ដោយៈ ដេប៉ូ​/​ភ្នំពេញ​៖ រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ និង ឯកអគ្គរដ្ឋទូត​ឆែក​ប្រចាំ​កម្ពុជា​បាន​ជជែក​ពិភាក្សា​ការងារ​រួមគ្នា​ដោយបាន ផ្តោត​សំខាន់​លើ​កិច្ចសហប្រតិបត្តិការ​ផ្នែក​បណ្តុះបណ្តាល​បច្ចេកទេស និង​វិជ្ជាជីវៈ​(TVET) របស់​កម្ពុជា ទាំង​លើ​ការបណ្តុះបណ្តាល​សមត្ថភាព សិស្ស​-​និស្សិត រួម​នឹង​ការបំពាក់​សម្ភារ​បរិក្ខា​នានា​ជាការ​ជួយ​លើកកម្ពស់ ទៅលើ​ការ បណ្តុះបណ្តាល​ផ្នែក​នេះ​ឲ្យ​ស្របតាម​ការវិវឌ្ឍ​ន៍​យ៉ាង​រហ័ស នៃ​បច្ចេកវិទ្យា​របស់​ពិភពលោក​។

​គួរ​បញ្ជាក់ថា​កិច្ចពិភាក្សា​នេះ​បាន​ធ្វើឡើង​នា​ព្រឹក​ថ្ងៃទី​២២ ខែមីនា ឆ្នាំ​២០២២ នេះ​រវាង លោក អ៊ិត​សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ ជាមួយ លោក ម៉ា​ទីន វាវ​រ៉ា ( Martin Vávra) ឯកអគ្គរដ្ឋទូត​ឆែក​ប្រចាំ​កម្ពុជា​។​

​លោក អ៊ិត សំហេង បាន​ថ្លែងអំណរគុណ​រដ្ឋាភិបាល​ឆែក ដែល​បាន​ផ្តល់ជំនួយ ជួយ​ដល់​កម្ពុជា​នាពេល​កន្លងមក ជំនួយ​អស់ទាំង​នេះ​បានរួម​ចំណែក​ឲ្យ កម្ពុជា​បន្ត​ការអភិវឌ្ឍ​ប្រទេស​របស់ខ្លួន​ឲ្យ​មានការ​រីកចម្រើន​បន្ត​ទៅមុខទៀត​។ ទន្ទឹមនេះដែរ អ្នកជំនាញការ​របស់​ឆែក​ក៏​បានមក​បំពេញ​កិច្ចការងារ​នៅក្នុង ប្រទេស​កម្ពុជា ដែល​គិត​មកដល់ពេលនេះ ក្រសួង​ការងារ បានផ្តល់​នូវ​បណ្ណ ការងារ​ដល់​ពលករ​ជំនាញ ក៏ដូចជា​អ្នកជំនាញការ​របស់​ឆែក​ប្រមាណ​ជាង ១០០​នាក់​មកហើយ ដោយ​ពួកគេ​នឹង​ទទួលបាន​សិទ្ធ​គាំពារ​នានា ដូច​ពលរដ្ឋ​កម្ពុជា​ដែរ​។​

​ជាមួយគ្នា​លោក រដ្ឋមន្ត្រី បញ្ជាក់ថា កន្លងមក​រាជរដ្ឋាភិបាល​កម្ពុជា ក៏មាន​កិច្ច សហប្រតិបត្តិការ​ជាមួយ​អង្គការ​ភី​ន ឬ PIN (People In Need) ដែលជា​អង្គការ មិនមែន​រដ្ឋាភិបាល និង​មិន​រកប្រាក់​ចំណេញ​នៃ​ប្រទេស​ឆែក ដែល​អនុវត្ត លើ​គម្រោង​ជំនួយ​មនុស្សធម៌​, គម្រោង​អភិវឌ្ឍន៍​រយៈពេល​វែង​, កម្មវិធី​អប់រំ​, និង​កម្មវិធី​សិទ្ធិមនុស្ស​នៅតាម​តំបន់​ដែលមាន​វិបត្តិ​នៅ​ទូទាំង​សកលលោក និង​បាន​ចូលមក​កម្ពុជា ពី​ឆ្នាំ ២០០៨​។ សម្រាប់​កិច្ចសហប្រតិបត្តិការ​លើ​វិស័យ TVET​វិញ រដ្ឋាភិបាល​ឆែក ក៏បាន បំពាក់​ឧបករណ៍​សម្ភារ​បណ្តុះបណ្តាល​, បំប៉ន​សមត្ថភាព​ថ្នាក់ដឹកនាំ និង​គ្រូ​, ផលិត​ឯកសារ​សិក្សា​, កែលម្អ​ហេ​ដ្ឋា រចនាសម្ព័ន្ធ ដល់​មជ្ឈមណ្ឌល​បណ្តុះបណ្តាល​វិជ្ជាជីវៈ​ខេត្តកំពង់ឆ្នាំង (២០១៩-២០២១) និង​វិទ្យាស្ថាន​ជាតិ​វិជ្ជាជីវៈ​បាត់ដំបង (២០២០-២០២១)​។

