​ដោយ​៖ ម៉េង​ឆៃ / ភ្នំពេញ​៖ ពិធីបុណ្យ​ចូលឆ្នាំ ប្រពៃណី​ជាតិខ្មែរ ២​ឆ្នាំ​ហើយ មិនបាន​ប្រារព្ធ​ពិធី​ជួបជុំ ពិសេស​នៅតាម​វត្ត​អារាម នៅ​ទូទាំងប្រទេស នោះ​ក៏​ដោយសារតែ​កូ​វីដ​១៩ ប៉ុន្តែ​នៅ​ឆ្នាំនេះ កូ​វីដ​១៩​ធូរស្បើយ រាជរដ្ឋាភិបាល បាន​អនុញ្ញាតឱ្យ​ប្រារព្ធ​ពិធីបុណ្យ​ចូលឆ្នាំថ្មី ប្រពៃណីជាតិ ដោយមាន​ការជួបជុំ​ឡើងវិញ និង​ការដើរ​កម្សាន្ត​នៅ​ទូទាំងប្រទេស ដោយ​ប្រកាន់ខ្ជាប់​រៀងៗ​ខ្លួន​នូវ​វិធានការ​សុខាភិបាល ៣​កុំ និង​៣​ការពារ​។

​នៅ​អំឡុង​មុន​ថ្ងៃ​ចូលឆ្នាំ​មកដល់ នៅ​ឆ្នាំនេះ មាន​ពិធី​និមន្ត​ព្រះសង្ឃ សូត្រមន្ត ប្រស់ព្រំ​លើករាសី នៅតាម​ក្រុមហ៊ុន ស្ថាប័នរដ្ឋ ឯកជន និង​តាម​ផ្ទះ ជាដើម មិន​ថា នៅ​ភ្នំពេញ ឬ​តាម​ខេត្ត តាម​មូលដ្ឋាន​ណា​ណា​នោះទេ​។ នៅតាម​ចេ​តី​យ៍ ក៏មាន​ពិធី​និមន្ត​ព្រះសង្ឃ សូត្រមន្ត បង្សុកូល ឧទ្ទិស​ជូន​វិញ្ញាណក្ខន្ធ​បុព្វការី​ជន ញា​ត្តិ​សន្តាន ដែល​បាន​ចែក​ឋាន​តាម​ទំនៀមទម្លាប់​ប្រពៃណី​ខ្មែរ​យើង​។​

​ជាការ​ពិត ចូលឆ្នាំ ២​ឆ្នាំ​មកហើយ គឺ​នៅ​ឆ្នាំ​២០២០ និង​ឆ្នាំ​២០២១ យើង​មិនបាន​ចូលឆ្នាំ ដោយ​ការជួបជុំ​តាម​ប្រពៃណី ពិសេស​នៅតាម​វត្ត​នោះឡើយ​។ កូ​វីដ​១៩ ក៏បាន​ធ្វើឱ្យ​យើង​មិនអាច​ប្រារព្ធ​ពិធី​ជួបជុំ​តាម​វត្ត ពិសេស​បុណ្យ​ភ្ជុំបិណ្ឌ ឱ្យបាន​ពេញលេញ អស់​រយៈពេល ២​ឆ្នាំ​មកហើយ​ដែរ​។ ការខកខាន​ពិធីបុណ្យ ជួបជុំ​តាម​វត្ត​អារាម​នេះ នាំឱ្យ​បាត់បង់​ឱកាស​ធ្វើបុណ្យ​របស់​ប្រជា​ពុទ្ធបរិស័ទ​ផង ហើយ​ខាង​វត្ត ក៏​មិន​ទទួល​បច្ច័យ​ចូលរួម​ពី​ប្រជា​ពុទ្ធបរិស័ទ សម្រាប់​ការចូលរួម​ចាប់មគ្គផល កសាង​សមិទ្ធផល​នានា នៅក្នុង​វត្ត​ឡើយ​។​

​យ៉ាងណាក៏ដោយ នៅ​ឆ្នាំនេះ ពេល​ចូលឆ្នាំ មិន​ថា នៅ​វត្ត ឬ​នៅតាម​ទីប្រជុំជន​នានា នៅតាម​រាជធានី​ខេត្ត​នោះទេ គឺ​បានរៀបចំ​ព្រឹ​ត្ត​ការណ៍​អបអរសាទរ​ឆ្នាំ​ថ្មី ដោយ​ហៅថា «​សង្ក្រាន្ត​» រយៈពេល ៣​ថ្ងៃ ដើម្បី​អបអរសាទរ​ពិធីបុណ្យ​ចូលឆ្នាំថ្មី ប្រពៃណី​ជាតិខ្មែរ នៅតាម​វត្ត តាម​សាលារៀន និង​នៅតាម​រមណីយដ្ឋាន​នានា ចាប់ពី​ថ្ងៃទី​១៤ ដល់​ថ្ងៃ​១៦ ខែមេសា​។​

