​ប្រែ​សម្រួលៈ​បំណង​(ST,​ដេល្លី​ម៉េល​)៖ ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន​កំពុង​ទាមទារ​អោយ​អតិថិជន​បរទេស​ទូទាត់​ទំនិញ​ហ្គាស​រុស្ស៊ី​ជា​ប្រាក់​រូបល៍​ចាប់ពី​ថ្ងៃ​សុក្រ​ទី​០១​មេសា​នេះ​ទៅ​បើ​មិន​ដូច្នេះ​​ទេ​ការផ្គត់ផ្គង់​ហ្គាស​របស់​គេ​នឹង​ត្រូវ​ផ្តាច់ ។​

​វា​ជា​ការទាមទារ​មួយ​ដែល​បណ្តា​ប្រទេស​នៅ​អឺរ៉ុប​កន្លងមក​បាន​ច្រានចោល និង​រដ្ឋាភិបាល​ក្រុង​ប៊ែរ​ឡាំង​បាន​និយាយថា វា​ស្មើនឹង​«​ការ​ចាប់ជំរិត​»​។​

​ក្រិត​មួយ​របស់​វិមាន​ក្រឹម​ឡាំង​និយាយថា​«​បណ្តា​ប្រទេស​អ​មិត្ត​» អាច​បន្ត​បង់ថ្លៃ​ទិញ​ហ្គាស​ជា​រូបិយ​បណ្ណ​បរទេស​តាម​ធនាគារ​រុស្ស៊ី​មួយ​ដែល​នឹង​ប្តូរ​វា​ទៅ​ជា​ប្រាក់​រូបល៍​។​ក្រិត​ចេញផ្សាយ​ដោយ​សារព័ត៌មាន​​រដ្ឋ​កាលពី​ថ្ងៃ​ព្រហស្បតិ៍​នៅ​មួយថ្ងៃ​បន្ទាប់​ពី​មេដឹកនាំ​អ៊ីតាលី និង​អាល្លឺម៉ង់​បាន​និយាយថា ពួកគេ​ទទួលបាន​ការធានា​ពី​ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន​។​

​តែ​មេដឹកនាំ​រុស្ស៊ី​បាន​និយាយ​កាន់តែ​ម៉ឺងម៉ាត់ ដោយ​បញ្ជាក់​ថា​រុស្ស៊ី​នឹង​ចាប់ផ្តើម​ទទួល​ការទូទាត់​ជា​ប្រាក់​រូបល៍​ចាប់ពី​ថ្ងៃ​សុក្រ​ទី​០១​មេសា​សំរាប់​បណ្តា​ប្រទេស​លោកខាងលិច​ណា​ដែល​ដាក់​ទណ្ឌកម្ម​លើ​ខ្លួន​​ដោយសារ​តែ​ជម្លោះ​របស់​ខ្លួន​ជាមួយ​អ៊ុ​យក្រែន​។​

​លោក​បាន​និយាយថា កិច្ចសន្យា​មាន​ពី​មុន​នឹង​ត្រូវ​បញ្ឈប់ បើ​អ្នក​ទិញ​មិន​ទទួលយក​លក្ខខណ្ឌ​ថ្មីៗ រួម​មាន​ការបើក​គណ​នី​ជា​ប្រាក់​រូបល៍​នៅក្នុង​ធនាគារ​រុស្ស៊ី​។​

​ពួក​មេដឹកនាំ​អឺរ៉ុប​បាន​ច្រានចោល​ការ​ទូរ​ទាត់​ប្រភេទ​នេះ ដោយ​ថា​វា​នឹង​ធ្វើអោយ​ខូច​ទណ្ឌកម្ម​របស់​លោក​ខាងលិច​ដើម្បី​ប្រឆាំង​នឹង​សង្គ្រាម​នៅ​អ៊ុ​យក្រែន​។​

​ក្រិត​ដែល​ចុះហត្ថលេខា​ដោយ​លោកពូ​ទីន និង​ត្រូវបាន​ទីភ្នាក់ងារសារព័ត៌មាន​រដ្ឋ​អ​អាយ​អេ ណូវ៉ូ​ស្ទី​(RIA Novosti)​ផ្សាយ​និយាយថា​ធនាគារ​កំណត់​ទុក​មួយ​នឹង​បើក​គណនី​ពីរ​សំរាប់​អ្នកទិញ​ម្នាក់​​ដោយ​មួយ​ជា​រូបិយ​បណ្ណ​បរទេស និង​មួយទៀត​ជា​ប្រាក់​រូបល៍​។​អ្នកទិញ​នឹង​បង់​ជា​រូបិយ​បណ្ណ​បរទេស​ហើយ​អនុញ្ញាត​អោយ​ធនាគារ​លក់​ប្រាក់​នោះ​ទៅ​ជា​ប្រាក់​រូបល៍​នៅ​គ្នុង​គណនី​ទី​ពីរ​។​

​ការចេញ​ក្រិត​នេះ​កើតឡើង​ចំ​ពេល​មេដឹកនាំ​អាល្លឺម៉ង់​និង​អូទ្រីស​បានបញ្ជាក់​ថា ប្រទេស​ពួកគេ​មិន​អាច​បញ្ឈប់​ការទិញ​ថាមពល​រុស្ស៊ី​នៅពេលនេះ​បាន​នៅឡើយ​ទេ​។​

​អធិកា​ប​តី​អាល្លឺម៉ង់ បាន​កត់សំគាល់ថា​ទណ្ឌកម្ម​ដែល​កំពុង​មាន​បាន​បង្ក​ផលប៉ះពាល់​រួចជាស្រេច និង​ថា​គេ​ត្រូវការ​ពេល​ដើម្បី​ស្វែងរក​អ្នកផ្គត់ផ្គង់​ថ្មី ឬ​ប្រភព​ថាមពល​កកើត​ឡើងវិញ​៕

​ចំណាត់ការ​របស់​ពូ​ទីន​កាលពី​ថ្ងៃ​ព្រហស្បតិ៍​នាំអោយ​អឺរ៉ុប​ប្រឈម​នឹង​ការបាត់បង់​ការផ្គត់ផ្គង់​ហ្គាស​ជាង​មួយ​ភាគ​បី​នៃ​តំរូវការ​របស់​ខ្លួន