​លោក​ឯក អគ្គរដ្ឋទូត​ឆែក​ប្រចាំ​កម្ពុជា​ក្នុង​ពិធី​នេះ ក៏បាន​វាយតម្លៃ​ខ្ពស់​ចំពោះ ទំនាក់ទំនង​ការទូត​របស់​ប្រទេស​ទាំងពីរ ហើយ​រដ្ឋាភិបាល​ឆែក​បានផ្តល់ នូវ​ជំនួយ​ក្នុងការ​អភិវឌ្ឍ​ប្រទេស​កម្ពុជា ជា​បន្តបន្ទាប់​។ ដោយឡែក​ចំពោះ សកម្មភាព​កិច្ច​សហប្រតិបត្តិ​លើ​ការបណ្តុះបណ្តាល​ផ្នែក​បច្ចេកទេស និង​វិជ្ជាជីវៈ​នេះ​ទៀតសោត លោក​អគ្គរដ្ឋទូត ចង់​ឲ្យ​គម្រោង​នេះ​មាន​និរន្តរ៍ភាព និង ចង់បាន​ការបញ្ជាក់​បន្ថែម​ពី​លោក​រដ្ឋមន្ត្រី ថា​តើ​ក្រសួង​ចង់​ឲ្យ​រដ្ឋាភិបាល ឆេ​កប​ន្ត​ជួយ​លើ​ផ្នែក​TVET នេះ ក្នុង​កម្រិតណា​បន្តទៀត​។​

​ឆ្លើយតប​ទៅនឹង សំនួរ​របស់លោក អគ្គរដ្ឋទូត ក្នុង​ពិធី​នេះ​លោក អ៊ិត សំហេង ចង់​ឲ្យ​មានដំណើរ​ទស្សនកិច្ចរ​វាង​គ្រូ និង​គ្រូ​របស់​ប្រទេស​យើង​ទៅវិញទៅមក ដើម្បី​ផ្លាស់ប្តូរ​នូវ​បទពិសោធន៍ ចែករំលែក​នូវ​ចំណេះដឹង ក៏ដូចជា​កម្មវិធីសិក្សា លើ​ការបណ្តុះបណ្តាល​ផ្នែក​ធនធានមនុស្ស​នេះ ឲ្យ​កាន់តែ​ប្រសើរ និង​ដើរ​ឲ្យ ទាន់​នូវ​ការរីកចម្រើន​បច្ចេកវិទ្យា​របស់​ពិភពលោក​។

​ទាក់ទិន​ក្នុង​រឿងនេះ​ដែរ លោក​រដ្ឋមន្ត្រី ក្រសួង​ការងារ​ក៏បាន​ស្វាគមន៍ និង​ឲ្យ​មានការ​រៀបចំ​ទស្សនកិច្ច​សិក្សា​រវាង​គ្រូ និង​គ្រូ របស់​ប្រទេស​ទាំងពីរ ដើម្បី​ផ្លាស់ប្តូរ​បទពិសោធន៍ និង​ចែករំលែក​នូវ​ចំណេះ​ដឹងផង​នោះ លោក​ឯក អគ្គរដ្ឋទូត​រីករាយ​នូវ​សំណើ​នេះ និង​សូម​ឲ្យ​ខាង​ក្រសួង​ការងារ និង​បណ្តុះ បណ្តាល​វិជ្ជាជីវៈ​បន្តធ្វើ​កិច្ចការ​នេះ​ជាមួយ​ស្ថានទូត ដើម្បី​ដាក់​ស្នើសុំ​ទៅ រដ្ឋាភិបាល​ឆែក​ឲ្យ​មាន​កិច្ចសហប្រតិបត្តិការ​លើ​កិច្ចការងារ​ទាំងនេះ​ឲ្យ​បាន​កាន់តែ​លឿន​៕​/PC