​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​បាន​បាត់បង់​ទាហាន​ជិត​១០.០០០​នាក់​ក្នុង​រយៈពេល​តិចជាង​៤​សប្តាហ៍​នៅ​អ៊ុ​យក្រែន នេះ​បើ​យោង​តាម​តួលេខ​របស់​រុស្ស៊ី​ផ្ទាល់​។​

​ចំនួន​អ្នក​ស្លាប់ ដែល​ច្រើន​មិន​គួរឱ្យ​ជឿ​សម្រាប់​សង្គ្រាម​ដែល​វិមាន​ក្រឹម​ឡាំង​ជឿថា​នឹង​ឈ្នះ​ក្នុង​រយៈពេល​តែ​ប៉ុន្មាន​ថ្ងៃ ត្រូវបាន​ចេញ​ផ្សាយ​ដោយ​វេបសាយ​គាំទ្រ​រដ្ឋាភិបាល​មួយ​ប៉ុន្តែ​ត្រូវបាន​ដកចេញ​​យ៉ាង​រហ័ស​។​

​គេ​បាន​ប៉ាន់ស្មាន​ថា​ដំណឹង​នេះ​ត្រូវ​បាន​បង្ហោះ​ដោយ​បុគ្គលិក​ដែល​គាំទ្រ​អ៊ុ​យក្រែន​។ មុន​នេះ​រុស្ស៊ី​ធ្លាប់បាន​ទទួល​ស្គាល់​ថា​មាន​អ្នកស្លាប់​ចំនួន ៤៩៨ នាក់ ប៉ុន្តែ​នោះ​គឺ​ធ្វើ​នៅ​ថ្ងៃទី ២ ខែ​មីនា​។​

​ដំណឹង​នេះ​បាន​កើតឡើង ខណៈ​រូបថត​ពី​ផ្កាយរណប​បាន​បង្ហាញ​ភស្តុតាង​បន្ថែមទៀត​ដែល​ថា​កងកម្លាំង​របស់​លោកពូ​ទីន​កំពុង​បន្ត​ការប្រយុទ្ធ​និង​ជីក​លេណដ្ឋាន​នៅមុន “​សង្គ្រាម​រយៈពេល​វែង​”​។​

​តួលេខ​កាលពី​យប់​ថ្ងៃ​ចន្ទ​បានបង្ហាញ​ថា ទាហាន​រុស្ស៊ី ៩.៨៦១ នាក់​បាន​ស្លាប់​នៅក្នុង​ប្រទេស​អ៊ុ​យក្រែន និង ១៦.១៥៣ នាក់​បាន​រងរបួស​។

​ទាហាន​សូ​វៀត​ប្រហែល ១៥.០០០ នាក់​បាន​ស្លាប់​នៅក្នុង​ប្រទេស​អា​ហ្វ​ហ្គានី​ស្ថាន​បន្ទាប់​ពី​ការលុកលុយ​ឆ្នាំ ១៩៧៩ ប៉ុន្តែ​នោះ​គឺ​មាន​រយៈពេល​ជាង​ដប់ឆ្នាំ​។​

​អ៊ុយ​ក្រែន​បានដាក់តួ​លេខ​ទាហាន​រុស្ស៊ី​ស្លាប់​ចំនួន ១៥.០០០​នាក់ ប៉ុន្តែ​តួលេខ​ចុងក្រោយ​នេះ​គឺ​ខ្ពស់ជាង​ការប៉ាន់ស្មាន​របស់​សហ​រដ្ឋ​អាម៉េរិក ដែល​ដាក់​ចំនួន​ស្លាប់ ៧.០០០​នាក់​។​

​ចំនួន​ស្លាប់​នេះ​គឺជា​ផ្នែក​មួយ​នៃ​ការ​ធ្វើ​បច្ចុប្បន្នភាព​ពី​ក្រសួងការពារជាតិ​របស់​ទីក្រុង​មូ​ស្គូ ហើយ​ខណៈ​ដែល​ចំនួន​នេះ​ត្រូវបាន​ដក​ចេញ​យ៉ាង​រហ័ស​ពី​វេបសាយ​កាសែត Komsomolskaya Pravda ដែល​ជា​កាសែត​គាំទ្រ​រដ្ឋាភិបាល ចំនួន​ស្លាប់​នេះ​នៅតែ​មាន​នៅក្នុង​ប័ណ្ណ​សារ​កាលពី​យប់​ថ្ងៃ​ចន្ទ​។​

​ទោះបីជា​តួលេខ​នេះ​បង្ហាញ​ពី​ជោគជ័យ​ផ្នែក​យោធា​របស់​អ៊ុយ​ក្រែន​ក៏ពិតមែន ក៏ប៉ុន្តែ​មាន​សញ្ញា​ជាច្រើន​កាលពី​យប់​ថ្ងៃ​ចន្ទ ដែល​បង្ហាញ​ថា សង្គ្រាម​កំពុងបង្វែរ​ប្រៀប​ឈ្នះ​មក​ខាង​រុស្ស៊ី​រិញ​។​

