​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ស្រីលង្កា​បានប្រកាស​ការ​កាត់ផ្តាច់​ចរន្តអគ្គិសនី​ប្រចាំ​ថ្ងៃ​រយៈពេល​១៣ ម៉ោង​ទូទាំង​ប្រទេស​ចាប់ពី​ថ្ងៃ​ព្រហស្បតិ៍​ទី​៣១​មីនា​តទៅ​ហើយ​មន្ទីរពេទ្យ​ជាច្រើន​ទៀត​​បាន​ផ្អាក​ការវះកាត់​ជា​ទម្លាប់ បន្ទាប់​ពី​អស់​ថ្នាំ​សង្គ្រោះ​ជីវិត ខណៈ​វិបត្តិ​ខ្វះ​សាច់ប្រាក់​របស់​ប្រទេស​នេះ​កាន់តែ​ផុង​ជ្រៅ​។​

​ប្រជាជាតិ​អាស៊ី​ខាងត្បូង​ដែល​មាន​ប្រជាជន​ចំនួន ២២ លាន​នាក់​នេះ​បាន​ស្ថិតនៅ​ក្នុង​វិបត្តិ​សេដ្ឋកិច្ច​ដ៏​អាក្រក់​បំផុត​របស់​ខ្លួន​ចាប់តាំងពី​ឯករាជ្យ​នៅ​ឆ្នាំ ១៩៤៨​ដែល​បង្កឡើង​ដោយ​ការខ្វះខាត​​រូបិយប័ណ្ណ​បរទេស​យ៉ាងធ្ងន់ធ្ងរ​ដើម្បី​ទូទាត់​សម្រាប់​ការនាំ​ចូល​ទំនិញ​សំខាន់ៗ​បំផុត​។​

​ក្រុមហ៊ុន​អគ្គិសនី​រដ្ឋ​ផ្តាច់មុខ​បាន​និយាយថា ខ្លួន​នឹង​ពង្រីក​ការ​កាត់ផ្តាច់​ចរន្ត​អគ្គិសនី ៣ ម៉ោង​បន្ថែម​ពី​លើ​ការ​កាត់ ១០ ម៉ោង​ចាប់ពី​ថ្ងៃ​ព្រហស្បតិ៍​តទៅ​ដោយ​បង្ខំ​ឱ្យ​មាន​ការ​ដាច់​ភ្លើង​ទូទាំង​​ប្រទេស​រយៈពេល ១៣ ម៉ោង​។​

​ប្រទេស​នេះ​បាន​ស្ថិតក្រោម​ការបែងចែក​អគ្គិសនី​យ៉ាង​ធ្ងន់ធ្ងរ​ចាប់តាំងពី​ដើម​ខែ​មីនា​ម​ក ហើយ​ក្រុមហ៊ុន​អគ្គិសនី​ផ្តាច់មុខ​បាន​និយាយថា ការដំឡើង​ការផ្តាច់​ចរន្តអគ្គិសនី​ពី ៧ ម៉ោង​ទៅ ១០​ម៉ោង​មុន​​នេះ​ត្រូវបាន​ដាក់ចេញ​ដោយសារតែ​មិន​មាន​ប្រេង​សម្រាប់​ដំណើរការ​ម៉ាស៊ីនភ្លើង​។​

​ក្រុមមន្ត្រី​បាន​និយាយថា ជាង​៤០ ភាគរយ​នៃ​អគ្គិសនី​របស់​ប្រទេស​ស្រីលង្កា​ត្រូវបាន​បង្កើត​ចេញពី​វា​រី​អគ្គិសនី​ប៉ុន្តែ​កំរិត​ទឹក​នៅ​ភាគ​ច្រើន​នៃ​អាង​ស្តុក​ទឹក​តាម​រោងចក្រ​វា​រី​អគ្គិសនី​ធ្លាក់ចុះ​ខ្លាំង​មិនអាច​​ដំណើរការ​ម៉ាស៊ីន​បា​ម​ពេញលេញ​ដោយសារតែ​មិន​មាន​ភ្លៀង​ធ្លាក់​។​

​ការផលិត​អគ្គិសនី​ភាគច្រើន​គឺ​មក​ពី​ធ្យូងថ្ម​និង​ប្រេង​។ វត្ថុធាតុដើម​ថាមពល​ទាំង​ពីរ​គឺជា​នាំចូល​ទាំងអស់​ប៉ុន្តែ​កំពុង​ខ្វះ​ការផ្គត់ផ្គង់ ដោយសារ​ប្រទេស​នេះ​មិន​មាន​ប្រាក់​ដុល្លារ​គ្រប់គ្រាន់​ក្នុង​ការចំណាយ​លើ​អ្នកផ្គត់ផ្គង់​៕

​ស្ត្រី​ម្នាក់​កំពុង​ប្រើ​ទៀន​អំឡុងពេល​ដាច់​ភ្លើង​នៅ​ទីក្រុង​កូឡុំបូ​កាលពី​ថ្ងៃទី​៣០​មីនា​២០២២