​ក្នុងការ​ជួបជុំ​ទាំងនោះ មាន​កម្មវិធី​កម្សាន្ត​សប្បាយ​ជាច្រើន ដូចជា ការលេង​ល្បែង​ប្រជាប្រិយ ការតាំង​បង្ហាញ​គំនូរ​សិល្បៈ ការលក់ទំនិញ​នានា និង​ការប្រគំ​តន្ត្រីបុរាណ​-​សម័យ ដើម្បី​រាំ​កម្សាន្ត ជាដើម​។ សកម្មភាព​ទាំងអស់នេះ សុទ្ធតែ​បង្ក​បរិយាកាស​រីករាយ​ផង និង​ផ្តល់​ចំណូល​ដល់​សេដ្ឋកិច្ចសង្គម​ឱ្យ​រស់​ឡើងវិញ បន្ទាប់ពី​ខកខាន ២​ឆ្នាំ​ជាប់ៗ​គ្នា​។​

​ទន្ទឹមនឹង​កម្ម​វិថី​សប្បាយរីករាយ​ទាំងនេះ អ្នកចូលរួម​ពិធី​ម្នាក់ៗ រួមទាំង​គណៈកម្មការ អាចារ្យវត្ត និង​អាជ្ញាធរ​សមត្ថកិច្ច​គ្រប់​លំដាប់ថ្នាក់ ក៏ត្រូវ​បង្កើន​ការប្រុងប្រយ័ត្ន និង​កិច្ចការពារ​សុខ​សុវត្ថិភាព ដើម្បីឱ្យ​កម្មវិធី​ប្រព្រឹត្ត​ទៅដោយ​រលូន និង​ប្រកបដោយ​ភាព​អធិកអធម ដោយ​រក្សាបាន​នូវ​ប្រពៃណី​ទំនៀម ទម្លាប់​ដ៏​ល្អ​របស់​ជាតិ ក៏ដូចជា​ដើម្បី​ទប់ស្កាត់បាន​ការឆ្លង​រាលដាល​នៃ​ជំងឺ​កូ​វីដ​-១៩ ផងដែរ​។​

​តាម​វត្ត និង​តាម​រមណីយដ្ឋាន​នានា ក៏​ត្រូវបាន​អាជ្ញាធរ​រាជធានី​ខេត្ត រៀបចំ​កន្លែង​ចាក់​វ៉ាក់សាំង​បង្ការ​ជំងឺ​កូ​វីដ​១៩ ផងដែរ ដូច្នេះ​ប្រជាពលរដ្ឋ​ពី​គ្រប់​មជ្ឈដ្ឋាន ដែល​ចូលរួម គឺ​ត្រូវតែ​អនុវត្ត​ឱ្យបាន​ខ្ជាប់ខ្ជួន​នូវ​វិធានការ​សុខាភិបាល ៣​កុំ ៣​ការពារ ហើយ​បើ​ដល់​ថ្ងៃ​ចាក់​វ៉ាក់សាំង មិនទាន់​ចាក់ សូម​អញ្ជើញ​ចាក់​វ៉ាក់សាំង នៅតាម​វត្ត ឬក៏​នៅតាម​កន្លែង​ដើរ​កម្សាន្ត​ទាំងនោះ​។​

​ដោយសារ​ការឆ្លង​រាលដាល​ជំងឺ​កូ​វីដ​១៩ នាំឱ្យ​ខកខាន មិនបាន​រៀបចំ​ព្រឹ​ត្ត​ការណ៍​អបអរសាទរ​ចូលឆ្នាំថ្មី ប្រពៃណីជាតិ ២​ឆ្នាំ​ជាប់​គ្នា គឺ​នៅ​ឆ្នាំ​២០២០ និង​ឆ្នាំ​២០២១ ដូច្នេះ នៅ​ឆ្នាំនេះ នៅពេល​យើង​បាន​ចូលឆ្នាំ​ឡើងវិញ ក៏​សូមឱ្យ​ប្រជាពលរដ្ឋ​យើង ត្រូវតែ​បង្កើន​ការប្រុងប្រយ័ត្ន​រៀងៗ​ខ្លួន ទាំង​ការធ្វើដំណើរ ការជួបជុំ​សប្បាយ ការជួបជុំ​ផឹកស៊ី ក៏ដូចជា ការ​ដើរលេង​កម្សាន្ត​នានា ពិសេស​អ្នក​ទៅលេង​ទឹក ត្រូវ​ប្រុងប្រយ័ត្ន​គ្រោះថ្នាក់​។ សូម​កុំឱ្យ​សប្បាយ ក្លាយជា​ទុក្ខ​។ សូម​ជូនពរ​ឆ្នាំ​ថ្មី សូម​សុខ​សប្បាយ​ទាំងអស់គ្នា​៕​