ដោយ​៖​រ៉ា​ម៉ន​/​ភ្នំពេញ​៖ នៅក្នុង​រាជធានី​ភ្នំពេញ​នា​រាត្រី​ថ្ងៃទី​២១ ខែមីនា ឆ្នាំ​២០២២ នេះ មេឃ​បាន​ធ្លាក់ភ្លៀង យ៉ាងខ្លាំង បណ្តាលអោយ​តំបន់​និង​លំនៅដ្ឋាន ប្រជាពលរដ្ឋ​មួយចំនួន​បាន​ទទួលរង​ការលិចលង់​ដោយ​ជំនន់​ទឹកភ្លៀង ប៉ុន្តែ​ដោយ​ការយកចិត្តទុកដាក់ ពី​អាជ្ញាធរ​សង្កាត់ ខណ្ឌ​និង​អាជ្ញាធរ​រាជធានី ភ្នំពេញ បានធ្វើ​សកម្ម​ភាពចុះ​កាយ​សំរាម​ចេញពី​មាត់​លូ​និង​ប្រើប្រាស់ ម៉ាស៊ីន បូមទឹក​នៅតាម​ស្ថានីយ៍​បូមទឹក​មួយចំនួន​ទាំងយប់ ទើប​ធ្វើអោយ​ទឹកបាន​ស្រុក ចុះទៅ​វិញ​យ៉ាង​លឿន ។​

​មន្ត្រីរដ្ឋបាល​ខណ្ឌទួលគោក​បានអោយដឹងថា​៖ នា​យប់​ថ្ងៃទី​២១ ខែមីនា ឆ្នាំ​២០២២ មេឃ បាន​ធ្លាក់ភ្លៀង យ៉ាងខ្លាំង នៅក្នុង​ភូមិសាស្ត្រ​ខណ្ឌទួលគោក ។​ ​ក្នុងស្ថានភាព​នេះ លោក​ជា ពិសី អភិបាលខណ្ឌ​ទួលគោក បាន​ចាត់​អោយ​មន្ត្រី ចុះ​ពិនិត្យ និង​ដោះស្រាយ ការ​ជន់​លិច​ដោយ​ជំនន់​ទឹកភ្លៀង​នេះ ក្នុងនោះ សង្កេតឃើញថា មហាវិថី​កម្ពុជា​ក្រោម , វិថី​នេ​រុ​ហ៍ , មហាវិថី សហព័ន្ធ​រុ​ស្សុ​ី មិនមាន​ទឹក​លិចលង់​ទេ តែ​ចំណែក មហាវិថី ម៉ៅ សេទុង​ត្រង់ចំណុច ប្រសព្វ​ផ្លូវ​លេខ​២៣០ មានទឹក​លិចលង់​ក្នុង​កម្រិត​មធ្យម ហើយ​មន្ត្រី និង​កម្លាំង បាន​ចុះ​កាយ​លូ រហូត​ធ្វើអោយ​ទឹក​ស្រក​ទៅវិញ​អស់​។​

​ចំណែក​លោក​ម៉ែន សុខ​ខេន ប្រធាន​អង្គភាព​លូទឹក បូមទឹក​នៃ​មន្ទីរ​សាធារណ ការ​និង​ដឹកជញ្ជូន​រាជធានី​ភ្នំពេញ បានអោយដឹងថា​៖ ដោយមាន​ការណែនាំ ពី​លោក​ឃួ​ង ស្រេង អភិបាល​រាជធានី​ភ្នំពេញ អង្គភាព​លូទឹក បូមទឹក​នៃ មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ បានធ្វើ​សកម្មភាព​ភ្លាមៗ​លើ ការបូមទឹក​ចេញពី​រាជធានី​ភ្នំពេញ ។ ក្នុងនោះ​ស្ថានីយ៍​ដែល​ដំណើរ​បូមទឹក​កាល ពី​យប់មិញ​រួមមាន​៖ ស្ថានីយ៍​បឹងត្របែក​,​បឹងទំពុន​,​ទួល​សំពៅ​,​កប់​ស្រូវ​, ទួលគោក​ទី​១,​ទួលគោក​ទី​២,​បូរី​១០០​ខ្នង​,​លូ​៥ សរុប​ចំនួន​៨​ស្ថានីយ៍ ទើប​ទឹកបាន​ស្រុក​ចុះទៅ​វិញ យ៉ាង​លឿន​៕​/PC