ដោយៈ សុផល / ភ្នំពេញ៖ លោក ឈួន វិន រដ្ឋលេខាធិការ ទទួលបន្ទុកជា ប្រធានលេខាធិការដ្ឋាន គ្រប់គ្រង គ្រោះមហន្តរាយ របស់ក្រសួងសាធារណការ និងដឹកជញ្ជូន នៅថ្ងៃទី១៩ ខែមេសា ឆ្នាំ២០២២ នៅទីស្តីការក្រសួង បានអញ្ជើញដឹកនាំកិច្ចប្រជុំ ស្តីពីការត្រៀម រៀបចំរបាយការណ៍ ឆមាសទី១ ឆ្នាំ២០២២ ទាក់ទងនឹងការគ្រប់គ្រង គ្រោះមហន្តរាយ នៃវិស័យសាធារណការ និងដឹកជញ្ជូន ដោយមានការចូលរួម ពីថ្នាក់ដឹកនាំក្រសួង សមាជិកលេខា ធិការដ្ឋាន គ្រប់គ្រងគ្រោះ មហន្តរាយក្រសួង ព្រមទាំងសមាជិក ក្រុមជំនួយការ ជាមន្ត្រីបង្គោលផងដែរ។
កិច្ចប្រជុំនេះ ធ្វើឡើងដើម្បីចែករំលែកព័ត៌មាន អំពីលទ្ធផលការងារសំខាន់ៗ និងលើកទិសដៅ ការងារបន្ត ដូចជាការត្រៀមរៀបចំ របាយការណ៍ ឆមាសទី១ ឆ្នាំ២០២២ របស់លេខាធិការដ្ឋាន គ្រប់គ្រងគ្រោះមហន្តរាយ និងសេចក្ដីណែនាំ ស្ដីពីការចូលរួមសហការ គ្រប់គ្រងគ្រោះ មហន្តរាយ សម្រាប់វិស័យសាធារណ ការ និងដឹកជញ្ជូន ។
អង្គប្រជុំ បានពិភាក្សាយ៉ាងផុសផុល និងបានរាយការណ៍ អំពីលទ្ធផលការងារ របស់ លេខាធិការដ្ឋានគ្រប់ គ្រងគ្រោះមហន្តរាយ ពីគ្រប់បណ្ដាអគ្គនាយកដ្ឋាន ពាក់ព័ន្ធ និងបានរំឭក ពីក្របខ័ណ្ឌការងារ គ្រប់គ្រងគ្រោះមហន្តរាយ ទាក់ទង នឹងសកម្មភាពត្រៀមបង្ការ និងកាត់បន្ថយគ្រោះថ្នាក់ សកម្មភាពត្រៀម រៀបចំសកម្មភាពឆ្លើយតប និងសង្គ្រោះបន្ទាន់ និងសកម្មភាពស្តារឡើងវិញ ព្រមទាំងបានលើកឡើង ពីផែនការសកម្មភាពគាំទ្រ នៅក្នុងផែនការសកម្មភាព ជាតិ សម្រាប់ការកាត់បន្ថយ ហានិភ័យគ្រោះមហន្តរាយ ២០១៩-២០២៣ ដែលរួមមានៈ ១) បន្តការផ្សព្វផ្សាយ និងបណ្តុះបណ្តាល ស្តីពីការគ្រប់គ្រង និង ការកសាងហេដ្ឋារចនាសម្ព័ន្ធដឹកជញ្ជូន ដែលធន់នឹងប្រែប្រួលអាកាសធាតុ ដើម្បីរួមចំណែក លើកកម្ពស់ វិស័យដឹកជញ្ចូន ប្រកបដោយចីរភាព និងនវានុវត្តន៍។ ២) បន្តរៀបចំបទដ្ឋាន បច្ចេកទេស និងគំនូសប្លង់ និងសាងសង់ ជួសជុលហេដ្ឋារចនាសម្ព័ន្ធដឹកជញ្ជូន ដែលធន់នឹង ប្រែប្រួលអាកាសធាតុ និង ៣) បន្តបណ្តុះបណ្តាល និងពង្រឹងសមត្ថភាព លើបទដ្ឋានបច្ចេក ទេស និងការសិក្សាគម្រោងសាងសង់ ជួសជុលហេដ្ឋារចនាសម្ព័ន្ធដឹកជញ្ជូន ។
លោកប្រធានលេខាធិការដ្ឋាន បានជំរុញឱ្យគ្រប់អង្គភាព ក្រោមឱវាទក្រសួង ទាំងថ្នាក់ជាតិ និងថ្នាក់ក្រោមជាតិ បន្តយកចិត្តទុកដាក់ លើគ្រប់ដំណាក់កាល នៃការគ្រប់គ្រងគ្រោះមហន្តរាយ ដើម្បីទប់ស្កាត់ បង្ការ ស្ដារឡើងវិញ និងរាយ ការណ៍ ឱ្យបានទាន់ពេលវេលា។
ជាមួយគ្នានេះផងដែរ លោកប្រធាន ក៏បានស្នើឱ្យអគ្គនាយកដ្ឋានពាក់ព័ន្ធ បន្តផ្សព្វផ្សាយ បណ្ដុះ បណ្ដាល និងពង្រឹងសមត្ថភាព លើការងារគ្រប់គ្រង កសាង និងជួសជុល ហេដ្ឋារចនាសម្ព័ន្ធ ដឹកជញ្ជូន ដូចមានចែង នៅក្នុងផែន ការសកម្មភាពជាតិ សម្រាប់ការកាត់បន្ថយហានិភ័យ គ្រោះមហន្តរាយ ២០១៩-២០២៣ តាមរយៈការរៀបចំជាទម្រង់ សម្រាប់តាមដាន ត្រួតពិនិត្យ និងវាយតម្លៃលទ្ធផល ឱ្យសម្រេចបាន តាមផែនការ៕/V-PC
