​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មហាសេដ្ឋី​ម្ចាស់​ក្លិប Chelsea លោក​រ៉ូម៉ាន់ អា​ប្រា​ម៉ូ​វិច (Roman Abramovich)​ត្រូវបាន​គេ​រាយការណ៍​ថា​បាន​ទៅ​ប្រទេស​ប៉ូឡូញ​ដើម្បី​ដើរតួ​ជា​អ្នក​​ចរចា​រវាង​ប្រធានាធិបតី​អាម៉េរិក ចូ បៃ​ដិន និង ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន​។​

​យោងតាម​របាយការណ៍​របស់​ប្រព័ន្ធ​ផ្សព្វផ្សាយ​ក្នុងស្រុក​ជាច្រើន​បាន​ឱ្យដឹងថា មហាសេដ្ឋី​វ័យ ៥៥ ឆ្នាំ​ដែល​ថ្មីៗ​នេះ​ត្រូវបាន​សហភាព​អឺរ៉ុប និង​ចក្រភព​អង់គ្លេស​ដាក់ទណ្ឌកម្ម​បាន​ជិះ​រថភ្លើង​ទៅកាន់​​ប្រទេស​ប៉ូឡូញ​កាលពី​ថ្ងៃ​ព្រហស្បតិ៍​ដោយ​ប្រើ​លិខិតឆ្លងដែន​ព័រ​ទុយ​ហ្គាល់​របស់គាត់​។​

​បង្ហោះ​នៅលើ​បណ្តាញ​សង្គម​ដោយ​អ្នកកាសែត​ស៊ើបអង្កេត លោក ចា​កូប ស្តា​ឆូវី​អាក់ (Jakob Stachowiak) មក​ពី​ទូរទស្សន៍ TVN បាន​និយាយថា​”​កាល​ពី​ម្សិលមិញ​គាត់​បាន​មក​ប្រទេស​​ប៉ូឡូញ​ដោយ​សម្ងាត់​ពី​អ៊ុយ​ក្រែន​តាម​រថភ្លើង​ឆ្លាត​វៃ​”​។​

“​គួរឱ្យ​ចាប់អារម្មណ៍ គាត់​បាន​ប្រើ​លិខិតឆ្លងដែន​ព័រ​ទុយ​ហ្គាល់​។ ប្រហែលជា​នឹង​មាន​កិច្ចប្រជុំ​ក្រៅផ្លូវការ​ជាមួយ​ប្រធានាធិបតី​។ តើ​ពូ​ទី​ន​បាន​បញ្ជូន​មហាសេដ្ឋី​មក​ទេ​ដឹង​?”​។​

​លោក​បាន​បន្ថែមថា “​មហាសេដ្ឋី​រូបនេះ​បាន​ទៅ​កាន់​ប្រទេស​ប៉ូឡូញ​ពី​ទឹកដី​អ៊ុ​យក្រែន ជា​កន្លែង​ដែល​គាត់​បាន​ពិភាក្សា​ជាមួយ​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី​”​។​

​លោក​ហ្សេ​លេន​ស្គី​មុននេះ​បាន​ស្នើ​ឱ្យ​លោកបៃ​ដិន​កុំ​ដាក់​ទណ្ឌកម្ម​លើ​មហា​សេដ្ឋី​រុស្ស៊ី​រូបនេះ ដោយ​និយាយថា គាត់​អាច​ក្លាយ​ជា​អន្តរការី​ដ៏​សំខាន់​ក្នុង​ការចរចា​សន្តិភាព​ជាមួយ​រុស្ស៊ី​។​

​អ្នកនាំពាក្យ​របស់​លោក​ពូ​ទីន​លោក ឌី​មី​ទ្រី ប៉េ​ស្កូវ កាលពី​សុក្រ​បានបញ្ជាក់​ថា​លោក​អា​ប្រា​ម៉ូ​វិច​បាន​ចូលរួម​កិច្ចចរចា​សន្តិភាព​ជុំ​ទី​មួយ​រវាង​ភាគី​ទាំង​ពីរ​នៅក្នុង​ប្រទេស​បេឡា​រូស​ក្នុងអំឡុង​សប្តាហ៍​ដំបូង​​នៃ​ការ​លុកលុយ​យ៉ាង​ឃោរឃៅ​របស់​លោក​ពូ​ទីន​ទៅលើ​អ្នកជិតខាង​របស់​គាត់ ដែល​ឥឡូវនេះ​បាន​អូសបន្លាយ​រយៈពេល​បួន​សប្តាហ៍​ហើយ​។​

​ដំណឹង​នេះ​កើតឡើង​ខណៈ​ដែល​លោកបៃ​ដិនបាន​មកដល់​ក្នុង​ដំណើរ​ទស្សនកិច្ច​រយៈពេ​ល​ពីរ​ថ្ងៃ​ទៅ​ក្រុង​រី​ហ្សេ​ស​ហ្សូ​វ (Rzeszow) នៅ​ព្រំដែន​ប៉ូឡូញ ជា​ទី​ដែល​លោក​បាន​អំពាវនាវ​ឱ្យមាន​ការរួបរួម​រប​ស់ណា​តូ និង​បាន​ថ្កោលទោស​លោកពូ​ទីន​ថា​ជា​ឧក្រិដ្ឋជន​សង្គ្រាម​៕

​គេ​ថា​លោក​អា​ប្រា​ម៉ូ​វិច​កំពុង​ដើរតួ​ជា​អ្នកចរចា​រវាង​លោកបៃ​ដិ​ន​និង​លោកពូទីន​សម្រាប់​សន្តិភា​ព​នៅ​អ៊ុ​យក្រែន​