ដែស​កាលពី​ថ្ងៃ​ចន្ទទី​២១​មីនា​បាន​ស្វាគមន៍​ការប្រកាស​របស់​សហរដ្ឋអាម៉េរិ​កថា​រដ្ឋាភិបាល​ក្រុង​វ៉ាស៊ីនតោន​​ចាត់ទុក​ការគាបសង្កត់​យ៉ាង​ឃោរឃៅ​លើ​ក្រុម​ជនជាតិភាគតិច​មូស្លីម​របស់​ពួកគេ​នៅក្នុង​ប្រទេស​មី​យ៉ាន់​ម៉ា​ថា​ជា​អំពើ​ប្រល័យ​ពូជសាសន៍​។​

​ខណៈ​ដំណឹង​នៃ​ការប្រកាស​ដោយ​រដ្ឋមន្ត្រី​ការបរទេស​អាម៉េរិក​លោក អ៊ែន​ថូ​នី ប្លីង​កិន បាន​រីក​រាលដាល​ពាសពេញ​ជំរំ​នៅក្នុង​ស្រុក​ខុក​ស្បា​ហ្សា (Cox’s Bazar)​ដែល​ឥឡូវ​ជា​ជម្រក​របស់​ជនជាតិ​​រ៉ូ​ហ៊ីង​យ៉ា​ប្រហែល ១ លាន​នាក់ អ្នកស្រុក​ជា​ច្រើន​បាន​សម្តែង​ការ​សាទរ​របស់​ពួកគេ​។​

​លោក សាឡា អ៊ូ​ដ​ឌី​ន (Sala Uddin) អាយុ ៦០ ឆ្នាំ ដែល​រស់​នៅ​ជំរំ​គូ​ទូ​ផា​ឡុង (Kutupalong) បាន​និយាយថា “​យើង​រីករាយ​ណាស់​ចំពោះ​ការប្រកាស​អំពី​អំពើ​ប្រល័យ​ពូជសាសន៍ សូម​អរគុណ​​ច្រើន​”​។​

​លោក​បាន​និយាយថា “​វា​មាន​រយៈពេល ៦០ ឆ្នាំ​ហើយ​ចាប់ផ្តើម​ពី​ឆ្នាំ ១៩៦២ ដែល​រដ្ឋាភិបាល​មី​យ៉ាន់​ម៉ា​បាន​ធ្វើ​ទារុណកម្ម​ពួកយើង និង​សហគមន៍​ជាច្រើន​ទៀត រួម​ទាំង​ជនជាតិ​រ៉ូ​ហ៊ីង​យ៉ា​ផងដែរ​។ ខ្ញុំ​គិតថា​ផ្លូវ​ដើម្បី​ចាត់​វិធានការ​របស់​ស​ហគ​មន៍​អន្តរជាតិ​ប្រឆាំង​នឹង​មី​យ៉ាន់​ម៉ា​បាន​បើកចំហ ដោយសារ​តែ​ការប្រកាស​នេះ​”​។​

​លោក​ប្លីង​កិន​បាន​និយាយ​នៅក្នុង​សុន្ទរកថា​នៅ​សារមន្ទីរ​រំលឹក​វិញ្ញាណក្ខន្ធ​អ្នក​ស្លាប់​ក្នុង​អំពើ​ប្រល័យពូជសាសន៍​ហូ​ឡូខូ​ស (Holocaust Memorial Museum)​របស់​សហរដ្ឋ​អាម៉េរិក​ថា​សហរដ្ឋ​​អាម៉េរិក​បាន​ធ្វើ​ការប្តេជ្ញា​ចិត្ត​កាលពី​ថ្ងៃ​ចន្ទ​ដើម្បី​ហៅ​ការគាបសង្កត់​នេះ​ថា​ជា​អំពើ​ប្រល័យពូជសាសន៍​ដោយ​ផ្អែក​លើ​ភស្តុតាង​ដែល​បាន​បញ្ជាក់​អំពី​អំពើ​ឃោរឃៅ​ដ៏​ធំ​លើ​ជន​ស៊ីវិល​ដោយ​យោធា​មី​យ៉ាន់​ម៉ា​នៅក្នុង​យុទ្ធនាការ​រីក​រាលដាល​ជា​ប្រព័ន្ធ​ប្រឆាំងនឹង​ជនជាតិ​រ៉ូ​ហ៊ីង​យ៉ា​។​

​លោក​អ៊ី​ម​ទី​អា​ស អា​ម៉េត (Imtiaz Ahmed) នាយក​មជ្ឈមណ្ឌល​សម្រាប់​ការសិក្សា​អំពី​អំពើ​ប្រល័យពូជសាសន៍​នៅ​សាកលវិទ្យាល័យ​ដា​ក្កា បាន​និយាយថា សេចក្តីប្រកាស​នេះ​គឺជា “​ជំហាន​វិជ្ជមាន​” ប៉ុន្តែ​វា​នឹង​មាន​សារៈសំខាន់​ក្នុងការ​មើល​ថា​តើ​សកម្មភាព និង “​ជំហាន​ជាក់ស្តែង​” ទៀត​ជា​អ្វី​។​

​លោក​អាម៉េត​បាន​និយាយថា “​គ្រាន់តែ​និយាយថា​អំពើ​ប្រល័យពូជសាសន៍​ត្រូវ​បាន​ប្រព្រឹត្ត​នៅក្នុង​ប្រទេស​មី​យ៉ាន់​ម៉ា​ប្រឆាំងនឹង​ជនជាតិ​រ៉ូ​ហ៊ីង​យ៉ា គឺ​មិន​ល្អ​គ្រប់គ្រាន់​ទេ​។ ខ្ញុំ​គិតថា យើង​ត្រូវ​មើល​នូវ​អ្វី​ដែល​នឹង​កើត​ឡើង​ចេញ​ពី​សេចក្តីថ្លែងការណ៍​នោះ​”៕

​រូប​ឯកសារ​បង្ហាញ​បុរស​រ៉ូ​ហ៊ីង​យ៉ា ត្រូង​ចងដៃ​ទៅក្រោង​និង​លត់ជង្គង់​នៅ​ចំពោះមុខ​កងសន្តិសុ​ខ​មី​យ៉ាន់​ម៉ា​នៅ​ក្នង​ភូមិ​មួយ​ក្នុង​រដ្ឋ​រ៉ា​ឃី​ន កាលពី​ឆ្នាំ​២០១៧

ជនភៀសខ្លួន​រ៉ូ​ហ៊ីង​យ៉ា​១​លាន​នាក់​កំពុង​រស់នៅ​ជំរំ​នៅក្នុង​ស្រុក​ខុក​ស្បា​ហ្សា