​ដោយៈ​ សុផល / ភ្នំពេញ​: កម្ពុជា បាន​លក់​ផ្លាកលេខ​ពិសេស និង​ពិសេស​ផ្ទាល់ខ្លួន បាន​ចំនួន ២០១ ៩៨០ លេខ ដោយ​ទទួលបាន​ចំណូល​សរុប ចំនួន ២៨០ ៧២៨ ២២៨ ៨០០ រៀល​ស្មើនឹង ៧០ ១៨២ ០៥៧ ដុល្លារ​អាមេរិក គិត​ចាប់តាំងពី​ខែកញ្ញា ឆ្នាំ​២០១៦ ដល់​ខែកុម្ភៈ ឆ្នាំ​២០២២​។ នេះ​បើ​យោងតាម​របាយការណ៍ របស់​គណៈកម្មការ​អន្តរក្រសួង នៅ​ថ្ងៃទី​២៤ ខែមីនា ឆ្នាំ​២០២២​។​

​ដោយឡែក ចំណូល​ពី​ការលក់​លេខ​ចុះបញ្ជី​ពិសេស និង​លេខ​ចុះបញ្ជី​ពិសេស​ផ្ទាល់ខ្លួន ក្នុង​ឆ្នាំ​២០២១ ទទួលបាន​ចំណូល​ថវិកា​សរុប ចំនួន ៦៨ ៦៤៦ ៣៤២ ៣០០ រៀល កើនឡើង​ប្រមាណ ៩% ធៀប​នឹង​ឆ្នាំ​២០២០​។​

​នៅក្នុង​កិច្ចប្រជុំ​ពិភាក្សា លើ​របាយការណ៍​វឌ្ឍនភាព នៃ​ការលក់​លេខ​ចុះបញ្ជី​រថយន្ត កាលពី​ថ្ងៃទី​២៤ ខែមីនា ឆ្នាំ​២០២២ លោកស្រី កុយ សុ​ដា​នី រដ្ឋលេខាធិការ ក្រសួង​សាធារណការ និង​ដឹកជញ្ជូន និង​ជា​ប្រធាន​គណៈកម្មការ​រ​អន្តរក្រសួង គ្រប់គ្រង​ការលក់ លេខ​ចុះបញ្ជី​រថយន្ត បាន​មានប្រសាសន៍​ឱ្យដឹងថា​៖ អន្តរក្រសួង បានជ្រើសរើស ក្រុមហ៊ុន​គោលដៅ​ចំនួន​១៤ ក្រុមហ៊ុន ដើម្បី​ជំរុញ​ការលក់​លេខ​ពិសេស ផ្ទាល់ខ្លួន ក្នុងតម្លៃ​ឯកភាព ព្រមព្រៀង​ណាមួយ ការពិនិត្យ​លើ​បញ្ជី​ឈ្មោះ ម៉ាក កម្មសិទ្ធិបញ្ញា ដែល​ទទួលបាន​ពី ក្រសួងពាណិជ្ជកម្ម មាន​ជាង ៦ ម៉ឺន ដើម្បី​ដាក់បញ្ចូល​ទៅក្នុង​ប្រព័ន្ធ និង​ការសហការ រវាង​អនុគណៈកម្មការ​បច្ចេក​ទេស​រៀបចំ បញ្ចូល​ទៅក្នុង​ប្រព័ន្ធ គោលការណ៍ ក្នុង​ការចាប់​សញ្ញា​ចុច (DOT) ក្នុងការ​គណនា​តម្លៃ​លេខ​ទាំងឡាយណា ដែលមាន តួលេខ​១៦៨ ការកែសម្រួល​អត្រា​រូបមន្ត ដែល​ទើប​បង្កើត​ថ្មី ចំនួន​ជាង ៦០០ រូបមន្ត និង​បញ្ជី ឈ្មោះ​ក្រុមហ៊ុន ពី​ក្រសួងពាណិជ្ជកម្ម​ផងដែរ​។​

​ទន្ទឹម​ជាមួយគ្នានេះ លោកស្រី រដ្ឋលេខាធិការ បាន​រំលឹក​អំពី​អនុសាសន៍​ណែនាំ របស់លោក​ទេសរដ្ឋមន្ត្រី ស៊ុន ចាន់ថុល ដែល​បានលើកឡើង នៅក្នុង​សន្និបាត​បូកសរុប​ការងារ ឆ្នាំ​២០២១ និង​លើក​ទិសដៅ​ការងារ​បន្ត ឆ្នាំ​២០២២ ឱ្យ​រៀបចំ​រូបមន្ត សម្រាប់​ការ​គណនា​ថ្លៃ បន្ថែមទៀត សម្រាប់​ផ្លាកលេខ​ពិសេស​ផ្ទាល់ខ្លួន ដោយ​ឃើញថា ផ្លាកលេខ​ប្រភេទ​នេះ កាន់​តែមាន​ប្រជាប្រិយភាព ពេញនិយម​ខ្លាំង​ឡើងៗ និង​ផ្សព្វផ្សាយ​ឱ្យ​កាន់តែ​ទូលំទូលាយ ទៅកាន់​ក្រុមហ៊ុន សហគ្រាស និង​ប្រជាពលរដ្ឋ ឱ្យមាន​ការយល់ដឹង កាន់តែ​ប្រសើរឡើង អំពី​លេខ​ចុះបញ្ជី​ពិសេស និង​លេខ​ចុះបញ្ជី​ពិសេស​ផ្ទាល់ខ្លួន ដើម្បី​បង្កើន​ប្រាក់ចំណូល​ជាតិ ឱ្យ​កាន់តែ​ប្រសើរឡើង​ថែមទៀត​។

​លោកស្រី បានបញ្ជាក់​បន្ថែមថា​៖ គណៈកម្មការ​នឹង​ពិនិត្យ​លទ្ធភាព ជួបប្រជុំ​ជាមួយនឹង​ក្រុម ហ៊ុន​នានា ដូចជា ក្រុមហ៊ុន​កូកាកូឡា ក្រុមហ៊ុន​សូ​គី​មិច និង​ក្រុមហ៊ុន​ជាច្រើន​ទៀត ដើម្បី​ធ្វើការ​ផ្សព្វផ្សាយ ឱ្យ​ក្រុមហ៊ុន​ទាំងនោះ បានដឹង​អំពី​ជម្រើស និង​គោលការណ៍​រួម ដែល​ត្រូវ​ផ្តល់ជូន ទាក់ទង​នឹង​ការទិញ​លេខ​ចុះ បញ្ជី​ពិសេស និង​លេខ​ចុះបញ្ជី​ពិសេស ផ្ទាល់ខ្លួន​៕/V​