ដោយៈ សុផល​/​ភ្នំពេញ​: មន្ទីរ​បរិស្ថាន​រាជធានី​ភ្នំពេញ បាន​បើក​វគ្គ​បណ្ដុះបណ្ដាល​ស្ដីពី ការកាត់បន្ថយ​សំណល់​ប្លា​ស្ទិ​ក ដោយ​អនុវត្តន៍​តាម​យុទ្ធសាស្ត្រ 4R ដល់​ក្រុមនិស្សិត​នៅ​សាកលវិទ្យាល័យ​ភូមិន្ទ​ភ្នំពេញ ក្រោម​វត្តមាន​លោក គិត ច័ន្ទ​គ្រឹ​ស្នា ទីប្រឹក្សា​រដ្ឋមន្ត្រីក្រសួង​បរិស្ថាន និង​ជា​នាយក​គម្រោង​ទប់ស្កាត់​សំណល់​ប្លា​ស្ទិ​ក​សមុទ្រ​កម្ពុជា​។​

​កម្មវិធី​វគ្គ​បណ្ដុះបណ្ដាល​នេះ ក៏មាន​ការចូលរួម​ពី​សំណាក់ លោក កៀន តាក់ សាកលវិទ្យាធិការរង​នៃ​សាកលវិទ្យាល័យ​ភូមិន្ទ​ភ្នំពេញ និង​លោក គាត រង្សី ប្រធាន​មន្ទីរ​បរិស្ថាន​រាជធានី​ភ្នំពេញ​ព្រមទាំង​និស្សិត និង​ព្រះសង្ឃ ចូលរួម​សរុប​ចំនួន ២២០​អង្គ​-​នាក់​។​

​វគ្គ​បណ្ដុះបណ្ដាល​បាន​ត្រូវ​រៀបចំឡើង​ក្នុង​គោលបំណង ដើម្បី​ផ្សព្វផ្សាយ​ចំណេះដឹង ស្វែងរក​ដំណោះស្រាយ​ថ្មីៗ (​នវានុវត្តន៍​) និង​ចែករំលែក​ចំណេះដឹង​បន្តទៅ​ដល់​ក្រុមនិស្សិត (​យុវជន ៤​ក​+៤​រ​) ក៏ដូចជា​ពី​ក្រុមនិស្សិត ទៅកាន់​ប្រជាពលរដ្ឋ ដើម្បី​ចូលរួមចំណែក​ក្នុងការ​ទប់ស្កាត់​សំណល់​ប្លា​ស្ទិ​ក​។​

​គួរបញ្ជាក់​ផងដែរ​ថា ក្រោយពី​បញ្ចប់​វគ្គ​បណ្ដុះបណ្ដាល​តា​ម​បណ្ដា​វិទ្យាស្ថាន និង​សាកលវិទ្យាល័យ​ចំនួន ០៨​កន្លងមកនេះ មន្ទីរ​បរិស្ថាន​រាជធានី​ភ្នំពេញ នឹង​បន្ត​បណ្ដុះបណ្ដាល​តាមរយៈ​ប្រព័ន្ធ​វីដេអូ Zoom Meeting បន្តទៀត​ដល់​ក្រុមនិស្សិត ដើម្បី​តាមដាន​ការអនុវត្ត​របស់​ក្រុមនិស្សិត ស្វែងយល់​ពី​នវានុវត្តន៍​នៃ​ការទប់ស្កាត់​សំណល់​ប្លា​ស្ទិ​ក​ក្នុង​រាជធានី​ភ្នំពេញ​តាមរយៈ​យុវជន ៤​ក​+៤​រ ស្រប​ជាមួយ​លក្ខណៈសម្បត្តិ​ទី​៦ របស់​គោលនយោបាយ “​ភូមិ​-​ឃុំ​-​សង្កាត់​មាន​សុវត្ថិភាព​” គឺមាន​អនាម័យ មាន​សោភ័ណ​ភាពល្អ និង​មាន​បរិស្ថាន​ល្អ​។ ចូលរួម​ទាំងអស់គ្នា​ដើម្បី​កាត់បន្ថយ​សំណល់​!

​គួររំឭកថា យុវជន ៤​ក​+៤​រ ដែល​សំដៅលើ​៖ ក​១.​ការប្រើប្រាស់​ឡើងវិញ (REUSE) ក​២.​ការកាត់បន្ថយ​(REDUCE) ក​៣.​ការកែច្នៃ​(RECYCLE) ក​៤.​ការបដិសេធ​(REFUSE) រីឯ ៤​រ គឺ រ​១.​រៀន រ​២.​រើស រ​៣.​រក និងរ​៤.​រម្លឹក​៕​