​របាយការណ៍​ស៊ើបការណ៍​សម្ងាត់​របស់​ច​ក្រ​ភព​អង់គ្លេស ដែល​មើលឃើញ​ដោយ​កាសែត Daily Mail បាន​និយាយថា កងកម្លាំង​របស់​ទីក្រុង​មូ​ស្គូ​កំពុងតែ​ទម្លាយ​ភាពទ័លច្រក​យ៉ាងសំខាន់​។​

​ពួកគេ​បាន​ប្រើ​ដ្រូ​ន​កាន់តែ​មាន​ប្រសិទ្ធភាព​ដើម្បី​វាយប្រហារ​គោលដៅ​អ៊ុយ​ក្រែន​នៅលើ​ដី​។​

​កងកម្លាំង​រុស្ស៊ី​ក៏​បាន​បំផ្លាញ​ដ្រូ​ន TB2 ផលិត​នៅ​តួ​ក​គី​មួយចំនួន​ផងដែរ ដែល​កន្លងមក​បាន​បង្ហាញ​ប្រសិទ្ធភាព​ខ្ពស់​ប្រឆាំង​នឹង​កងទ័ព​និង​ឧបករណ៍​យោធា​របស់​រុស្ស៊ី​។​

​របាយការណ៍​បានបង្ហាញ​ថា ប្រព័ន្ធ​ការពារ​មី​ស៊ី​លបាញ់​ពី​ដី​ទៅ​អាកាស​របស់​អ៊ុយ​ក្រែនក៏​អាច​ត្រូវបាន​បំផ្លាញ​ផងដែរ ខណៈ​មី​ស៊ី​ល​រុស្ស៊ី​កាន់តែច្រើន​កំពុង​បាញ់​ចំ​គោលដៅ​ជា​ហូរហែ​។​

​គ្រាប់​រ៉ុក្កែត​រុស្ស៊ី​បាន​វាយប្រហារ​ចំ​មូលដ្ឋាន​ហ្វឹកហ្វឺន​សម្រាប់​យុទ្ធជន​បរទេសមួយ ដោយ​សម្លាប់​មនុស្ស ៣៥ នាក់​និង​របួស ១៣៤ នាក់ កន្លែង​ជួសជុល​យន្តហោះ​មួយកន្លែង និង​ឃ្លាំង​ក្រោម​ដី​មួយ ដែល​រក្សាទុក​អាវុធ​លោកខាងលិច​របស់​ទីក្រុង​គៀ​វ​។​

​របាយការណ៍​នេះ​ពន្យល់​ពី​របៀប​ដែល​រុស្ស៊ី “​បាន​បង្កើន​ការបាញ់​ផ្លោង​ជា​បន្ត​ទៅ​លើ​ទីក្រុង​ផ្សេងៗ ជា​ពិសេស​ទីក្រុង​ម៉ា​រី​វ​ប៉ូល ទីក្រុង​ខា​គី​វ ទីក្រុង​ស៊ូ​មី និង​ទីក្រុង​ឆែរ​នី​ហ៊ី​វ​” បន្ទាប់ពី​បាន​បំពេញ​ការផ្គត់ផ្គង់​ដល់​កងកាំភ្លើងធំ​របស់​ខ្លួន​។​

​ក្រុមអ្នកវិភាគ​ការពារជាតិ​របស់​ចក្រ​ភព​អង់គ្លេស​ក៏​បាន​សម្តែង​ការព្រួយបារម្ភ​ផងដែរ​ថា មី​ស៊ី​ល​លឿន​ជាង​សំឡេង Kinzhal របស់​រុស្ស៊ី​អាច​ឆ្លងកាត់​ប្រព័ន្ធ​ការពារ​ប្រឆាំង​មី​ស៊ី​ល​។​

​អ្នកវិភាគ​ជា​ច្រើន​ក៏​បាន​ចោទ​ជា​មន្ទិល​ផងដែរ​អំពី​ការវាយតម្លៃ​របស់​លោក​ខាងលិច​មុននេះ​ថា​ខែល​ការពារ​ដែនអាកាស​រប​ស់អ៊ុយ​ក្រែ​ននៅតែមាន​ប្រសិទ្ធភាព​។​

​របាយការណ៍​ចារកម្ម​និយាយថា រុស្ស៊ី​មានបំណង “​បំផ្លិចបំផ្លាញ​” ទីក្រុង​ម៉ា​រី​វ​ប៉ូល​ទាំងស្រុង​ដើម្បី “​ព្រមាន​ដល់​ទីក្រុង​ផ្សេងទៀត​”៕

​សាកសព​ទាហាន​រុស្ស៊ី​ត្រូវបាន​ដឹក​ចូល​ស្រុក​ទាំង​ឡានៗ​រាល់​យប់​